Við fáum til okkar sagnfræðinginn Önnu Dröfn Ágústsdóttur sem hefur kafað ofan í líf, sögu og verk Óla K., fyrsta fastráðna blaðaljósmyndarans á Íslandi.
Við rýnum í nýkynntar niðurstöður Íslensku æskulýðsrannsóknarinnar. Ragný Þóra Guðjohnsen, dósent á Menntavísindasviði Háskóla Íslands og faglegur stjórnandi Íslensku æskulýðsrannsóknarinnar kemur til okkar.
Við höldum síðan áfram að ræða vendingar í þýskum stjórnmálum en ríkisstjórnin þar í landi sprakk í síðustu viku, mikið gengur á og líklegt er að kosið verði í febrúar. Við ræðum við Eirík Ásþór Ragnarsson, hagfræðing sem er búsettur í Þýskalandi.
Brynjólfur Gauti Guðrúnar Jónsson, doktorsnemi í tölfræði við Háskóla Íslands, og Hafsteinn Einarsson, nýdoktor í stjórnmálafræði, koma til okkar í lok þáttar en þeir halda úti síðunni Metill.is þar sem birt er kosningalíkan sem spáir fyrir um úrslit kosninganna á annan hátt en gert hefur verið.
Við höldum síðan áfram að ræða við frambjóðendur þeirra flokka sem bjóða fram til Alþingis, í þetta skiptið Höllu Hrund Logadóttur, oddvita Framsóknarflokksins í Suðurkjördæmi og Ásthildi Lóu Þórsdóttur, oddvita Flokks fólksins, í sama kjördæmi.
