Friðþjófur forvitni er forvitinn og yndislegur api sem getur oft á tíðum verið full ævintýragjarn. Fylgjumst með ævintýrum hans og mannsins með gula hattinn eiganda hans.

Ævintýralegir þættir um músafjölskyldu sem býr á lítilli plánetu.

Hinrik hittir einhvern nýjan á hverjum degi og lendir í ótrúlegustu uppákomum.

Rebekka er ung stúlka sem er að læra á lífið, skólann og tilveruna. Örvar er græn veira sem lenti hjá mannfólkinu. Saman eru þau ótrúlegt teymi.

Símon er hress og skemmtileg kanína sem tekst á við alls kyns áskoranir og lærir af mistökum sínum.

Hvernig ætli sumir hlutir sem við erum mjög vön hafi verið fundnir upp? Stórfurðulegu steinaldarmennirnir sýna okkur sínar misheppnuðu tilraunir.

Fallegir teiknimyndaþættir um óvenjulega vináttu bjarnarins Ernests og músarinnar Célestine.

Vinalegi hundurinn Sámur hvetur börn til þess að kanna umhverfi sitt og takast á við verkefni í sameiningu.

Krúttlegir teiknimyndaþættir um litla hafbúa sem eru saman í bekk og elska að syngja og dansa. Kennarinn þeirra er hress gullfiskur sem kennir þeim ýmislegt um lífið og tilveruna.

Þættir um óteljandi ævintýri Strumpanna og Kjartans galdrakarls sem fara hér á kostum í Strumpabæ.

Hrúturinn Hreinn og félagar hans á bóndabænum lenda í mörgum skemmtilegum ævintýrum.

Sænsk teiknimynd um Bangsa sterkasta, en jafnframt blíðasta, björn í heimi. Þegar þjófar ræna ömmu hans heldur hann af stað í hættuför ásamt vinum sínum til að bjarga henni. Myndin er talsett á íslensku.

Sjónvarpsþáttaröð fyrir alla fjölskylduna sem gerist í Lundúnum á Viktoríutímanum. Hetty Feather er alin upp á barnaheimili þar sem forstöðukonan Bottomly ríkir með járnaga. Hetty dreymir um betra líf og leggur á ráðin um að flýja og leita að móður sinni. Aðalhlutverk: Isabel Clifton, Polly Allen og Eva Pope.

Norsk teiknimynd frá 2020 um Ellu Bellu Bingó og Henry sem eru bestu vinir og gera allt saman. Dag einn flytur nýr drengur í hverfið og allt breytist. Myndin er talsett á íslensku.

Brot úr tónlistarþáttunum Tónatal í umsjón Matthíasar Más Magnússonar.

Lay Low flytur lag Dolly Parton Jolene.

Helstu fréttir dagsins af innlendum og erlendum vettvangi. Alla daga, árið um kring.

Góð ráð og æfingar sem tilvalið er að gera heima. Íris Rut Garðarsdóttir sjúkraþjálfari hefur umsjón með leikfiminni.

Þáttaröð frá 1997 þar sem Spaugstofumennirnir Karl Ágúst Úlfsson, Pálmi Gestsson, Randver Þorláksson, Sigurður Sigurjónsson og Örn Árnason bregða á leik. Stjórn upptöku: Sigurður Snæberg Jónsson.

Dr. Gunni og Felix Bergsson stjórna spurningakeppni hljómsveita. Í þáttunum takast íslenskar hljómsveitir á í æsandi spurningaleik, þar sem gáfur og viska, ásamt snerpu, atgervi og heppni ráða niðurstöðunni - já og tónlistarhæfileikar. Meðal þeirra hljómsveita sem keppa eru Buff, Ljótu hálfvitarnir, Jeff Who?, Baggalútur, Hvanndalsbræður, múm, Sigur Rós og Áhöfnin á Halastjörnunni. Þættirnir voru frumsýndir á RÚV sumarið 2009. Stjórn upptöku: Helgi Jóhannesson.

