Kvöldfréttir útvarps

Samhjálp í húsnæðisvanda, Rússar á Ólympíuleika, eftirlit með samfélagsmiðlum, atvinnulíf í Grindavík og Húnavaka

Að óbreyttu missir Samhjálp húsnæði fyrir kaffistofu sína eftir nokkra daga. Deilum um staðsetningu hennar er hvergi nærri lokið og framkvæmdastjóri segir að matargjafir verði úti á götu ef ekkert húsnæði finnst. Málið var rætt á fundi borgarráðs í dag.

Alþjóðaólympíunefndin ætlar ekki að endurskoða þá ákvörðun að hleypa rússnesku ólympíunefndinni aftur inn úr kuldanum. Níu Evrópusambandsríki kröfðust þess að sambandið stöðvaði fjárframlög til nefndarinnar af þeim sökum.

Evrópusambandið vinnur að nýrri og umdeildri löggjöf sem á að sporna við kynferðislegu ofbeldi gegn börnum á netinu. Samkvæmt henni á að skanna samskipti milli fólks á samskiptaforritum. Löggjöfin gæti komið til framkvæmda á Íslandi í gegnum EES-samninginn verði hún samþykkt.

Atvinnulíf í Grindavík kemst ekki á fullan skrið á meðan hætta er talin á frekari jarðhræringum. Bæjarstjóri vonar að nýtt hættumat greiði fyrir uppbyggingu.

Fjölbreytt dagskrá er á Húnavöku á Blönduósi um helgina. Skipuleggjandi hátíðarinnar segir útlit fyrir gott veður og góða stemmningu.

Umsjón: Ásta Hlín Magnúsdóttir

Tæknimaður: Kári Guðmundsson

Stjórn útsendingar: Hildur Sigurbergsdóttir