Alls hafa 13.022 sett nafn sitt á undirskriftalista þar sem biðlað er til stjórnvalda að stöðva leyfisveitingu til sjókvíaeldis í Seyðisfirði. Undirskriftasöfnuninni lauk á miðnætti í nótt.

Matvælastofnun birti í desember tillögu að rekstrarleyfi til Kaldvíkur fyrir tíu þúsund tonna laxeldi í firðinum. Hópur Seyðfirðinga hefur barist gegn eldinu og meðal annars bent á að þröngur fjörðurinn rúmi illa eldiskvíar.

Í skoðanakönnun sem sveitarfélagið Múlaþing lét gera árið 2023 kom í ljós að 75 prósent íbúa voru andvíg áformunum.

Stjórnvöld í Dóminíska lýðveldinu staðfestu í gær að 184 hefðu fundist látnir eftir að þak skemmtistaðar hrundi á þriðjudag. Leit að eftirlifendum var hætt í gærkvöld.

Í yfirlýsingu sagði að áframhaldandi aðgerðir á vettvangi snerust nú að því að leita að líkamsleifum þeirra sem létust. Ekki væri raunhæfur möguleiki á að fólk fyndist enn á lífi í rústunum.

Yfirvöld telja að frá 500 til þúsund hafi verið í byggingunni þegar þakið hrundi. Fleiri en 500 særðust og rúmlega 300 viðbragðsaðilar sinntu leit og björgun á vettvangi.

Hitamet var slegið í Reykjavík í gær þegar dægurhiti, meðaltal átta athugana, mældist tíu stig. Þetta er í fyrsta sinn sem hann nær tíu stigum í Reykjavík svo snemma árs. Þetta kemur fram í færslu á Facebook-síðu Bliku, vefs Veðurvaktarinnar ehf.

Þar segir að frá því að gögn ná til hafi hitinn komist næst tíu stigum á þessum árstíma árið 1928. Þá hafi dægurhiti reiknast 9,8 gráður.

Tíu stiga hiti mældist einnig víðar um landið í gær, þar á meðal í Stykkishólmi og Húsafelli, þar sem hann fór í tæp ellefu stig. Að sögn Bliku samsvarar það nokkurn veginn meðalhita í júlí.

Friedrich Merz, verðandi kanslari Þýskalands, segir tollafrestun Donalds Trump Bandaríkjaforseta sanna að samstillt nálgun Evrópu í viðskiptum hafi jákvæð áhrif. „Evrópubúar eru ákveðnir í að verja sig og þetta dæmi sýnir að samstaða borgar sig.“

Öldungadeildarþingmaðurinn Ron Johnson er á meðal stjórnmálamanna sem fann fyrir létti þegar Trump greindi frá frestuninni. Enn er þó mörgum spurningum svarað um framhaldið. „Við vitum hvert markmiðið hans er, en ég veit ekki hver lokaútkoman verður,“ sagði Johnson þegar hann talaði við blaðamenn fyrir utan þinghúsið í Washington í kvöld.

Hlutabréfamarkaðir í Bandaríkjunum hafa rokið upp eftir að Donald Trump Bandaríkjaforseti frestaði tollum á önnur lönd en Kína um þrjá mánuði. Nasdaq hækkaði um 12%, Standard og Poors um 9,5% og Dow Jones um 7,9%.

Trump sagði við fjölmiðla í kvöld að með ákvörðuninni væri hann að sýna sveigjanleika, en viðurkenndi jafnframt að álagning tollanna hefði valdið töluverðu uppnámi. Hann sagði að fólk hefði orðið taugatrekkt, en þetta hafi verið nauðsynlegt.

Hvíta húsið sagði í kvöld að 25% tollar, á vörur frá Kanada og Mexíkó sem ekki væru hluti af fríverslunarsamningi þeirra við Bandaríkin, væru áfram í gildi.

Bilun kom upp í netsambandi Vodafone á tíunda tímanum. Þá lá 5G net Vodafone einnig niðri. Bilunin hafði víðtæk áhrif á netþjónustu í um 20 mínútur.

Guðmundur Arnar Sigmundsson, forstöðumaður CERT-IS, netör­ygg­is­sveit­ar Póst- og fjar­skipta­stofn­un­ar, hafði ekki fengið upplýsingar um að netárás sé að eiga sér stað þegar fréttastofa náði tali af honum.

