Rauði Krossinn á Íslandi er að vekja athygli á því að nú stendur yfir alþjóðleg vitundarvika um einmanaleika. Þema vikunnar í ár er Tilviljanakennd tengsl en með því er verið að benda á mikilvægi þeirra litlu en fjölbreyttu samskipta sem eiga sér stað í daglega lífinu. Og samtímis er Rauði krossinn að leita að sjálfboðaliðum sem hefur áhuga á að taka þátt í félagslegu þátttöku verkefnunum. Við fengum til okkar þau Jóhönnu Stefáns Bjarkardóttur, verkefnafulltrúa hjá Rauða krossinum á Íslandi og sjálfboðaliðann Bjarna Eggertsson.
Við ræddum nokkuð sem kallað hefur verið gagnasópun Meta í Evrópu að undanförnu. Hefur stórfyrirtækið hafið söfnun á upplýsingum notenda á Evrópumarkaði til að mata þróun þeirra á gervigreind. Tryggvi Freyr Elínarson stjórnandi hjá Datera sagði okkur betur frá því.
Ótrúleg aukning hefur orðið að undanförnu á aðsókn í Íslensku sem annað tungumál við Háskóla Íslands. 800 manns sóttu um fyrir haustið. Brynja Þorgeirsdóttir, lektor í íslenskum bókmenntum við Háskóla Íslands, leit við hjá okkur í spjall um áhugann á íslenskunni og töfrana í kennslunni.
Formaður Landssambands lögreglumanna óttast öryggi lögreglumanna en vopnuð útköll Sérsveitarinnar hafa næstum tífaldast á síðustu tíu árum samkvæmt skriflegu svari dómsmálaráðherra við fyrirspurn Njáls Trausta Friðbertssonar þingmanns Sjálfstæðisflokksins á dögunum. Formaðurinn, Fjölnir Sæmundsson, kom til okkar til að ræða þetta, vopnaburð lögreglu og valdbeitingaheimildir hennar almennt.
Ættum við að takast á við vanda drengja í skólakerfinu með húmorinn að vopni? Rannsóknir sem unnar hafa verið við Stanford háskóla og Harvard sýna að húmor eykur skilvirkni og árangur í námi. Sveinn Waage hefur haldið fyrirlestra um mikilvægi húmorsins við opna Háskólann í Reykjavík. Hann kom til okkar.
Í lok þáttar hringdum við í Lindu Maríu Ásgeirsdóttur, veitingakonu og starfsmann Ferðamálafélags Hríseyjar, til að forvitnast um lífið í Hrísey, núna þegar sumarið er fram undan en mikið verður um að vera í eynni í sumar.
Lagalisti:
1860 - Íðilfagur
Bubbi Morthens - Dansaðu
Years and Years - King
Salka Sól Eyfeld - Sólin og ég
Coldplay - Talk
Eurythmics - Here Comes The Rain Again
Sixpence none the richer - Kiss Me
Marvin Gaye - What's Going On
