![Helmingi dekkra en nóttin](/spilari/DarkGray_image.png)
Helmingi dekkra en nóttin
Vera Sölvadóttir fjallar um skáldið og listakonuna Ástu Sigurðardóttur. Fluttir verða tveir þættir um líf listakonunnar og ótímabæran dauða hennar. Ásta Sigurðardóttir vakti mikla athygli á sjötta áratug síðustu aldar og hefur nafn hennar haldist á lofti allar götur síðan. Það voru ekki einungis verk Ástu sem vöktu athygli fólks heldur persónan og náttúrubarnið Ásta sjálf.
Ásta sýndi einstaka listræna hæfileika bæði á sviði rit- og myndlistar. Sögur hennar og myndir bera vott um tilfinningaríka og hreinskipta listakonu, sem á ögrandi hátt storkaði viðteknu siðgæði í smábænum Reykjavík um miðja 20. öld. Auk þess var Ásta oft kölluð Ásta módel og varð vinsælt umræðuefni bæjarbúa þar sem hún hafði að atvinnu að sitja fyrir nakin fyrir myndlistarnema. Ásta Sigurðardóttir andaðist í Reykjavík, langt fyrir aldur fram, þann 21. desember árið 1971, aðeins 41 árs að aldri.