Maður tók á rás þegar hann varð var við lögreglu við almennt eftirlit í Reykjavík í gær. Lögregla veitti því athygli og hóf eftirför. Eftir stutta en snarpa eftirför, að því er kemur fram í dagbók lögreglu, náðist maðurinn og reyndist hann með talsvert magn fíkniefna innanklæða. Þá er hann grunaður um ólöglega dvöl í landinu.

Grunaður vasaþjófur handtekinn

Í dagbók lögreglu kemur einnig fram að tilkynnt hafi verið um þrjá aðila í miðbænum grunaða um vasaþjófnað. Lögregla fann einn þeirra og reyndist hann með nokkuð magn af ætluðu þýfi og fjármunum.

Þá var tilkynnt um ógnandi aðila í miðbænum. Hann hafði m.a. kastað glasi í rúðu á skemmtistað.

Í dag verður fremur hæg breytileg átt á landinu, en norðvestan 8-13 m/s á Austfjörðum fram eftir degi. Yfirleitt bjart, en skýjað og stöku smáél norðaustantil en léttir í kvöld. Hiti 3 til 9 stig
yfir hádaginn, en nálægt frostmarki norðaustantil.

Á morgun verður áfram hægviðri og bjart en skýjað með köflum og sums staðar lítils háttar væta við suðvestur- og vesturströndina. Hlýnar heldur.

Austanátt á páskadag, strekkingur syðst á landinu, en annars hægari. Bjart með köflum og sums staðar lítils háttar væta við ströndina. Hiti breytist lítið.

Fjórir eru látnir eftir að kláfferja féll til jarðar skammt suður af ítölsku borginni Napolí í dag. Einn til viðbótar er alvarlega slasaður. Að sögn ítalskra fjölmiðla slitnaði kapallinn sem hélt kláfnum uppi.

Kláfurinn lá í gegnum dal frá bænum Castellammare di Stabia, um þriggja kílómetra leið upp fjallið Faito. Fyrr í dag tókst að koma fólki úr öðrum kláfferjum, sem höfðu stöðvast neðar í dalnum, til bjargar.

Tólf mannúðarsamtök skora á ísraelsk stjórnvöld að gera þeim kleift að sinna mannúðarstarfi á Gaza. Samtökin segja algjört hrun blasa við hjálparstarfi síðan Ísraelar lokuðu fyrir flutning hjálpargagna til Gaza annan mars.

Talsmenn samtakanna segja í yfirlýsingu að ástandið á Gaza sé einn versti mannúðarbrestur samtímans.

Stjórnvöld í Ísrael hafa hafa heitið að hindra allan flutning hjálpargagna til Gaza þar til öllum gíslum í haldi Hamas hafi verið sleppt.

Samtökin segja í yfirlýsingunni að allir íbúar Gaza treysti á mannúðaraðstoð til að lifa af.

Bandaríkjastjórn hótar Harvard-háskóla að honum verði bannað að innrita erlenda nemendur fari skólinn ekki að kröfum yfirvalda. Þetta kemur fram í tilkynningu heimavarnaráðuneytis Bandaríkjanna.

Donald Trump Bandaríkjaforseti hefur hótað að taka háskólann af fjárlögum verði ýmsar kröfur ekki uppfylltar, til dæmis að hvers kyns stefna um fjölbreytileika verði aflögð. Þá vill Trump vísa nemendum frá sem skipulögðu mótmæli til stuðnings Palestínu.

Stjórn skólans ætlar ekki að verða við kröfum Trumps.

Ísraelsher gerði í nótt árásir á tjaldbúðir í Khan Younis á Gaza og drap tíu manns, hið minnsta, og særði sjö. Fólkið sem herinn drap tilheyrði allt sömu fjölskyldunni.

