Í boði náttúrunnar

Tíundi þáttur: Óvenjulegar hliðar á matjurtaræktinni.

Í þessum þætti munu þáttastjórnendur skoða óvenjulegar hliðar á matjurtaræktinni. Guðfinnur Jakobsson mun útskýra hvað fellst í lífefldri ræktun. En hann ásamt konu sinni Atie Bakker hafa stundað slíka ræktun í Skaftholti í Gnúpverjahreppi í hátt í 29 ár. Sólveig Eiríksdóttir eða Solla eins og flestir kalla hana hefur neytt hráfæðis um langt skeið. Hún mun útskýra þá hugmyndafræði og hvernig nýta meigi grænmetið í garðinum til að efla líkamlega heilsu. Í lok þáttarinns verður Erla Stefánsdóttir heimsótt, en hún er þekkt fyrir að sjá álfa, huldufólk og aðrar verur í náttúrunni. Hún svarar því hvort það leynist eitthvað annað og meira en bara grænmeti í matjurtagörðum fólks.

Frumflutt

11. ágúst 2024

Aðgengilegt til

12. ágúst 2025

Þátturinn er í umsjón hjónanna Guðbjargar Gissurardóttur og Jóns Árnasonar, en þau hafa sett sér það markmið að koma sér upp lífrænum matjurtagarði í sælureit sínum í Kjós. Þau hafa enga reynslu, né hugmynd um hvernig þau eiga að koma slíku verki í framkvæmd. En til að afla sér þekkingar fara þau á stúfana og hitta sérfræðinga og vana leikmenn á sviði matjurtaræktunar til að fá ráðleggingar og hugmyndir sem munu vonandi skila þeim og hlustendum góðri uppskeru í lok sumars. Einnig munu þau hafa uppi á fólki sem er að gera óvenjulega hluti á þessu sviði, auk þess að taka fyrir matreiðslu grænmetis, nýtingu villijurta o.m.fl. Í Boði náttúrunnar fjallar um ferðalag þeirra hjóna og verður hlustendum vonandi innblástur og hvatning til að rækta sitt eigið grænmeti, hvort sem það er úti í garði, uppi í sumarbústað, á svölunum eða úti í glugga. (Áður á dagskrá 2009)