Í öðrum þætti Popppunkts mætast Áhöfnin á Halastjörnunni og Sigur Rós, heimsfrægasta hljómsveit Íslandssögunnar. Frá gleðisveitinni Halastjörnu koma þeir Hemmi Gunn, Gylfi Ægisson og Ari Jónsson, en frá Sigur Rós þeir Kjartan, Georg og Orri. Óhætt er að fullyrða að þetta sé furðulegasti Popppunktsþátturinn frá upphafi. Stolt siglir fleyið mitt og hoppar í polla. Spurning er hins vegar: þegar kemur að poppfræðum hvort skiptir þá máli, áratugalöng reynsla við skemmtanahald eða náttúruelskandi frumkraftur Sigur Rósar?

Á meðan ég man er íslensk þáttaröð sem gerð var í tilefni af 80 ára afmæli Ríkisútvarpsins árið 2010. Í hverjum þætti er stiklað yfir fimm ára tímabil í sögu Sjónvarpsins frá árunum 1966 til 2005. Í þáttunum er fréttum, atriðum úr skemmtiþáttum, viðtalsbrotum og tónlist frá þessum tímabilum blandað saman. Inn í þessa upprifjun fléttast viðtöl við fólkið sem annaðhvort var áberandi á tímabilinu eða kom við sögu í fréttunum sem rifjaðar eru upp. Umsjónarmaður er Guðmundur Gunnarsson og dagskrárgerð er í höndum Sigurðar Jakobssonar.

Í þessum þætti er farið yfir árin 2001 til 2005. Hér sjáum við meðal annars brot af flutningi íslenska Eurovision lagsins Birta bíddu eftir mér, nokkrar frumlegar fréttir Magnúsar Hlyns Hreiðarssonar, Sverri Þór Sverrisson, eða Sveppa, hljóta verðlaun sem sjónvarpsmaður ársins á Edduverðlaununum þar sem hann heldur ræðu um hvernig var hægt að kjósa hann oft á netinu, brot úr þættinum Bílasalan Bjallan og frétt um kattastríð í Reykjavík.

Sænsk þáttaröð í þremur hlutum um mataræði og kúra. Í þáttunum er ferns konar mataræði prófað á fjórum pörum og fylgst með því hvaða áhrif mataræðið hefur á líkamlega heilsu þeirra.

Íslensk heimildarþáttaröð í fimm þáttum um skipulag og uppbyggingu fimm bæja vítt og breitt um landið. Bæirnir Ísafjörður, Akureyri, Seyðisfjörður, Vestmannaeyjar og Hafnarfjörður eru heimsóttir og stiklað á stóru um sögu þeirra. Umsjón: Egill Helgason og Pétur Ármannsson. Dagskrárgerð: Ragnheiður Thorsteinsson.

Nokkrar hugrakkar manneskjur lesa upp úr dagbókum sínum frá unglingsárunum og deila með okkur dýpstu leyndarmálum ungdómsins, þegar allt er upp á líf og dauða og bóla á enninu er alvarlegri en efnahagshrun.

Þættir frá 2016 þar sem litið er um öxl yfir 50 ára sögu sjónvarps og fróðleg og skemmtileg augnablik rifjuð upp með myndefni úr Gullkistunni. Kynnir er Jóhanna Vigdís Hjaltadóttir. Dagskrárgerð: Egill Eðvarðsson.

Valin myndskeið úr Landanum þar sem áhugaverðir staðir eru skoðaðir og merkilegir Íslendingar heimsóttir. Dagskrárgerð: Gísli Einarsson og Karl Sigtryggsson.

