Vegna vinnu við tengingu á nýjum miðlunartanki fyrir kalt neysluvatn í Kópavogi þarf að loka fyrir rennsli kalt vatns fimmtudaginn 20. mars frá kl. 22:00 og til kl. 04:00 að morgni 21. mars. Lokunin nær til alls Kópavogs, fyrir utan Vatnsendahverfi.

Þetta kemur fram í tilkynningu frá Kópavogsbæ.

Sundlaugar Kópavogs loka kl. 21.30 að kvöldi 20. mars vegna þessa.

Íbúum er bent á að skynsamlegt geti verið að hreinsa síur í vatnsinntökum og blöndunartækjum þar sem loft getur myndast í kerfinu eftir að vatni hefur verið hleypt aftur á.

Jarðskjálfti af stærðinni 4,2 varð í Bárðarbungu rétt fyrir klukkan hálfníu í morgun. Skjálfti af stærðinni 2,9 varð á sama stað stuttu áður og hafa nokkrir minni eftirskjálftar mælst í kjölfarið.

Kristín Elísa Guðmundsdóttir, náttúruvársérfræðingur hjá Veðurstofu Íslands, segir skjálfta af þessari stærð þekkta í Bárðabungu eftir að eldgosinu í Holuhrauni lauk árið 2015. Skjálftar af svipaðri stærð hafi síðast orðið um miðjan janúar.

Hún segir ólíklegt að nokkur hafi fundið fyrir skjálftunum þar sem upptök séu á hálendinu og engin byggð nálægt. Engin merki séu um gosóróa, en Veðurstofan fylgist áfram með.

Hamas útilokar ekki frekari viðræður um vopnahlé við Ísrael en segir enga þörf á nýju samkomulagi. Samningurinn sem var undirritaður í janúar ætti að vera í gildi og annar fasi hans átti að hefjast snemma í mars.

Einn samningamanna Hamas segir Hamas ekki setja nein sérstök skilyrði fyrir nýjar viðræður. Samtökin krefjist þess hins vegar að Ísrael hætti árásum sínum tafarlaust og hefji viðræður um annan fasa vopnahléssáttmálans.

Hamas hvetur alþjóðasamfélagið til þess að grípa til aðgerða svo hægt sé að binda enda á stríðið, og sakar Ísraelsher um að rjúfa vopnahléssáttmála sem hann skrifaði undir.

Símafundi Donalds Trump Bandaríkjaforseta og Vladimírs Pútíns Rússlandsforseta er lokið. Hann stóð í um tvær og hálfa klukkustund.

Enn hafa engar fregnir borist af fundinum en við munum flytja þær um leið og þær berast.

Talsmenn Hvíta hússins hafa staðfest að símafundur Donalds Trumps Bandaríkjaforseta og Vladimírs Pútíns Rússlandsforseta hófst klukkan 14 að íslenskum tíma og stendur enn.

Greint hafði verið frá því að fundurinn myndi fara fram milli klukkan 13 og 15 að íslenskum tíma.

Fréttamaður BBC í Hvíta húsinu segir að búist sé við yfirlýsingu frá Karoline Leavitt, fjölmiðlafulltrúa Hvíta hússins, að fundi forsetanna loknum.

Sérsveit ríkislögreglustjóra var kölluð vestur á Bolungarvík í dag til aðstoðar í útkalli Lögreglunnar á Vestfjörðum.

Lögregla verst frétta af málinu en Hlynur Snorrason, yfirlögregluþjónn hjá Lögreglunni á Vestfjörðum, staðfesti að sérsveitin hefði verið kölluð til. Útkallið hefði verið þess eðlis, en hann vildi ekki tjá sig um málavexti.

Von er á tilkynningu síðar í dag.

Helena Rós Sturludóttir samskiptastjóri ríkislögreglustjóra staðfesti jafnframt að sérsveitin hefði verið kölluð út en vildi annars ekki tjá sig um málið.

Þingeyjarsveit hefur keypt snjótroðara til að nota á skíðasvæðinu í Kröflu, að því er fram kemur á vef sveitarfélagsins.

Íþróttafélagið Mývetningur, sem hefur staðið fyrir uppbyggingu á skíðasvæðinu, sér um notkun tækisins.

