Átta ára stúlka varð annað barnið til að deyja af völdum mislingafaraldurs í Vestur-Texas. Nærri 500 tilfelli mislinga hafa verið staðfest í Texas síðan faraldurinn hófst í ársbyrjun, 54 til viðbótar í Nýju-Mexíkó og tíu í Oklahoma.

Ef útbreiðslan heldur áfram á þessum hraða gætu Bandaríkin farið af lista yfir þau lönd þar sem mislingafaraldur hefur verið stöðvaður.

Viðbrögð heilbrigðisráðherrans Robert F. Kennedy yngri hafa verið gagnrýnd. Læknar í Texas segja áherslu Kennedys á aðrar lækningaaðferðir hafa valdið því að fólk leiti oft seint til læknis eða innbyrði hættulegt magn A-vítamíns.

Lögreglan í Rheinland-Pfalz í Þýskalandi leitar að manni sem er grunaður um að hafa orðið þremur að bana í heimahúsi í bænum Weiteweld. Þýska dagblaðið Bild fullyrðir að hin látnu séu par og 16 ára sonur þeirra.

Samkvæmt lögreglunni hringdi kona í neyðarlínuna rétt fyrir klukkan fjögur í nótt og greindi frá grófu ofbeldi. Lögregla útilokar ekki að konan sem hringdi sé ein hinna látnu. Vísbendingar eru um að bæði skot- og eggvopnum hafi verið beitt. Leit lögreglunnar beinist að einstaklingi sem sást yfirgefa húsið nánast um leið og lögregla kom á staðinn.

Um 2.000 búa í Weitefeld. Lögregla segir engan grun um að aðrir séu í hættu.

Stjórnvöld bæði í Taívan og Simbabve hafa ákveðið að afnema tolla á innflutning frá Bandaríkjunum. Donald Trump Bandaríkjaforseti tilkynnti í liðinni viku að hann ætlaði að leggja 18 prósenta toll á innflutning frá Simbabve og 32 prósenta toll á innflutning frá Taívan.

Lai Ching-te forseti Taívans lofaði jafnframt auknum fjárfestingum taívanskra fyrirtækja í Bandaríkjunum.

Simbabve er auðugt af jarðefnaauðlindum. Ríkið flytur talsvert af tókaki og sykri til Bandaríkjanna.

Kevin Hassett, einn efnahagsráðgjafa Bandaríkjastjórnar, segir fleiri en fimmtíu ríki hafa sett sig í samband við Bandaríkjastjórn til að hefja viðræður.

Kynferðisbrotadeild lögreglunnar hefur til rannsóknar meinta hópnauðgun í Reykjavík fyrir um tveimur vikum. Þrír voru handteknir í tengslum við rannsókn málsins og úrskurðaðir í gæsluvarðhald. Þeir sátu í haldi lögreglu í fimm daga. Bylgja Hrönn Baldursdóttir, aðstoðaryfirlögregluþjónn, segir rannsókn miða vel. Hún segir rannsóknir á hópnauðgunum ekki algengar en mál sem þessi komi á borð kynferðisbrotadeildar endrum og sinnum. Lögreglan veitir ekki frekari upplýsingar um málið að svo stöddu.

Landris og jarðskjálftavirkni heldur áfram á Reykjanesskaga, en síðasta sólahring hafa um 550 jarðskjálftar mælst á Reykjanesskaga og Reykjaneshrygg. Fjórir stærstu skjálftarnir voru við Kleifarvatn og á Reykjanestá og voru um 3 að stærð.

GPS-mælingar sýna nokkuð greinileg merki um að landris sé hafið undir Svartsengi. Að sögn Veðurstofu Íslands er erfitt að meta hraða kvikusöfnunar að svo stöddu og mögulega þarf að bíða í nokkra daga til að meta frekari þróun kvikusöfnunar.

Á myndinni eru yfirfarnir jarðskjálftar frá því að eldgosið hófst 1. apríl til dagsins í dag. Á þeim tíma hafa yfir sjö þúsund skjálftar mælst á Reykjanesskaga.

Mynd sem var tekin fyrir umfjöllun aukablaðs norska dagblaðsins Aftenposten árið 2015 prýðir nýjasta plötuumslag bandaríska tónlistarmannsins Kanye West, WW3. Myndin er tekin af Peter van Agtmael og var notuð í forsíðuumfjöllun blaðsins um Ku Klux Klan-hreyfinguna í Tennessee í Bandaríkjunum.

Greinarhöfundurinn Vegard Tenold Aase segir þetta það ruglaðasta sem hann hafi orðið vitni að. „Og nei, Ye bað ekki um leyfi til að nota myndina. Alveg ruglað!“ skrifar Aase á Instagram.

