Hin árlega listahátíð Act alone fer fram nú um helgina á Suðureyri. Hátíðin er 20 ára í ár og er á dagskrá leiksýningar, tónleikar, myndlist og ritlist svo eitthvað sé nefnt. Vestfirsk slagsíða er á dagskránni þar sem hátíðin hefur ávallt verið haldin á Vestfjörðum. Elfar Logi Hannesson sagði okkur betur hvað verður í gangi á hátíðinni.
Á Hvanneyri í Borgarfirði verður svokallaður Ferguson dagur á Landbúnaðarsafni Íslands á morgun. Dagurinn er hluti af opnum dögum sem hafa verið yfir sumarið hjá safninu í samstarfi við Ferguson félagið. Ragnhildur Helga Jónsdóttir safnstjóri sagði okkur meira um þetta.
Það eru ekki ýkja margir læknar sem sérhæfa sig í sjúkdómnum endómetríósu hér á landi, en einhverjir þó. Einn þeirra er Hildur Guðjónsdóttir, kvensjúkdómalæknir sem flutti til Íslands síðasta sumar eftir átta ára búsetu í Svíþjóð. Hún starfar í dag á Heilbrigðisstofnun Vesturlands. Mikil vitundavakning hefur orðið um endómetríósu undanfarin ár, en talið er að ein af hverjum tíu konum séu með sjúkdómum. Við heyrðum í Hildi og ræddum störf hennar - og greiningar og meðferð endómetríósu.
Karlmaður sem er ákærður fyrir að bana sambýliskonu sinni á Akureyri í apríl er einnig ákærður fyrir að hafa beitt hana ofbeldi rúmum tveimur mánuðum áður en hún lést. Jenný Kristín Valberg, teymisstjóri hjá Bjarkarhlíð, kom til okkar og ræddi heimilisofbeldi og verklag í tengslum við það. Hvort hægt sé að gera betur í að koma í veg fyrir að saga þolenda heimilisofbeldis endi svona.
Og eins og vanalega á föstudögum fórum við yfir fréttir vikunnar með góðum gestum. Í dag komu til okkar Kolbrún Áslaugar Baldursdóttir borgarfulltrúi og sálfræðingur og Bjarni Snæbjörnsson leikari og rithöfundur.
Lagalisti:
SPpilverk þjóðanna - Græna byltingin
10 CC - Dreadlock Holiday
Mammaðín - Frekjukast
Ed Sheeran - Eyes Closed
Seal - Crazy
Wham! - Everything She Wants