Með nýja snjótroðaranum er stefnt að því að tryggja enn betri aðstæður fyrir skíðafólk, hvort sem það stundar alpagreinar eða skíðagöngu.

Vonast er til að áhugi íbúa og ferðamanna á að nýta skíðasvæðið í Kröflu muni nú aukast.

Landsmenn mega búast við hæglætisveðri í dag, það er útlit fyrir hæga suðlæga eða breytilega átt. Væta af og til víða um land en hvergi mikil úrkoma. Það verður yfirleitt þurrt og bjart veður austanlands og hiti á bilinu 5-10 stig yfir daginn.

Á morgun verður svipað veður nema það bætir í vind vestanlands síðdegis og búast má við sunnanstrekkingi með rigningu þar annað kvöld.

Til stendur að Donald Trump Bandaríkjaforseti og Vladimír Pútín Rússlandsforseti fundi símleiðis snemma í dag til að ræða möguleg stríðslok í Úkraínu.

Bandaríkjamenn hafa lagt fram tillögu að þrjátíu daga vopnahléi í Úkraínu sem Úkraínumenn hafa sagst reiðubúnir að samþykkja. Pútín hefur sagst vera hlynntur vopnahléi, að ákveðnum skilyrðum uppfylltum, en hefur ekki skýrt hver þau eru.

Trump sagði í gær að hann væri vongóður um að samkomulag næðist. Pútín hefði þegar samþykkt mörg atriði samkomulagsins.

Ríkissaksóknari hefur ákveðið að áfrýja ekki dómi Héraðsdóms Austurlands yfir Alfreð Erlingi Þórðarsyni, sem varð eldri hjónum að bana í Neskaupstað í fyrra. Vísir hefur eftir Sigríði J. Friðjónsdóttur ríkissaksóknara að dóminum verði ekki áfrýjað.

Héraðsdómur taldi sannað að hann hefði banað hjónunum en úrskurðaði að hann væri ósakhæfur og skyldi því vistaður á viðeigandi stofnun.

Gerðar verða breytingar á stuðningsúrræðum til íbúa Grindavíkur. Forsætisráðherra kynnir aðgerðirnar á fundi ríkisstjórnarinnar á morgun.

Fulltrúar Grindavíkurbæjar áttu fund síðdegis með forsætisráðherra um framhald aðgerða sem að óbreyttu renna sitt skeið um mánaðamótin. Hátt í tvö hundruð grindvískar fjölskyldur þurfa stuðning og forseti bæjarstjórnar sagði í hádegisfréttum að óvissan væri bagaleg.

Úrræðin hafa þrisvar verið framlengd en nú ætlar ríkisstjórnin að breyta þeim, í skrefum.

Samkvæmt heimildum fréttastofu fá þau sem verst standa fjárhagslega áframhaldandi stuðning og þjónustuteymi Grindvíkinga verður starfrækt áfram.

Framkvæmdastjóri Alþjóðaheilbrigðismálastofnunarinnar varar við að ákvörðun Bandaríkjanna um að draga verulega úr þróunaraðstoð gæti kostað milljónir mannslífa. Tedros Adhanom Ghebreyesus biðlar til Bandaríkjanna að endurskoða ákvörðunina.

Hann segir minnkaðan stuðning Bandaríkjanna geta snúið við 20 ára framförum og leitt til meira en 10 milljóna nýrra HIV-smita og 3 milljóna dauðsfalla tengdum sjúkdómnum.

Niðurskurður til þróunaraðstoðar er hluti af sparnaðaraðgerðum Donalds Trump Bandaríkjaforseta. Stjórn hans hefur sagt upp nærri öllu starfsfólki USAID, Alþjóðaþróunarstofnunar Bandaríkjanna.

Bandaríska kaffihúsakeðjan Starbucks hefur verið dæmd til að greiða sendli sem starfaði hjá fyrirtækinu 50 milljónir dala, jafnvirði 6,7 milljarða króna, í miskabætur. Sendillinn brenndi sig á heitum drykk sem var ekki rétt skorðaður í bakkanum sem er notaður til að ferja drykkina.