Lögmaður Aftenposten segir líklegt að dagblaðið krefjist margra milljóna fyrir notkun myndarinnar.

Rússneski raðmorðinginn Alexander Pitsjúskin segist reiðubúinn að játa á sig 11 morð til viðbótar við þau 48 sem hann hefur verið dæmdur fyrir. Hann hlaut lífstíðardóm árið 2007.

Fórnarlömb Pitsjúskins voru flest heimilislaus, áfengissjúklingar og eldri borgarar í kringum Bitsevsky-garð í sunnanverðri Moskvu. Morðin framdi hann frá árinu 1992 til ársins 2006. Pitsjúskin hlaut viðurnefnið taflborðs-morðinginn, því hann vonaðist til þess að fylla alla 64 reiti taflborðs með smámynt fyrir hvert fórnarlamba sinna.

Hann kvaðst sjálfur hafa orðið 63 að bana þegar réttað var yfir honum, en saksóknarar ákærðu hann fyrir 48 morð og þrjár morðtilraunir.

Órói mældist á jarðhitasvæðinu við Torfajökul í um klukkutíma upp úr hádegi í dag. Erfitt reyndist að mæla nákvæma staðsetningu óróans þar sem engir jarðskjálftar mældust, en jarðskjálftavirkni hefur verið um 15 kílómetrum norðvestur af jöklinum síðustu daga. Þar er virkt háhitasvæði og er óróinn líklegast tengdur því að sögn Elísabetar Pálmadóttur, náttúruvársérfræðings á vakt hjá Veðurstofunni.

Hún segir ólíklegt að óróinn tengist kvikuhreyfingum. Þá myndu sjást breytingar í aflögun í landslaginu og líklega fylgdu þeim myndarlegar jarðskjálftahrinur.

Síðast gaus í Torfajökli 1477.

Áfram dregur úr jarðskjálftavirkni á Reykjanesskaga. Rúmlega 300 skjálftar hafa mælst þar síðasta sólahringinn. Enn mælast smáskjálftar við kvikuganginn á um fjögurra til sex kílómetra dýpi, flestir undir tveimur að stærð. Gikkskjálftar vegna spennubreytinga í kjölfar myndunar kvikugangsins fyrsta apríl halda einnig áfram við Reykjanestá og norðvestan við Kleifarvatn. Að sögn náttúruvár Veðurstofu Íslands má búast við áframhaldandi jarðskjálftum sem geta fundist í byggð á meðan svæðið er að jafna sig.

Vísbendingar eru um að landris og kvikusöfnun undir Svartsengi sé hafið á ný. Frekari mælingar næstu daga þarf til að meta hraða landrissins.

Mikill erill var hjá lögreglunni á höfuðborgarsvæðinu í nótt að því er fram kemur í dagbók lögreglu. Töluvert var um ölvun og óspektir, einn var handtekinn skólaus í í miðbæ Reykjavíkur en sá var á ferðinni með ísexi.

Annar var handtekinn eftir að hafa slegið mann í höfuðið með glerflösku á skemmtistað. Þá hafði lögregla afskipti af mönnum sem voru að selja fíkniefni.

Lögregla kölluð til vegna hóps ungmenna sem var að safnast saman á bifreiðastæði í efri byggðum á höfuðborgarsvæðinu. Þau voru ölvuð og var eitt þeirra með hafnaboltakylfu meðferðis.

Mild suðlæg átt verður yfir landinu í dag. Sunnan- og vestantil má búast við kalda eða strekkingi með súld og dálítilli rigningu á köflum en hægari vind og léttskýjuðu um landið norðaustanvert.

Hiti verður allt að 14 stig á Austurlandi í dag. Hitinn fer lækkandi eftir því sem litið er vestar á landakortið og nær allt niður í fimm stig. Veðrið verður svipað á morgun en á mánudag bætir heldur í úrkomuna á vesturhluta landsins.

Útlit er fyrir áframhaldandi sunnanáttir og hlýindi fram yfir miðja vikuna. Seinna í vikunni virðist sem suðvestanáttin verði ríkjandi með kólnandi veðri.

Slökkviliðið á höfuðborgarsvæðinu var kallað til Hafnarfjarðar um þrjúleytið í nótt þegar eldur kviknaði í sendiferðabíl. Slökkva tókst eldinn en altjón varð á bílnum og þónokkuð tjón á næsta bíl.

Í kringum klukkan fimm í morgun voru tveir dælubílar svo sendir á vettvang vegna elds sem kviknað hafði í bústað við Rauðavatn. Þegar sá fyrri kom á svæðið var bústaðurinn alelda og því var kallað eftir öðrum og tankbíl til aðstoðar. Um klukkutíma tók til að slökkva glæðurnar en var þá bústaðurinn ónýtur og þakið fallið.

