Ný rannsókn á kulnun á vegum VIRK sýnir að einungis brot af þeim sem telja sig óvinnufær vegna kulnunar eru í raun með einkenni kulnunar samkvæmt nýuppfærðum skilgreiningum Alþjóðaheilbrigðisstofnunarinnar, WHO. Hvers vegna lýsa mun fleiri einkennum kulnunar en reynast uppfylla skilyrði greiningar - þegar einkennin geta átt við geðraskanir á borð við þunglyndi eða kvíða? Gestir Kastljóss eru Guðrún Rakel Eiríksdóttir og Berglind Stefánsdóttir sálfræðingar og verkefnastjórar hjá VIRK starfsendurhæfingarsjóði.

Talsverð umræða hefur verið í samfélaginu um meðferð sjúklinga við lífslok í kjölfar frétta af lækni á Heilbrigðisstofnun Suðurnesja sem sætir nú lögreglurannsókn vegna gruns um að hafa sett sjúklinga sína í tilefnislausar lífslokameðferðir. En hvenær er lífslokameðferð beitt og við hvaða kringumstæður og hvað felst í henni? Við ræddum við Maríu Fjólu Harðardóttur, hjúkrunarfræðing pg framkvæmdastjóra heilbrigðissviðs Hrafnistu, og Ólaf Helga Samúelsson, öldrunarlækni og framkvæmdastjóra lækninga hjá Eir hjúkrunarheimilum.

Matthildur Halldórsdóttir fatahönnuður býr í Lima í Perú, þar sem hún hannar föt úr perúskri alpaca-ull. Hönnun hennar er seld víða um heim, en þar sameinast japönsk, suðuramerísk og íslensk áhrif. Guðrún Sóley hitti Matthildi í stuttri Íslandsheimsókn.