Við heyrðum í Heimi Harðarsyni, sem er leiðangursstjóri, skipstjóri og eigandi Norðursiglingar á Húsavík. Hann sagði okkur frá vikulöngum siglingum um stærsta fjarðakerfi jarðar, Scoresbysund á Austur-Grænlandi á skútu. Við tókum líka stöðuna á hvalaskoðun á Skjálfanda.
Við héldum áfram umræðu um málefni hjólabúa sem búa í hljólhýsum og húsbílum á bráðabirgðarsvæði við Sævarhöfða í Reykjavík. Á föstudaginn var formaður Hjólabúa, Geirdís Hanna Kristjánsdóttir, hjá okkur ásamt Kolbrúnu Áslaugar Baldursdóttur borgarfulltrúa Flokks fólksins og sagði hjólabúa bíða eftir úrræðum frá borginni. Borgarstjóri lét hafa eftir sér í kjölfarið að fólk gæti bara leitað á tjaldsvæði í nágrenni Reykjavíkur, borgin sé ekki á leiðinni að setja upp slíkt svæði fyrir þennan hóp. Einar Þorsteinsson, borgarstjóri, var gestur okkar.
Skjálftavirkni færist í aukana á Reykjanesskaga og talið er að gos hefjist á næstu þremur til fjórum vikum. En margir spá í spilin og ekki allir á eitt sammála. Eldfjallafræðingur spáði því til dæmis um helgina að eldsumbrotum á Sundhnúksgígaröðinni væri mögulega lokið, en hann sagði á bloggsíðu sinni að samkvæmt GPS-mælingum hefði hægt á landrisinu undanfarið. Náttúruvársérfræðingur Veðurstofunnar sagði aftur á móti ekkert benda til gosloka. Þorvaldur Þórðarson prófessor í eldfjallafræði var á línunni hjá okkur og fór yfir stöðuna.
Við fórum yfir íþróttirnar með Óðni Svan Óðinssyni beint frá hljóðveri RÚV á Akureyri.
Í gær barst tilkynning frá Joe Biden Bandaríkjaforseta um að hann hefði hætt við framboð sitt til forseta en stefndi á að klára kjörtímabilið og draga sig svo í hlé. Mikill þrýstingur hefur verið á hann að gera þetta frá ýmsum málsmetandi demókrötum. Við fengum álit Silju Báru Ómarsdóttur, prófessors í alþjóðasamskiptum, á stöðunni sem er komin upp í Bandaríkjunum.
Lagalisti:
Birkir Blær - Thinking Bout You
The Cars - Drive
Björn Jörundur Friðbjörnsson, Emmsjé Gauti, Fjallabræður - Fullkominn dagur til að kveikja í sér
Roxy Music - Let's stick together
Bubbi Morthens - Tveir tveir fjórir
Jónfrí, Ólafur Bjarki Bogason - Gott og vel
Stevie Nicks - Edge Of Seventeen
Kenya Grace - Strangers
Marvin Gaye - What's Going On
