HB Grandi segir 86 upp á Akranesi

11.05.2017 - 15:38
Mynd með færslu
 Mynd: Jóhann Bjarni Kolbeinsson  -  RÚV
Öllum starfsmönnum í botnfiskvinnslu HB Granda á Akranesi verður sagt upp frá og með 1. september og starfsemin flutt til Reykjavíkur. Stefnt er að því að bjóða fólki önnur störf hjá fyrirtækinu. Í fréttatilkynningu á vef HB Granda segir að þrátt fyrir viðræður við Akranesbæ um hugsanlegar aðgerðir til að halda í botnfiskvinnsluna í bænum hafi niðurstaðan verið sú að fyrirtækið standi við áform sín um að flytja hana til Reykjavíkur. 86 fá uppsagnarbréf um næstu mánaðamót.

Í fréttatilkynningunni segir að öllum þeim sem verður sagt upp bjóðist að sækja um önnur störf hjá fyrirtækinu og að vonir standist til að hægt verði að bjóða öllum sem þess óska störf við hæfi. Þar segir jafnframt að efla eigi aðra starfsemi HB Granda á Akranesi.

 

Tryggvi Aðalbjörnsson fréttamaður er á Akranesi. Hann segir að það sé mjög neikvætt hljóð í starfsmönnum. Sumir starfsmenn ruku út af fundi þegar Vilhjálmur Vilhjálmsson, forstjóri HB Granda, hafði lesið upp fréttatilkynningu á starfsmannafundinum.

Starfsmönnum sem Tryggvi ræddi við leist mörgum illa á að flest starfanna sem þeim stæði til boða að sækja um væru í Reykjavík. Þar með myndi vinnudagur fólk lengjast sem næmi ferðalaginu milli Reykjavíkur og Akraness.

 

Eftirfarandi fréttatilkynning birtist á vef HB Granda um klukkan hálf fjögur:

Á fundi trúnaðarmanna HB Granda og forsvarsmanna HB Granda á Akranesi 11. maí 2017, var farið yfir áform um að leggja af fiskvinnslu í botnfiskvinnslu sinni á Akranesi. Að höfðu samráði við fulltrúa starfsmanna og stéttarfélaga hafa staðið yfir viðræður við Akraneskaupstað og einnig hafa fengist upplýsingar frá Faxaflóahöfnum og Reykjavíkurborg. Viðræðurnar hafa nýst vel til gagnkvæmra upplýsinga og munu gagnast aðilum til framtíðar.

Niðurstaða viðræðna hefur þó ekki breytt þeim áformum HB Granda að sameina botnfiskvinnslu félagsins á Akranesi við botnfiskvinnslu félagsins í Reykjavík þann 1. september næstkomandi.

Hjá HB Granda og dótturfélögum á Akranesi starfa 270 manns, þar af vinna 86 við botnfiskvinnsluna sem fá uppsagnarbréf fyrir næstu mánaðamót. Samtímis og jafnframt verður starfsfólki boðið að sækja um önnur störf hjá HB Granda og dótturfélögum í Reykjavík og á Akranesi. Vonir standa til að hægt verði að bjóða öllu starfsfólki sem þess óskar starf við hæfi.

Starfsfólk sem ekki fær vinnu við hæfi býðst aðstoð við atvinnuleit á vegum HB Granda. HB Grandi mun hafa samráð við trúnaðarmenn og stéttarfélög þeirra.

HB Grandi rekur eftir sem áður uppsjávarvinnslu, fiskimjölsverksmiðju og dótturfélögin Norðanfisk og Vignir G. Jónsson á Akranesi. Félagið mun leggja kraft í að efla þessar rekstrareiningar og fullvinnslu sjávarafurða á Akranesi.

Forráðamenn Akraneskaupstaðar og HB Granda munu halda áfram viðræðum um að standa að frekari uppbyggingu atvinnulífs á Akranesi. Einn liður í því er að fulltrúar Akraneskaupstaðar í Faxaflóahöfnum beiti sér fyrir því að ráðist verði í nauðsynlegar viðhaldsaðgerðir á Akraneshöfn. 

Uppfært klukkan 16:04.

Brynjólfur Þór Guðmundsson
Fréttastofa RÚV