Núna hafa um 330 þátttakendur skráð sig til leiks á Sápuboltamótið á Ólafsfirði um helgina í 56 liðum. Þetta mun vera mesti fjöldi þátttakenda sem hafa tekið þátt hingað til. Þátttakendur eru hvattir til að mæta í búningum en veitt verða verðlaun fyrir flottasta búninginn. Sápustjórinn Ásgeir Frímannsson var á línunni.
Framkvæmdir við breikkun Reykjanesbrautar eru enn yfirstandandi eins og margir hafa eflaust orðið varir við. Vegagerðin segir að framkvæmdirnar gangi vel - en það hefur verið töluvert um hraðakstur á vinnusvæðinu; margir sem virða ekki hraðamörk og hættan auðvitað mikil fyrir vinnandi fólk þar. G. Pétur Matthíasson, upplýsingafulltrúi Vegagerðarinnar, ræddi þetta við okkur, og einnig vegblæðingar víðs vegar á þjóðveginum sem hafa verið til umræðu - til dæmis í tengslum við mótmæli bifhjólafólks í vikunni.
Það er töluvert um covidsmit í samfélaginu núna. Á nokkrum deildum Landspítala hefur hreinlega geisað faraldur - bæði sjúklingar og starfsmenn hafa verið að smitast og það getur valdið röskun á daglegri starfsemi sjúkrahússins. Covidveiran er orðin svipuð og aðrar öndunarfæraveirur, sem hafa líka verið til vandræða í vetur, en er ástæða til að hafa sérstakar áhyggjur af covid? Guðrún Aspelund sóttvarnalæknir sagði okkur nánar frá stöðunni.
Götubitahátíðin fer fram um helgina í Hljómskálagarðinum. Þetta er stærsti matarviðburður á Íslandi að sögn viðburðarhaldara. Á hátíðinni verða um 30 söluaðilar í matarvögnum og sölubásum og keppnin um Besta götubita Íslands 2024 fer einnig fram samhliða en sigurvegari þeirrar keppni tekur þátt í European Street Food Awards seinna á árinu. Róbert Aron Magnússon, sem sér um hátíðina, og Silli kokkur sem átti besta borgarann á Europe streetfood awards fyrir tveimur árum komu til okkar.
Lagalisti:
Bubbi Morthens - Háflóð
Fleetwood Mac - Sara
Jónfrí og Ólafur Bjarki Bogason - Gott og vel
Mugison - Stóra stóra ást
The Stone Roses - Fools Gold
Baggalútur - Allir eru að fara í kántrí
Daði Freyr - Thank You
The La's - There She Goes
Plan B - She Said
Level 42 - Lessons In Love
Pet Shop Boys - Loneliness
