Þingeyjarsveit hefur keypt snjótroðara til að nota á skíðasvæðinu í Kröflu, að því er fram kemur á vef sveitarfélagsins.

Íþróttafélagið Mývetningur, sem hefur staðið fyrir uppbyggingu á skíðasvæðinu, sér um notkun tækisins.

Með nýja snjótroðaranum er stefnt að því að tryggja enn betri aðstæður fyrir skíðafólk, hvort sem það stundar alpagreinar eða skíðagöngu.

Vonast er til að áhugi íbúa og ferðamanna á að nýta skíðasvæðið í Kröflu muni nú aukast.

Landsmenn mega búast við hæglætisveðri í dag, það er útlit fyrir hæga suðlæga eða breytilega átt. Væta af og til víða um land en hvergi mikil úrkoma. Það verður yfirleitt þurrt og bjart veður austanlands og hiti á bilinu 5-10 stig yfir daginn.

Á morgun verður svipað veður nema það bætir í vind vestanlands síðdegis og búast má við sunnanstrekkingi með rigningu þar annað kvöld.

Til stendur að Donald Trump Bandaríkjaforseti og Vladimír Pútín Rússlandsforseti fundi símleiðis snemma í dag til að ræða möguleg stríðslok í Úkraínu.

Bandaríkjamenn hafa lagt fram tillögu að þrjátíu daga vopnahléi í Úkraínu sem Úkraínumenn hafa sagst reiðubúnir að samþykkja. Pútín hefur sagst vera hlynntur vopnahléi, að ákveðnum skilyrðum uppfylltum, en hefur ekki skýrt hver þau eru.

Trump sagði í gær að hann væri vongóður um að samkomulag næðist. Pútín hefði þegar samþykkt mörg atriði samkomulagsins.

Ríkissaksóknari hefur ákveðið að áfrýja ekki dómi Héraðsdóms Austurlands yfir Alfreð Erlingi Þórðarsyni, sem varð eldri hjónum að bana í Neskaupstað í fyrra. Vísir hefur eftir Sigríði J. Friðjónsdóttur ríkissaksóknara að dóminum verði ekki áfrýjað.

Héraðsdómur taldi sannað að hann hefði banað hjónunum en úrskurðaði að hann væri ósakhæfur og skyldi því vistaður á viðeigandi stofnun.

Gerðar verða breytingar á stuðningsúrræðum til íbúa Grindavíkur. Forsætisráðherra kynnir aðgerðirnar á fundi ríkisstjórnarinnar á morgun.

Fulltrúar Grindavíkurbæjar áttu fund síðdegis með forsætisráðherra um framhald aðgerða sem að óbreyttu renna sitt skeið um mánaðamótin. Hátt í tvö hundruð grindvískar fjölskyldur þurfa stuðning og forseti bæjarstjórnar sagði í hádegisfréttum að óvissan væri bagaleg.

Úrræðin hafa þrisvar verið framlengd en nú ætlar ríkisstjórnin að breyta þeim, í skrefum.

Samkvæmt heimildum fréttastofu fá þau sem verst standa fjárhagslega áframhaldandi stuðning og þjónustuteymi Grindvíkinga verður starfrækt áfram.

Framkvæmdastjóri Alþjóðaheilbrigðismálastofnunarinnar varar við að ákvörðun Bandaríkjanna um að draga verulega úr þróunaraðstoð gæti kostað milljónir mannslífa. Tedros Adhanom Ghebreyesus biðlar til Bandaríkjanna að endurskoða ákvörðunina.

Hann segir minnkaðan stuðning Bandaríkjanna geta snúið við 20 ára framförum og leitt til meira en 10 milljóna nýrra HIV-smita og 3 milljóna dauðsfalla tengdum sjúkdómnum.

Niðurskurður til þróunaraðstoðar er hluti af sparnaðaraðgerðum Donalds Trump Bandaríkjaforseta. Stjórn hans hefur sagt upp nærri öllu starfsfólki USAID, Alþjóðaþróunarstofnunar Bandaríkjanna.

Bandaríska kaffihúsakeðjan Starbucks hefur verið dæmd til að greiða sendli sem starfaði hjá fyrirtækinu 50 milljónir dala, jafnvirði 6,7 milljarða króna, í miskabætur. Sendillinn brenndi sig á heitum drykk sem var ekki rétt skorðaður í bakkanum sem er notaður til að ferja drykkina.

Í úrskurði kemur fram að sendillinn hafi orðið fyrir andlegum og líkamlegum miska og sé nú haldinn kvíða. Í yfirlýsingu frá Starbucks segir að fyrirtækið telji bæturnar úr öllu hófi.