Samkvæmt upplýsingum frá Vodafone má rekja bilunina til stofnnets ljósleiðara sem tók út megnið af kerfum Vodafone og netsambandi. Ekki er vitað hvað olli biluninni en unnið er að greiningu samkvæmt upplýsingum frá Orkuveitunni.

Fréttin hefur verið uppfærð.

Saksóknari í Svíþjóð krefst gæsluvarðhalds yfir manni sem er grunaður um njósnir fyrir kínversk stjórnvöld. Maðurinn er sakaður um að njósna um fólk úr hópi Úígúra sem hefur flúið Kína. Saksóknari segir manninn hafa safnað upplýsingum og öðrum gögnum um fólkið og komið þeim til leyniþjónustustofnana í Kína.

Úígúrar eru múslimaþjóð sem býr í Xinjiang-héraði Kína. Kínversk stjórnvöld eru sökuð um að halda þeim nauðugum í innrætingarbúðum í héraðinu, þar sem þau eru sögð sæta ofbeldi, pyntingum, nauðungarvinnu, innrætingu stjórnmálaskoðana og fleiru. Kínversk stjórnvöld neita ásökunum.

Héraðsdómur Suðurlands samþykkti í gærkvöld kröfu lögreglustjórans á Suðurlandi um áframhaldandi gæsluvarðhald yfir þremur karlmönnum vegna rannsóknar á máli er varðar frelsissviptingu, fjárkúgun og manndráp. Þetta kemur fram í tilkynningu lögreglunnar á Suðurlandi.

Um tíma sátu sjö í gæsluvarðhaldi eftir að maður, sem saknað var í Þorlákshöfn í byrjun mars, fannst þungt haldinn í Gufunesi í Reykjavík og lést skömmu eftir komu á sjúkrahús.

Í tilkynningu segir að rannsókn miði vel. Lögreglan á höfuðborgarsvæðinu, embætti héraðssaksóknara og embætti ríkislögreglustjóra hafa aðstoðað lögregluna á Suðurlandi við rannsóknina.

Tollar Evrópusambandsins á fjölda vörutegunda frá Bandaríkjunum verða hækkaðir um miðjan næsta mánuð, eftir að nægilegur fjöldi aðildarríkjanna samþykkti tillögur framkvæmdastjórnar ESB um aðgerðir nú síðdegis. Aðgerðirnar eru svar við tollahækkunum Trump-stjórnarinnar á innflutning á áli og stáli sem kynntar voru í síðasta mánuði. Þær ná til vöruflokka á borð við soyabaunir, mótorhjól og snyrtivörur. Í tilkynningu frá framkvæmdastjórninni í dag var tekið fram að þessar aðgerðir væru afturkræfar, næðist samkomulag í deilunni.

Búast má við rigningu sunnan- og vestanlands snemma morguns. Suðlæg átt er í dag og víða strekkingur eða allhvass vindur. Lengst af hægur vindur og þurrt austanlands. Í kvöld dregur aftur úr bæði vindi og úrkomu sunnan- og vestanlands.

Fremur hlýtt er í veðri og verður hiti á bilinu 6 til 16 stig, hlýjast fyrir austan.

Á morgun er útlit fyrir hægari sunnanátt með dálitlum skúrum eða súld. Áfram lítil úrkoma á Austurlandi. Annað kvöld bætir aftur í vind sunnan- og vestanlands og tekur þá aftur að rigna.

Fjórum flugvélum var beint frá Keflavíkurflugvelli á tólfta tímanum í kvöld þegar lendingarljós á flugvellinum biluðu. Ein flugvélin, vél Icelandair á leið Heathrow-flugvelli í London, varð að lenda á Akureyri.

Hinar tvær vélarnar, vél Austrian Airlines frá Vín og EasyJet frá Basel, hugðust lenda í Glasgow en sneru að endingu við og lentu á Keflavíkurflugvelli eftir að tókst að koma ljósunum þar í gang á ný.

Fjórða vélin, vél Icelandair á flugi frá Kaupmannahöfn, lenti án vandkvæða eftir að ljósin voru komin í lag.

Tvö hjól rákust saman á hjólastíg á Arnarnesi í Garðabæ í kvöld. Tveir fluttir á slysadeild til aðhlynningar. Þetta staðfestir Lárus Steindór Björnsson, varðstjóri í Slökkviliði höfuðborgarsvæðisins. Hann kveðst ekki hafa upplýsingar um ástand hjólreiðamannanna að svo stöddu. Nokkur viðbúnaður var vegna slyssins að sögn vegfaranda sem átti leið hjá.

