Í boði náttúrunnar

Fimmti þáttur: Skordýr, hvítlaukur, börn sem rækta grænmeti o.fl.

Í þessum þætti ræða þáttastjórnendur við Guðmund Halldórsson skordýrafræðing um hlutverk skordýranna í matjurtagarðinum og fá hjá honum nokkur góð ráð varðandi sambýlið við þessa nýju nágranna. Waldorfleikskólinn Ylur, í Lækjarbotnum, verður heimsóttur, en þar hafa börnin ásamt Jóhönnu B. Magnúsdóttur garðyrkjufræðingi, komið upp einstökum matjurtagarði sem er hannaður út frá náttúruöflunum, en þau eru: Jörð, vindur, eldur og vatn. Einnig verður rætt við nokkra krakka úr leikskólanum og Sólveigu Þorbergsdóttur kennara. Að lokum verður Auður Óskarsdóttir, blómaskreytir og garðyrkjufræðingur heimsótt, en hún ser um nytjajurtagarðinn í Grasagarði Reykjavíkur, í Laugardal. Hún mun fræða hlustendur um hlutverk garðsins og einnig gefa góð ráð varðandi ræktun á hvítlauk.

Frumflutt

7. júlí 2024

Aðgengilegt til

8. júlí 2025

Þátturinn er í umsjón hjónanna Guðbjargar Gissurardóttur og Jóns Árnasonar, en þau hafa sett sér það markmið að koma sér upp lífrænum matjurtagarði í sælureit sínum í Kjós. Þau hafa enga reynslu, né hugmynd um hvernig þau eiga að koma slíku verki í framkvæmd. En til að afla sér þekkingar fara þau á stúfana og hitta sérfræðinga og vana leikmenn á sviði matjurtaræktunar til að fá ráðleggingar og hugmyndir sem munu vonandi skila þeim og hlustendum góðri uppskeru í lok sumars. Einnig munu þau hafa uppi á fólki sem er að gera óvenjulega hluti á þessu sviði, auk þess að taka fyrir matreiðslu grænmetis, nýtingu villijurta o.m.fl. Í Boði náttúrunnar fjallar um ferðalag þeirra hjóna og verður hlustendum vonandi innblástur og hvatning til að rækta sitt eigið grænmeti, hvort sem það er úti í garði, uppi í sumarbústað, á svölunum eða úti í glugga. (Áður á dagskrá 2009)