Mikið af sprungum í jörðinni

Mynd: Ómar Ragnarsson.


  • Prenta
  • Senda frétt

Lára Ómarsdóttir, fréttamaður RÚV, flaug yfir gosstöðvarnar í dag ásamt föður sínum, Ómari Ragnarssyni og myndaði sprungurnar sem hafa myndast. Hún segir að mikið sé af sprungum í jörðinni - sprungusvæðið nái frá Dyngjujökli og að gosprungunni sjálfri.

Lára segir að sumstaðar sé eins og landið hafi bara pompað niður og sumsstaðar sé verulega mikið fall á jörðinni. Þegar hún flaug yfir var gosið sjálft enn í fullu fjöri.

Jarðeðlisfræðingur á Veðurstofunni sagði í samtali við fréttastofu fyrr í kvöld að enn sé óljóst hver uppruni  óróans, sem mældist skömmu eftir hádegi, sé.

Allt bendi til þess að hann komi úr berggrunninum undir norðanverðum Dyngjujökli eða nálægt jaðri jökulsins. Engin merki hafa sést um gos undir jökli, en möguleg skýring á óróanum er að grunnvatn hafi komist í snertingu við kviku í gegnum djúpar sprungur í berginu.

Nokkuð hefur dregið úr skjálftavirkni á svæðinu miðað við síðustu daga; frá miðnætti hafa nú mælst um 400 skjálftar, flestir í tengslum við kvikuganginn sem liggur undir Dyngjujökli. Meiri kvika streymir inn í kvikuganginn en kemst út úr honum og vísindamenn hafa áhyggjur af því að gossprungan rifni upp í jökul.

Ertu með athugasemd vegna fréttarinnar? Sendu á frettir@ruv.is

Tilkynna um bilaða upptöku