Kostnaður við störf hagræðingarhóps ríkisstjórnarinnar nam sjö milljónum króna, samkvæmt svari forsætisráðherra við fyrirspurn Diljár Mistar Einarsdóttur á þingi.

Hagræðingarhópinn skipuðu þau Björn Ingi Victorsson, Hildur Georgsdóttir, Oddný Árnadóttir og Gylfi Ólafsson. Tilkynnt var um skipan hópsins 23. janúar og skilaði hann af sér tillögum þann 4. mars.

Heildarkostnaður við störf hópsins nam 7,2 milljónum króna. Þar af voru 6,9 milljónir greiddar fyrir vinnu nefndarmanna. Ferðakostnaður nam 200 þúsund krónum, veitingar 77 þúsund og 97 þúsund krónur voru greiddar fyrir aðgengi að gervigreind.

Ekki er útlit fyrir að breytingar verði á forystu Samfylkingarinnar á landsfundi flokksins um helgina. Kristrún Frostadóttir, forsætisráðherra, er ein í framboði til formanns en framboðsfrestur í það embætti rann út á föstudaginn.

Framboðsfrestur til embættis varaformanns rennur út 15:30 á föstudaginn, á síðari degi landsfundar. Guðmundur Árni Stefánsson, bæjarfulltrúi í Hafnarfirði og núverandi varaformaður, er enn sem komið er eini frambjóðandinn í embættið.

Landsfundurinn verður settur klukkan 13 á föstudaginn í Fossaleyni Studio í Grafarvogi.

Verð á meirihluta þeirra fyrirtækja sem skráð eru á aðallista kauphallarinnar hefur hækkað í dag, rétt eins og í kauphöllum í Evrópu. Verð sjö fyrirtækja hefur lækkað. Lækkunin nær þó ekki prósenti hjá neinu þeirra.

Úrvalsvísitalan hefur hækkað um rúm 2% þegar þetta er skrifað.

Verð vaxtarfyrirtækjanna Alvotech, Oculis og Amaraq lækkaði einna mest í hrinu verðlækkana undanfarinna daga sem tengist áhrifum tollahækkana Bandaríkjastjórnar. Fyrirtækin þrjú eru á meðal þeirra félaga sem hækkað hafa mest í verði í dag. Það sama má segja um JBT Marel.

Öryggisráð Sameinuðu þjóðanna og fastaráð Öryggis- og samvinnustofnunar Evrópu funda í dag um árásir Rússlandshers á borgina Kryvyi Rih í Úkraínu á föstudag. Kryvyi Rih er heimaborg Volodymyrs Zelenskys, forseta Úkraínu. Rússlandsher drap 20 manns, þar af níu börn, og særði 75.

Utanríkisráðherra Úkraínu, Andrii Sybiha, segir í færslu á samfélagsmiðlinum X að herinn hafi beint sprengjum að leikvöllum í íbúahverfum.

Utanríkisráðherrann kallar eftir kröftugum viðbrögðum á alþjóðavísu við grimmdarverkum Rússlands, bæði fordæmingu og aðgerðum.

Rafræn skilríki í farsíma virkuðu ekki um tíma í morgun vegna bilunar í búnaði hjá Reiknistofu bankanna. Vinnu við lagfæringu er lokið og því ættu rafræn skilríki að virka sem skyldi.

Haraldur Bjarnason, framkvæmdastjóri Auðkennis sem heldur úti rafrænum skilríkjum, segir í samtali við fréttastofu að bilunin hafi komið upp um klukkan hálf sjö. Hann segir Auðkennisappið hafa virkað eðlilega á meðan hin leiðin til auðkenningar var biluð.

Fréttin var uppfærð eftir að lagfæringu lauk.

Það er útlit fyrir að áfram verði fremur hlýtt á hluta landsins. Hiti á Norðurlandi getur farið í 16 stig í dag þegar best lætur. Hiti annars staðar verður víða á bilinu 6 til 13 stig. Áttin verður suðvestlæg í dag og víða gola eða kaldi. Spáin gerir ráð fyrir bjartviðri austanlands, en skýjuðu veðri eða dálítilli súld af og til um landið sunnan- og vestanvert.