Nær allir íbúar Gaza hafa hrakist á flótta undan árásum hersins og margir þeirra hafast við í tjöldum eða neyðarskýlum. Eldur braust út við árásirnar og eru hin særðu með alvarleg brunasár og þurfa því mikla heilbrigðisþjónustu sem er mjög skert á Gaza.

Mannréttindasamtök hafa ítrekað fordæmt árásir Ísraelshers á tjöld fólks á flótta og sagt slíkar árásir brot á alþjóðalögum.

Búast má við norðan kalda eða stinningskalda í dag. Á Austfjörðum verður allhvöss norðvestanátt fram eftir degi. Áfram verður dálítið éljaloft norðan- og austanlands. Hiti þar verður í kringum frostmark en í kvöld bætir heldur í ofankomu um tíma. Yfirleitt verður bjart sunnan heiða og hiti á landinu allt að sex stig.

Á morgun er útlit fyrir breytilega vindátt sem nær 3 til 8 metrum á sekúndu. Áfram norðvestan strekkingur á suðaustanverðu landinu. Bjart í flestum landshlutum, en áfram stöku él eða skúrir. Hiti breytist lítið.

Yfir páskahelgina verður yfirleitt hægur vindur og bjart með köflum. Þó rakara loft og skýjað veður við strendur.

Lögreglan á höfuðborgarsvæðinu handtók í nótt mann sem „gekk berserksgang“ í íbúð í fjölbýli. Samkvæmt tilkynningu frá lögreglunni var maðurinn afar ör og óútreiknanlegur. Var hann því handtekinn og vistaður í klefa. Í íbúðinni fundust talsverð ummerki um fíkniefnaneyslu og skemmdarverk.

Ýmis önnur mál komu til kasta lögreglu í nótt, meðal annars mál konu sem föst var inni á salerni skemmtistaðar. Lögregla braut upp hurðina með leyfi eiganda staðarins og ku konan hafa verið frelsinu fegin.

Fyrrverandi héraðsstjóri Kúrsk í Rússlandi og staðgengill hans hafa verið handteknir grunaðir um að hafa dregið sér fé sem ætlað var í varnaruppbyggingu á landamærunum að Úkraínu.

Úkraínski herinn réðst inn í Kúrsk í ágúst í fyrra og var innrásin sú umfangsmesta sem Rússar hafa orðið fyrir síðan í síðari heimsstyrjöld.

Alexei Smirnov og Alexei Dedov voru héraðsstjóri og varahéraðsstjóri Kúrsk þegar innrásin var gerð. Þeir hlutu mikla gagnrýni fyrir viðbrögð við innrás úkraínska hersins og voru settir úr embætti í desember.

Síðustu úkraínsku hermennirnir hörfuðu frá Kúrsk í síðasta mánuði.

Dómsmálaráðherra hefur undirritað samkomulag um áframhaldandi leigu á þremur þyrlum fyrir Landhelgisgæsluna til næstu sjö ára. Þyrlurnar eru allar af gerðinni Airbus Super Puma H225 og komu í flota Gæslunnar á árunum 2019-2021. Kostnaður við leiguna er um 56 milljónir evra, rúmir átta milljarðar króna, fyrir árin sjö – sem nemur um 1.160 milljónum króna á ári.

„Þessi samningur endurspeglar áherslu ríkisstjórnarinnar í öryggismálum. Síðasta ár var metár í útköllum, þar af var helmingur þeirra vegna sjúkraflutninga. Við þurfum að tryggja öryggi fólksins í landinu,“ er haft eftir Þorbjörgu Sigríði Gunnlaugsdóttur dómsmálaráðherra í tilkynningu.

Israel Katz varnarmálaráðherra Ísraels segir að stjórn landsins ætli áfram að koma í veg fyrir að hjálpargögn berist til Gaza. Hann segir stefnu Ísraelsstjórnar skýra, engin mannúðaraðstoð berist til Gaza, til þess að koma í veg fyrir að Hamas geti notað hana til að fá íbúa Gaza til liðs við sig.