Að minnsta kosti 59 manns hafa greinst með mislinga í Texas í Bandaríkjunum síðan á þriðjudag. Í heild hafa fleiri en 480 tilfelli verið staðfest á landsvísu, tvöfalt fleiri en allt síðasta ár. Flest smitin greindust í Gaines-sýslu, þar sem 315 hafa greinst með mislinga síðan í janúar.

Flest þeirra sem greindust höfðu ekki verið bólusett gegn mislingum. Yfirvöld hafa hrint af stað bólusetningarátaki til að bregðast við stöðunni.

Mislingar hafa einnig greinst í Nýja-Mexíkó, Kansas, Ohio og Oklahoma. Tvö andlát hafa verið rakin til útbreiðslu mislinga í Bandaríkjunum síðan í febrúar. Fólkið sem lést var ekki bólusett gegn mislingum.

Donald Trump Bandaríkjaforseti kvaðst í kvöld ætla að framlengja frest til sölu á samfélagsmiðlinum TikTok um 75 daga. Fyrri frestur átti að renna út á morgun og Trump sagði í vikunni að hann væri viss um að TikTok yrði selt fyrir helgi.

Bandaríkjaþing hefur samþykkt að banna miðilinn verði hann áfram í eigu kínverska fyrirtækisins ByteDance. Fyrirtækið hefur hins vegar engan áhuga á því. Upphaflegur frestur var til 20. janúar.

Trump sagði í kvöld að ríkisstjórn hans hefði unnið hörðum höndum að samningi til að bjarga TikTok og töluvert hefði áunnist. Hins vegar væri þörf á frekari vinnu til að tryggja að öll tilskilin leyfi yrðu undirrituð.

Fjórtan létust, þar af minnst þrjú börn, í skotflaugaárás Rússlandshers á Kryvyi Rig, heimaborg Volodymyr Zelenskys forseta Úkraínu í dag. Samkvæmt þarlendum yfirvöldum særðust um fimmtíu til viðbótar í árásinni. Útlit er fyrir að fleiri gætu fundist slasaðir. Zelensky segir árásina staðfestingu á að Rússar vilji ekki vopnahlé. „Allur heimurinn getur séð það,“ sagði Zelensky í færslu á Telegram.

Sams konar árás var gerð á borgina á miðvikudag, þá létust minnst fjórir og á annan tug slasaðist.

Víðáttumikil hæð milli Íslands og Færeyja og lægðardrag vestur við Grænland valda suðaustankalda eða strekkingi og smávætu suðvestanlands fram eftir degi. Annars staðar á landinu verða mun hægari vindar og víða léttskýjað.

Mjög hvössum vindstrengjum er spáð á norðanverðu Snæfellsnesi fram eftir degi og eru ökumenn hvattir til að fara gætilega þar.

Milt loft er yfir landinu og hitastig gæti náð allt að 13 gráðum þegar best lætur.

Um helgina er spáð sunnan- og suðaustanáttum með skýjuðu veðri og lítils háttar vætu sunnan- og suðvestantil. Annars staðar verður víða léttskýjað og hlýnar heldur í veðri.

Jarðskjálftavirkni á Reykjanesskaga hélt áfram í nótt þótt dregið hafi úr henni. Þetta kom fram í tilkynningu frá Veðurstofu.

Virknin dreifist nokkuð jafnt um kvikuganginn, frá Stóra Skógfelli í suðri og norður fyrir Keili. Skjálftarnir eru á nokkuð stöðugu fjögurra til sex kílóetra dýpi.

Hrina gikkskjálfta hófst um hálfsex í gær. Stærsti skjálftinn var 3,9 að stærð, rétt fyrir klukkan ellefu. Fimm skjálftar hafa mælst yfir þremur að stærð síðan hrinan hófst.

Kosningum til stúdentaráðs meðal nemenda Háskóla Íslands lauk í dag. Vaka, félag lýðræðissinnaðra stúdenta, jók við meirihluta sinn og vann tíu fulltrúa í stúdentaráði. Röskva, samtök félagshyggjufólks við Háskóla Íslands, missti einn fulltrúa og hlaut sjö.

„Við erum afar þakklát að hafa fengið áframhaldandi umboð til að leiða Stúdentaráð Háskóla Íslands.“ skrifaði Sæþór Már Hinriksson, formaður Vöku í tilkynningu til fjölmiðla. „Þessi sigur staðfestir það góða starf sem við höfum unnið síðastliðið ár. Það er augljóst að stúdentar treysti Vöku, við sjáum það í þeirri fylgisaukningu sem birtist nú.“

Heildarkjörsókn var 40,25%.

