Í boði náttúrunnar

Sjötti þáttur: Fyrsta uppskera sumarsins

Í þessum þætti munu þáttastjórnendur fagna fyrstu uppskeru sumarsins með heimsókn á Grænmetismarkaðinn að Mosskógum í Mosfellsdal, en markaðurinn er orðinn árviss og ómissandi viðburður í lífi margra. Einnig mun Auður Ottesen garðyrkjufræðingur gefa nokkur góð ráð varðandi uppskeruna. Þáttastjórnendur ferðast síðan austur fyrir fjall til að fræðast nánar um lífræna ræktun. Komið verður við á Sólheimum í Grímsnesi, en þar byrjaði Sesselja Sigmundsdóttir, fyrst íslendinga að rækta lífrænt grænmeti. Pétur Sveinbjarnarsson, stjórnarformaður Sólheima segjir frá lífi og störfum þessarar merku konu. Hjónin Þórður G. Halldórsson og Karolína Gunnarsdóttur í garðyrkjustöðinni Akri verða heimsótt og rætt verður við Þórð um lífræna ræktun og kosti þess að neyta lífrænna ávaxta og grænmetis.

Frumflutt

14. júlí 2024

Aðgengilegt til

15. júlí 2025

Þátturinn er í umsjón hjónanna Guðbjargar Gissurardóttur og Jóns Árnasonar, en þau hafa sett sér það markmið að koma sér upp lífrænum matjurtagarði í sælureit sínum í Kjós. Þau hafa enga reynslu, né hugmynd um hvernig þau eiga að koma slíku verki í framkvæmd. En til að afla sér þekkingar fara þau á stúfana og hitta sérfræðinga og vana leikmenn á sviði matjurtaræktunar til að fá ráðleggingar og hugmyndir sem munu vonandi skila þeim og hlustendum góðri uppskeru í lok sumars. Einnig munu þau hafa uppi á fólki sem er að gera óvenjulega hluti á þessu sviði, auk þess að taka fyrir matreiðslu grænmetis, nýtingu villijurta o.m.fl. Í Boði náttúrunnar fjallar um ferðalag þeirra hjóna og verður hlustendum vonandi innblástur og hvatning til að rækta sitt eigið grænmeti, hvort sem það er úti í garði, uppi í sumarbústað, á svölunum eða úti í glugga. (Áður á dagskrá 2009)