Kastljós

Ólafur Þ. um stjórnarsamstarfið, njósnahagkerfið og Erró

Lilja Alfreðsdóttir viðskipta- og ferðamálaráðherra, kastaði sprengju inn í stjórnarsamstarfið í morgun þegar hún varpaði ábyrgð á bankasölunni á fjármálaráðherra. Hún sagðist jafnframt hafa lýst andstöðu sinni við aðferðafræðina en Lilja situr í ráðherranefnd þriggja ráðherra sem fer með söluna. Forsætisráðherra sagði í dag að Lilja hefði á engum tímapunkti látið bóka athugsemdir á neinum fundum nefndarinnar. Ólafur Þ. Harðarson prófessor í stjórnmálafræði ræðir stöðuna í pólitíkinni.

Neytendasamtökin hafa skorið upp herör gegn njósnahagkerfinu á netinu en gríðarlegu magni persónuupplýsinga er safnað um okkur á hverjum einasta degi. Breki Karlsson, formaður samtakanna, ræðir við okkur.

Sprengikraftur mynda er yfirskrift stærstu Erró-sýningar sem sett hefur verið upp hér á landi. Hún tekur yfir öll rými Listasafns Reykjavíkur og bætir meira að segja nokkrum nýjum við, sem eru eldrauð eða það sem af sérfræðingum er kallað Erró-rauð að lit.