Öflugur skjálfti fannst vel á höfuðborgarsvæðinu rétt í þessu. Steinunn Helgadóttir náttúruvársérfræðingur segir stærð skjálftans ekki liggja fyrir að svo stöddu en að fyrstu tölur gefi til kynna að hann hafi verið um 4 á stærð.

Hún gerir ráð fyrir að skjálftinn sé af svipuðum slóðum og skjálftahrina sem reið yfir austur af Trölladyngju fyrr í dag. Líklegast sé um gikkskjálfta að ræða enda sé mikil spennulosun eftir gosið á þriðjudaginn.

Fréttastofu hafa borist ábendingar um að skjálftann hafi mátt greina í Vesturbæ, Hafnarfirði og Mosfellsbæ þar sem miklar drunur hafi einnig heyrst.

Mikill viðbúnaður var við Ægisíðu í kvöld vegna leitaraðgerða lögreglu. Ásgeir Erlendsson upplýsingafulltrúi Landhelgisgæslunnar staðfesti við fréttastofu að lögregla hefði óskað eftir aðstoð við leitarstörf og að þyrlusveit hefði verið kölluð út laust eftir klukkan 20 í kvöld. Hún hafi þó verið kölluð til baka núna fyrir skemmstu.

Björgunarsveitaraðilar tóku einnig þátt í aðgerðunum að sögn Jóns Þórs Víglundssonar, upplýsingafulltrúa Landsbjargar. Hann staðfestir að leitinni hafi lokið á tíunda tímanum.

Öflugir skjálftar fundust vel á höfuðborgarsvæðinu um sexleytið. Stærsti skjálftinn í hrinunni var 3,6 að stærð samkvæmt fyrsta mati. Þetta kemur fram í tilkynningu frá náttúruvárvakt Veðurstofunnar. Nokkrir skjálftar yfir þremur að stærð hafa mælst í hrinunni.

Upptökin voru austur af Trölladyngju, á milli Kleifarvatns og Trölladyngju. Skjálftarnir urðu ekki á kvikuganginum en eru líklega gikkskjálftar af völdum kvikugangsins. Mikið álag er á mælakerfi Veðurstofunnar.

Fréttin var uppfærð eftir að tilkynning barst frá Veðurstofunni.

Yfir þrjú þúsund hafa fundist látin í Mjanmar eftir jarðskjálftana á föstudag og hátt í fimm þúsund eru slösuð. Hundraða er enn saknað og gert er ráð fyrir að tala látinna muni hækka.

Hjálp hefur ekki enn borist til fjölda svæða sem vitað er að urðu illa úti í jarðskjálftunum. Fjöldi ríkja hefur sent hjálpar- og björgunarsveitir til Mjanmar en bágbornir innviðir og yfirstandandi borgarastyrjöld í landinu gera hjálparstarfi erfitt fyrir.

Tímabundið vopnahlé milli stríðandi fylkinga hófst á miðvikudag. Á þriðjudagskvöld skutu hermenn á bílalest kínverska Rauða krossins sem flutti hjálpargögn.

Marco Rubio, utanríkisráðherra Bandaríkjanna vill að öll aðildarríki NATO stefni að því að verja minnst 5 prósentum af þjóðarframleiðslu til varnarmála.

Rubio lét þessi orð falla í aðdraganda fundar utanríkisráðherra NATO-ríkjanna sem er að hefjast í höfuðstöðvum bandalagsins í Brussel.

„Við viljum ljúka þessum fundi með þann skilning að við séum á raunsærri leið til þess að hvert og eitt aðildarríki verji fimm prósentum [af þjóðarframleiðslu], einnig Bandaríkin, því ef ógnirnar eru eins raunverulegar og við teljum að þær séu, þá verðum við að hafa raunverulegra getu til að mæta þeim.“

Frá miðnætti hafa mælst um sex hundruð skjálftar í kvikuganginum á Reykjanesskaga. Skjálftarnir dreifast nokkuð jafnt frá Stóra Skógfelli og norður fyrir Keili.

Engin virkni hefur sést síðan gossprungan opnaðist norðan Grindavíkur 1. apríl en enn má greina glóð í nýja hrauninu og rýkur upp úr því á mörgum stöðum.

Í dag er spáð suðaustankalda og smá vætu vestantil á landinu en annars hægum vindi og bjartviðri. Það hlýnar í veðri og hiti verður fjögur til níu stig yfir daginn en víða næturfrost í nótt.

Um helgina mun hæð beina til okkar sunnan- og suðaustanátt með léttskýjuðu veðri á Norður- og Austurlandi. Sunnan- og vestantil verður skýjað og lítils háttar væta öðru hvoru.