Kiljan

Kiljan 13. mars 2024

Í Kilju vikunnar fjöllum við um tvö nýútkomin skáldverk - Gegnumtrekk eftir Einar Lövdahl, það er samtímasaga um ungan mann sem er á flótta undan lífinu, og Stjörnufallseyjur sem er bók full af fantasíu eftir Jakub Stachowiak sem er upprunninn í Póllandi en skrifar á íslensku. Við fræðumst um Tryggva Magnússon myndlistarmann en hann var langafi Andrésar Úlfs Helgusonar sem hefur ritað bók um hann. Tryggvi lagði gjörva hönd á margt, teiknaði í skopritið Spegilinn, hannaði peningaseðla, frímerki og auglýsingar en var líka listmálari þótt hann nyti ekki mikillar viðurkenningar sem slíkur. Í Bókum & stöðum förum við austur á Vestdalseyri við Seyðisfjörð en þar eru slóðir Vilborgar Dagbjartsdóttur og Karls Einarssonar Dunganons. Gagnrýnendur þáttarins fjalla um þrjár bækur: Einlífi eftir Hlín Agnarsdóttur, Lokasuðuna eftir Torgny Lindgren og Gangandi bassa eftir Tómas R. Einarsson.