Ísraelsstjórn hefur komið í veg fyrir að hjálpargögn berist til Gaza síðan 2. mars, eftir að fyrsti hluti vopnahléssáttmála Hamas og Ísraelsstjórnar rann út. Hamas-samtökin sögðu í gær að nýju tilboði Ísraelsmanna um vopnahlé yrði svarað á morgun.

Kauphallarsjóðurinn GlacierShares Nasdaq Iceland ETF hefur verið skráður á bandaríska Nasdaq-markaðinn. Þetta kemur fram í tilkynningu frá sjóðnum. Þar segir að þetta sé fyrsti kauphallarsjóðurinn sem sé skráður erlendis, sem fjárfesti í íslenskum hlutabréfum.

Helgi Frímannsson, fjárfestingaráðgjafi hjá GlacierShares, segir að með skráningu sjóðsins sé verið að koma íslenskum félögum á framfæri á stærsta og virkasta hlutabréfamarkaði heims.

„Það er virkilega spennandi að fjárfestar á bandaríska markaðnum geti nú í fyrsta sinn fjárfest í kauphallarsjóði sem fjárfestir á íslenska markaðnum,“ segir Magnús Harðarson, forstjóri Kauphallarinnar.

Björgunarsveitir leituðu að einstaklingi í Seljahverfi í Reykjavík í kvöld. Leitin hófst upp úr klukkan níu en einstaklingurinn kom fram rétt eftir klukkan tíu. Leit er því hætt.

Jón Þór Víglundsson, upplýsingafulltrúi hjá Landsbjörg, segir yfir hundrað manns hafa komið að leitinni. Björgunarsveitarfólk notaði hunda og dróna við leitina.

Árásir voru gerðar í nokkrum fangelsum í Frakklandi í nótt og í morgun. Þetta staðfesti Gérald Darmain dómsmálaráðherra Frakklands í færslu á X. Hann sagði að árásirnar hefðu beinst að því að hræða starfsmenn fangelsanna og í þeim hefði bæði verið kveikt í bílum og hleypt af skotvopnum.

Árásir áttu sér stað í fangelsum á minnst fimm stöðum í Frakklandi, auk þess sem kveikt var í bíl sem lagt var við hús dómara í Marseille.

Darmain gaf í skyn í færslunni að árásirnar tengdust baráttu gegn fíkniefnasmygli. Hann ætlar að heimsækja eitt fangelsanna, í Toulon, í dag til að styðja fangelsisyfirvöld þar.

Stór aðgerð tyrknesku lögreglunnar gegn skipulagðri glæpastarfsemi í morgun leiddi til þess að 234 voru handteknir. Níu þeirra voru teknir erlendis.

Þeir handteknu eru grunaðir um fíkniefnasmygl til Evrópu og peningaþvætti. 21 tonn af fíkniefnum var gert upptækt í aðgerðunum. Að sögn Ali Yerlikaya innanríkisráðherra Tyrklands skipulögðu glæpasamtökin smygl á kókaíni frá Suður-Ameríku, heróíni frá Íran og Afganistan og kannabisefnum gegnum Balkanlöndin.

Norðaustlæg átt verður á landinu í dag og víða á bilinu 8 til 15 metrar á sekúndu. Snjókoma eða slydda með köflum á Norður- og Austurlandi. Dregur úr ofankomu norðvestanlands með morgninum. Þó má búast við einhverjum éljum þar í dag.

Þurrt að mestu sunnan heiða.

Hitastig verður frá frostmarki norðaustantil upp í 9 stig við suðurströndina.

Á morgun verður svipað veður og snjókomubakki gengur inn yfir Austurland. Þar má bússt við talsverðri ofankomu fram eftir degi. Norðan kaldi eða strekkingur á fimmtudaginn og él um landið norðanvert. Á föstudag og laugardag er gert ráð fyrir hæglætisveðri um mestallt landið.

