Þau Guðrún Dís Emilsdóttir, Hrafnhildur Halldórsdóttir og Andri Freyr Viðarsson halda landanum vel upplýstum um menn og málefni á leið úr vinnu í eftirmiðdaginn. Þau fylgjast vel með fréttum og dægurmálum og spila nóg af góðri tónlist.
Arnar Gunnlaugsson var í gær kynntur sem nýr þjálfari íslenska karlalandsliðsins í fótbolta á blaðamannafundi í höfuðstöðvum KSÍ í Laugardal. Arnar stýrir íslenska landsliðinu í fyrsta sinn í tveimur leikjum við Kósovó, 20. og 23. mars, í umspili í Þjóðadeildinni. Við í Síðdegisútvarpinu tókum stöðuna á Arnari og spurðum hvort hann væri ekki kampakátur á þessum fína föstudegi.
Í kvöld verða lögin í Söngvakeppninni 2025 kynnt í sérstökum þætti á RÚV þar sem spjallað verður við flytjendur og höfunda laganna tíu sem keppa í ár. Benedikt Valsson og Rúnar Freyr Gíslaon komu til okkar og sögðu okkur betur frá.
Snorri Ásmundsson mætti til okkar en hann hefur ákveðið að bjóða sig fram sem formaður Sjálfstæðisflokksins. Meira um það hér rétt eftir fimm.
Í dag eru 50 ár síðan eitt af meistaraverkum Bob Dylans kom út, platan Blood on the tracks. Í næstu viku fer kvikmyndin A complete unknown í almennar sýningar hér á landi. Til að tengja þessa viðburði fáum við til okkar 13 ára Bob Dylan ofuraðdáanda, hann Guðmund Brynjar Bergsson sem oft er kallaður Gummi Binni, sem var sérstaklega boðið á forsýningu á kvikmyndinni, hann rýndi í myndina, ekki nóg með það, hann spilaði og söng eitt af lögum nobelskáldsins.
En við byrjuðum á Borgarlínunni en samgönguráðherra tók fyrstu skóflustunguna að Fossvogsbrú nú í hádeginu. Brúin er fyrsta stóra framkvæmdin í borgarlínuverkefninu, sem hefur verið á teikniborðinu í áratug. Á línunni hjá okkur var Davíð Þorláksson framkvæmdastjóri Betri samgangna.
