Kiljan

Kiljan 17. apríl 2024

Í Kilju kvöldsins fjöllum við um bókina Björn Pálsson flugmaður og þjóðsagnapersóna eftir Jóhannes Tómasson. Við förum norður á Akureyri og skoðum tvær af flugvélum Björns sem þar eru geymdar í fylgd Steinunnar Maríu Sveinsdóttur sem stýrir Flugsafni Íslands. Björn naut gríðarlegrar aðdáunar í lifanda lífi enda var hann frumkvöðull í sjúkraflugi og víst að hann bjargaði mörgum mannslífum. Frá Akureyri förum við á Siglufjörð og hittum Sigurð Ægisson sóknarprest en hann hefur fengist við margvísleg ritstörf, skrifað um þjóðleg fræði, ljósmyndað og ritað um fugla og hvali, en nýjasta bók hans nefnist Völvur á Íslandi. Aðalbjörg Stefanía Helgadóttir segir okkur frá nýrri bók eftir sig sem heitir einfaldlega Einmana og fjallar, eins og titillin gefur til kynna, um einmanaleikann í ýmsum myndum, hjá ungum og öldnum. Gagnrýnendur þáttarins fjalla um þrjár bækur: Möndlu eftir Hildi Knútsdóttur, Tæpasta vað eftir Jón Hjartarson og Lofgjörð til Katalóníu eftir George Orwell.