Bændur segja að staða þeirra sé ákaflega erfið eftir vaxtahækkanir síðustu tveggja ára. Greinin sé mjög skuldsett og erfitt að sjá hvernig komast eigi úr þessari stöðu nema með ríflegri hækkun í búvörusamningum. Rætt var við tvo bændur í Eyjafirði í þættinum. Einnig var rætt við Vigdísi Häsler, framkvæmdastjóra Bændasamtaka Íslands, um framtíð greinarinnar, samninga við stjórnvöld og nýliðun sem er mjög erfið.

Leiksýningin Með Guð í vasanum var frumsýnd í Borgarleikhúsinu um helgina. Verkið er eftir Maríu Reyndal sem jafnframt leikstýrir og er sjálfstætt framhald sýningarinnar Er ég mamma mín? sem naut mikilla vinsælda og gekk í þrjú leikár.