Forsætisráðherra hefur talið eðlilegast að stefna að kosningum þann þrítugasta, til dæmis til að fá aukadaga til að klára fjárlög og fjárlagatengd mál. Við ræðum við Þórólf Matthíasson, prófessor emeritus í hagfræði, um þau mál og áhrif kosninga á þau.
Samfélagsmiðlar leika sífellt stærra hlutverk í kosningabaráttum og sumir segja að tik tok notkun teymis Höllu Tómasdóttur, forseta, hafi skipt miklu máli þegar kom að kjöri hennar. Við ætlum að ræða við Tryggva Frey Elínarson, sérfræðing í samfélagsmiðlum og stjórnanda hjá Datera, um samfélagsmiðla og kosningarnar framundan.
Miklar umræður sköpuðust í Silfri gærdagsins um starfstjórn og það fyrirkomulag sem gæti tekið við fram að kosningum. Ekki voru öll á eitt um hvað stæði til boða í þeim málum. Haukur Arnþórsson stjórnsýslufræðingur lítur við hjá okkur.
Finnbjörn A. Hermannsson, forseti ASÍ, verður gestur okkar eftir átta fréttir en nokkuð hefur verið rætt um áhrif stjórnarslita og kosninga á efnahagsmálin og stöðugleika.
Bogi Ágústsson, fréttamaður og sagnfræðingur, og Ólafur Þ. Harðarson, prófessor emeritus í stjórnmálafræði, verða hjá okkur eftir fréttayfirlitið hálf átta en þeir hafa auðvitað mikla reynslu þegar kemur að kosningaumfjöllun.