Á morgun nálgast skil landið frá lægð í suðri. Þá gengur í sunnanstrekking eða allhvassan vind og fer að rigna, fyrst vestanlands. Annað kvöld dregur svo úr vindi og vætu á suðvesturhluta landsins. Hiti breytist lítið.

Kristrún Frostadóttir forsætisráðherra og formaður Samfylkingarinnar er ein í framboði til formanns flokksins. Framboðsfrestur rann út á miðnætti 4. apríl. Landsfundur Samfylkingarinnar verður haldinn um helgina í Stúdíó Fossaleyni í Grafarvogi.

Kristrún tók við sem formaður flokksins þann 28. október árið 2022.

Enn er opið fyrir framboð í önnur embætti Samfylkingarinnar, þar á meðal embætti varaformanns, ritara og gjaldkera. Framboðsfrestur er til 15:30 á föstudag.

Þessi frétt er unnin af meistaranema við Háskóla Íslands í starfsnámi á fréttastofu RÚV.

Átján manns hafa farist í miklum flóðum í suður- og miðvesturhluta Bandaríkjanna síðan á miðvikudag. Þar hefur verið úrhellisrigning og hvassviðri og yfirvöld í nokkrum borgum í Kentucky og Tennessee hafa fyrirskipað brottflutning íbúa.

Meðal þeirra sem hafa farist er níu ára drengur í Kentucky sem drukknaði þegar hann var á göngu á leið í skólabílinn. Þá fórst fimm ára drengur í Arkansas þegar tré féll á heimili hans.

Tvö hundruð manna bær í Tennessee, Rives, er nær allur á floti eftir að áin Obion flæddi yfir bakka sína.

Það verður fremur hlýtt í dag og hitinn gæti farið í 15 til 18 stig á Norður- og Austurlandi þegar best lætur. Þar verður einnig lengst af bjart veður. Annars staðar er spáð skýjuðu veðri og smávætu öðru hverju. Á morgun er spáð svalara veðri norðanlands en annars svipuðu.

Spáin gerir ráð fyrir hægum vindi í dag, golu eða kalda, en strekkingsvindi við suðvestur- og vesturströndina.

Á miðvikudag og fimmtudag er spáð rigningu víðast hvar, síst þó á Austurlandi. Eftir það er útlit fyrir kólnandi veður.

Órói mældist aftur á jarðhitasvæðinu við Torfajökul í stuttan tíma í kringum átta í dag. Steinunn Helgadóttir, náttúruvársérfræðingur hjá Veðurstofu Íslands segir þetta alllíklega vera vegna breytinga í jarðhitakerfinu þar. Mælar á svæðinu geta numið slíkt sem óróa. Svipaður atburður varð þar upp úr hádegi í gær. Sérfræðingar á Veðurstofu Íslands fylgjast áfram vel með.

Átta ára stúlka er annað barnið sem deyr í mislingafaraldri í Vestur-Texas í Bandaríkjunum. Nærri 500 mislingatilfelli hafa verið staðfest í Texas frá því að faraldurinn hófst í ársbyrjun, 54 í Nýju-Mexíkó og tíu í Oklahoma.

Ef útbreiðslan heldur áfram á þessum hraða gætu Bandaríkin dottið út af lista yfir lönd þar sem mislingafaraldur hefur verið stöðvaður.

Viðbrögð Roberts F. Kennedy yngri heilbrigðisráðherra hafa verið gagnrýnd. Læknar í Texas segja að áhersla hans á aðrar lækningaaðferðir hafi valdið því að fólk leitar oft seint til læknis eða innbyrðir hættulegt magn A-vítamíns.

Lögreglan í Rheinland-Pfalz í Þýskalandi leitar að manni sem er grunaður um að hafa orðið þremur að bana í heimahúsi í bænum Weiteweld. Þýska dagblaðið Bild fullyrðir að hin látnu séu par og 16 ára sonur þeirra.

Samkvæmt lögreglunni hringdi kona í neyðarlínuna rétt fyrir klukkan fjögur í nótt og greindi frá grófu ofbeldi. Lögregla útilokar ekki að konan sem hringdi sé ein hinna látnu. Vísbendingar eru um að bæði skot- og eggvopnum hafi verið beitt. Leit lögreglunnar beinist að einstaklingi sem sást yfirgefa húsið nánast um leið og lögregla kom á staðinn.

Um 2.000 búa í Weitefeld. Lögregla segir engan grun um að aðrir séu í hættu.