Í úrskurði kemur fram að sendillinn hafi orðið fyrir andlegum og líkamlegum miska og sé nú haldinn kvíða. Í yfirlýsingu frá Starbucks segir að fyrirtækið telji bæturnar úr öllu hófi.

Dómurinn minnir um margt á þekkta málsókn frá 1994 þegar skyndibitakeðjan McDonald's var dæmd til að greiða konu 640.000 dali eftir að hún brenndi sig á heitu kaffi.

Atvinnuvegaráðuneytið hætti í síðustu viku að prenta þingskjöl sem lögð eru fram á Alþingi vegna hagræðingar og umhverfissjónarmiða. Prentun þingskjala kostar Stjórnarráðið tugi milljóna króna á ári hverju

Þetta kemur fram á vef stjórnarráðsins.

Síðustu ár hafa öll þingskjöl ráðuneytisins verið prentuð í um 30 eintökum. Talsvert hefur þó verið dregið úr prentun í Stjórnarráðinu síðustu ár.

„Þessi ákvörðun er eiginlega sjálfgefin“, er haft eftir Hönnu Katrínu Friðriksson atvinnuvegaráðherra. Þetta spari bæði fé og pappír. Þingmönnum sem vilja útprent stendur það þó enn til boða.

Hæð yfir Skotlandi dælir mildri sunnanátt til landsins í dag, strekkingsvindi norðvestan til en hægari annars staðar. Það verður lítils háttar væta sunnan- og vestanlands eins og síðustu daga en léttskýjað á Norðaustur- og Austurlandi.

Á morgun verður suðvestan gola eða kaldi, víða skúrir og jafnvel slydda við norðausturströndina en yfirleitt þurrt austanlands. Á miðvikudag er útlit fyrir svipað veður, suðaustan golu eða kalda með stöku skúrum um landið sunnan- og vestanvert.

Sjö jarðskjálftar hafa mælst milli Stóra Skógfells og Hagafells á Reykjanesskaga síðasta sólarhring, að sögn náttúruvársérfræðings á Veðurstofu Íslands. Það er svipað og um helgina. Flestir skjálftarnir voru minni en 0,5 að stærð og einn yfir einum.

Þá hefur dregið verulega úr jarðskjálftavirkni sunnan við Reykjanestá og engin virkni mældist þar í nótt.

Farið verður yfir gögn úr GPS-mælum síðar í dag til að meta landris við Svartsengi.

Benedikt Ófeigsson, fagstjóri aflögunarmælinga, sagði við fréttastofu í gær að of snemmt væri að segja til um hvort landsig væri hafið. Þó bendi flest til þess að frekar styttist í eldgos en ekki.

Donald Trump forseti Bandaríkjanna segist ætla að hafa fund með Vladimír Pútín forseta Rússlands á morgun til að leitast við að fá Pútín til að samþykkja 30 daga vopnahlé í Úkraínu.

Úkraínumenn hafa sagst reiðubúnir að samþykkja vopnahléstillögu Bandaríkjamanna. Pútín sagðist á fimmtudag vera hlynntur vopnahléi að ákveðnum skilyrðum uppfylltum. Hann hefur ekki skýrt hver skilyrðin eru.

Aðspurður hvort reynt yrði að fá Rússa eða Úkraínumenn til að gefa eitthvað eftir sagði Trump að viðræður um skiptingu ákveðinna eigna væru þegar hafnar. Hann kvaðst búast við að þeir Pútín ræddu meðal annars um land og orkuver.

Vatíkanið birti í gær fyrstu myndina af Frans páfa frá því að hann var lagður inn á sjúkrahús í febrúar. Á myndinni situr páfi, sem er 88 ára, í hjólastól við altarið í kapellu Gemelli-sjúkrahússins í Róm. Í tilkynningu þakkaði hann batakveðjur sem honum hefðu borist og bað fyrir friði í stríðshrjáðum löndum.

Páfi hefur legið á sjúkrahúsi með alvarlega sýkingu í báðum lungum en er sagður á batavegi. Hann hefur sinnt helstu skyldum sínum af sjúkrabeðnum.

Vangaveltur hafa verið um hvort hann segi af sér sökum veikinda og aldurs. Afar sjaldgæft er að páfi segi af sér.