Tveir menn voru skotnir til bana í Gautaborg í Svíþjóð í nótt. Frá þessu greinir sænska ríkissjónvarpið, SVT. Á vef þess segir að enginn hafi verið handtekinn og ekkert sé vitað um tilefni árásarinnar.

Lögregla hafi verið kölluð til eftir að tilkynnt var um byssuskot. Mennirnir hafi fundist særðir á vettvangi og fluttir á sjúkrahús, þar sem þeir létust. Annar þeirra var tvítugur og hinn 25 ára.

Lögreglan sagði engan liggja undir grun. Rannsókn héldi áfram í dag og óskað væri eftir því að fólk hefði samband, byggi það yfir upplýsingum sem gætu komið að gagni við rannsóknina.

Nemendur hins gjaldþrota Kvikmyndaskóla Íslands ætla ekki að þiggja boð um að halda námi sínu áfram við Tækniskólann, líkt og menntamálaráðherra hafði boðið þeim að gera. Fulltrúar nemenda sátu fund með stjórnendum Tækniskólans í dag þar sem tillögur um framhald námsins voru kynntar.

Að mati nemenda voru tillögurnar óljósar, illa ígrundaðar og uppfylltu ekki eðlilegar kröfur nemenda. Af þeim sökum hafna nemendur Kvikmyndaskólans tillögunum og fara þeir fram á viðræður við menntamálaráðherra um lausn þeirra mála.

Jarðskjálfti af stærðinni 5,2 reið yfir suðurhluta Kaliforníu klukkan tíu í morgun. Skjálftinn varð norðaustur af San Diego, um fjóra kílómetra suður af bænum Julian, og mældist á tæplega 13 kílómetra dýpi.

Í yfirlýsingu á samfélagsmiðlinum X sagði Gavin Newsom ríkisstjóri Kaliforníu að verið væri að meta skemmdir í kjölfar skjálftans. Fréttir hafa ekki borist af slysum á fólki né miklu tjóni vegna skjálftans. Íbúar í suðurhluta Kaliforníu fengu skilaboð um að leita skjóls í kjölfar skjálftans en Veðurstofa Bandaríkjanna reiknaði ekki með flóðbylgju vegna hans.

Nayib Bukele, forseti El Salvador, sagðist ekki ætla að senda mann aftur til Bandaríkjanna, sem var vísað þaðan fyrir mistök. Þetta sagði hann á fundi með Donald Trump Bandaríkjaforseta í Hvíta húsinu í dag. Maðurinn, sem heitir Kilmar Abrego Garcia, var sendur úr landi í ofurfangelsi í El Salvador fyrr í þessum mánuði, þrátt fyrir að hafa hlotið vernd gegn brottvísun frá Bandaríkjunum 2019. Bukele sagðist ekki hafa heimild til að senda García aftur til Bandaríkjanna. Hæstiréttur Bandaríkjanna hefur skipað Bandaríkjastjórn að liðka fyrir komu García aftur til landsins þar sem honum var vísað úr landi án tilhlýðilegrar málsmeðferðar.

Framkvæmdir við nýjan leikskóla við Skólatröð í Kópavogi eru að hefjast. Áætlað er að leikskólinn verði tekinn í notkun haustið 2027.

Í leikskólanum verða þrjár deildir fyrir nemendur á aldrinum 2-6 ára og miðað er við að fjöldi barna verði um 60 mestan hluta dagsins, að því er segir í tilkynningu frá Kópavogsbæ. Gert er ráð fyrir 15-20 stöðugildum í leikskólanum.

Í deiliskipulaginu er gert ráð fyrir að á lóðinni verði byggður þriggja deilda leikskóli á einni hæð. Áður stóð til að byggja leikskóla á tveimur hæðum með fjórum deildum en nágrannar lýstu þungum áhyggjum í umsögn um leikskólann, en þeir óttuðust að byggingin yrði yfirþyrmandi.