Bækur og staðir 2017-2018

Axlarbjörn

Björn Pétursson er eini glæpamaðurinn í Íslandssögunni sem kallast má raðmorðingi. Egill Helgason fer að bænum Öxl á Snæfellsnesi, þar sem Björn bjó og var jafnan kenndur við. Björn er talinn hafa drepið átján manns og þótti víst stórhættulegt að þiggja gistingu hjá honum. Hann var líflátinn árið 1596 og finna má frásagnir af aftöku hans í Þjóðsögum Jóns Árnasonar, en það eru miður geðslegar lýsingar. Sagt er að hann hafi verið dysjaður í þrennu lagi til að koma í veg fyrir að hann gengi aftur. Hann hefur hinsvegar orðið mörgum ritsmiðum að yrkisefni í gegnum tíðina og þannig í raun hlotið sína aftur göngu.