"Ég var bara á rölti úti í Prag þegar var hringt í mig, þá var það Rás 2 og þáttastjórnandi spyr mig hvað mér finnist um að mér hafi verið stolið. Stolið? sagði ég, og skildi ekkert hvað maðurinn var að fara," segir Þórir Steingrímsson fyrrverandi lögregluþjónn og leikari. Það var samt ekki Þóri sjálfum sem var stolið heldur eftirmynd af honum í fullri stærð. Þórir var nefnilega fyrirsætan þegar svokallaðar "pappalöggur" voru settar upp við Reykjanesbrautina árið 2000. Pappalöggurnar, sem reyndar voru úr krossviði, áttu að auka sýnileika lögreglunnar og minna fólk á hámarkshraða á Reykjanesbrautinni sem enn var einbreið á þessum tíma. "Svo kem ég heim, seint um kvöld, og við keyrum eftir Reykjanesbrautinni og sjáum pappalöggu á staur. Við ákáðum að stoppa og konan tekur ljósmynd af mér og eftirmyndinni en þá koma tveir lögreglubílar á fleygiferð með blikkandi ljósum. Þá héldum menn að þarna væri kominn enn einn pappalögguþjófurinn," segir Þórir og skellihlær.

Færeyskir þættir þar sem Elin á Rógví hittir krakka og ræðir við þau um margvísleg málefni eins og hvernig er að eiga átta systkini eða hvernig er að missa foreldri.

Kristín og Arnór kynnast dularfullri stelpu sem grunar sögukennarann um eitthvað skuggalegt. Hvað ætli sé í gangi hjá honum Sigurjóni sögukennara?

Leikarar: Kristín Erla Pétursdóttir, Arnór Orri Atlason, Arnþrúður Karen Viktorsdóttir, Agnes Wild og Karl Pálsson

Dagskrárgerð: Eva Rún Þorgeirsdóttir og Elvar Egilsson

Arnór og Kristín eru búin að flækjast inn í njósnaleik Addúar, sem er sannfærð um að sögukennarinn sinn sé galdrakarl. Þegar Addú klifrar inn um gluggann á íbúð kennarans, elta Arnór og Kristín hana, og þar inni er heldur betur drungalegt um að litast.

Íslensk tónlistarmyndbönd.

Helstu fréttir dagsins af innlendum og erlendum vettvangi. Alla daga, árið um kring.

Íþróttafréttir.

Veðurfréttir.

Bíómynd frá 1995 byggð á sögu Friðriks Erlingssonar sem hlaut íslensku barnabókaverðlaunin 1992. Í henni segir frá nokkrum vinum í litlu hverfi. Um tíma er lífið eitt óslitið ævintýri en svo koma brestir í vináttuna, ævintýrinu lýkur skyndilega og kaldur raunveruleikinn tekur við. Leikstjóri: Gísli Snær Erlingsson. Aðalhlutverk: Sturla Sighvatsson, Gunnar Atli Cauthery og Sigfús Sturluson.

Upptaka frá tónleikum Laufeyjar og Sinfóníuhljómsveitar Íslands í Eldborg í Hörpu í október 2022. Á efnisskrá tónleikanna eru lög Laufeyjar sjálfrar og íslenskar og erlendar jazzperlur. Hljómsveitarstjóri: Hugh Brunt.

Íslensk kvikmynd frá 2022. Unglingsstrákur í Reykjavík, alinn upp af móður með skyggnigáfu, tekur þolanda eineltis undir sinn verndarvæng og inn í vinahóp slagsmálahunda. Þegar vandræði strákanna stigmagnast í lífshættulega atburði fer Addi að fá skynjanir. Á nýfundið innsæi eftir að beina honum á betri braut eða lengra inn í heim ofbeldis? Leikstjóri: Guðmundur Arnar Guðmundsson. Aðalhlutverk: Birgir Dagur Bjarkason, Áskell Einar Pálmason, Viktor Benóný Benediktsson og Snorri Rafn Frímannsson. Myndin er ekki við hæfi barna yngri en 14 ára.

Ævisöguleg kvikmynd frá 2016 með Natalie Portman í aðalhlutverki. Myndin fjallar um forsetafrúna Jackie Kennedy og eftirmála morðsins á John F. Kennedy Bandaríkjaforseta út frá hennar sjónarhorni. Myndin var tilnefnd til þrennra Óskarsverðlauna. Leikstjóri: Pablo Larraín. Atriði í myndinni eru ekki við hæfi barna.