Dómurinn minnir um margt á þekkta málsókn frá 1994 þegar skyndibitakeðjan McDonald's var dæmd til að greiða konu 640.000 dali eftir að hún brenndi sig á heitu kaffi.

Atvinnuvegaráðuneytið hætti í síðustu viku að prenta þingskjöl sem lögð eru fram á Alþingi vegna hagræðingar og umhverfissjónarmiða. Prentun þingskjala kostar Stjórnarráðið tugi milljóna króna á ári hverju

Þetta kemur fram á vef stjórnarráðsins.

Síðustu ár hafa öll þingskjöl ráðuneytisins verið prentuð í um 30 eintökum. Talsvert hefur þó verið dregið úr prentun í Stjórnarráðinu síðustu ár.

„Þessi ákvörðun er eiginlega sjálfgefin“, er haft eftir Hönnu Katrínu Friðriksson atvinnuvegaráðherra. Þetta spari bæði fé og pappír. Þingmönnum sem vilja útprent stendur það þó enn til boða.

Hæð yfir Skotlandi dælir mildri sunnanátt til landsins í dag, strekkingsvindi norðvestan til en hægari annars staðar. Það verður lítils háttar væta sunnan- og vestanlands eins og síðustu daga en léttskýjað á Norðaustur- og Austurlandi.

Á morgun verður suðvestan gola eða kaldi, víða skúrir og jafnvel slydda við norðausturströndina en yfirleitt þurrt austanlands. Á miðvikudag er útlit fyrir svipað veður, suðaustan golu eða kalda með stöku skúrum um landið sunnan- og vestanvert.

Sjö jarðskjálftar hafa mælst milli Stóra Skógfells og Hagafells á Reykjanesskaga síðasta sólarhring, að sögn náttúruvársérfræðings á Veðurstofu Íslands. Það er svipað og um helgina. Flestir skjálftarnir voru minni en 0,5 að stærð og einn yfir einum.

Þá hefur dregið verulega úr jarðskjálftavirkni sunnan við Reykjanestá og engin virkni mældist þar í nótt.

Farið verður yfir gögn úr GPS-mælum síðar í dag til að meta landris við Svartsengi.

Benedikt Ófeigsson, fagstjóri aflögunarmælinga, sagði við fréttastofu í gær að of snemmt væri að segja til um hvort landsig væri hafið. Þó bendi flest til þess að frekar styttist í eldgos en ekki.

Donald Trump forseti Bandaríkjanna segist ætla að hafa fund með Vladimír Pútín forseta Rússlands á morgun til að leitast við að fá Pútín til að samþykkja 30 daga vopnahlé í Úkraínu.

Úkraínumenn hafa sagst reiðubúnir að samþykkja vopnahléstillögu Bandaríkjamanna. Pútín sagðist á fimmtudag vera hlynntur vopnahléi að ákveðnum skilyrðum uppfylltum. Hann hefur ekki skýrt hver skilyrðin eru.

Aðspurður hvort reynt yrði að fá Rússa eða Úkraínumenn til að gefa eitthvað eftir sagði Trump að viðræður um skiptingu ákveðinna eigna væru þegar hafnar. Hann kvaðst búast við að þeir Pútín ræddu meðal annars um land og orkuver.

Vatíkanið birti í gær fyrstu myndina af Frans páfa frá því að hann var lagður inn á sjúkrahús í febrúar. Á myndinni situr páfi, sem er 88 ára, í hjólastól við altarið í kapellu Gemelli-sjúkrahússins í Róm. Í tilkynningu þakkaði hann batakveðjur sem honum hefðu borist og bað fyrir friði í stríðshrjáðum löndum.

Páfi hefur legið á sjúkrahúsi með alvarlega sýkingu í báðum lungum en er sagður á batavegi. Hann hefur sinnt helstu skyldum sínum af sjúkrabeðnum.

Vangaveltur hafa verið um hvort hann segi af sér sökum veikinda og aldurs. Afar sjaldgæft er að páfi segi af sér.

Mild suðlæg átt verður víða á landinu í dag. Sums staðar stinningskaldi eða allhvasst norðvestanlands en hægari vindur annars staðar. Búast má við súld öðru hverju á Suður- og Vesturlandi. Þurrt og bjart veður um landið norðaustanvert. Á þriðjudaginn má gera ráð fyrir að vind lægi en að aftur taki að kólna norður af landinu. Þá gæti orðið slydda eða snjókoma um tíma við norðurströndina.

Dragon-geimfar bandaríska fyrirtækisins SpaceX kom að Alþjóðlegu geimstöðinni í nótt og því stefnir allt í að tveir geimfarar komist loks heim eftir að hafa verið strandaglópar þar í níu mánuði. Farið lagði af stað á föstudagskvöld.

Stefnt er að því að Butch Wilmore og Suni Williams fari heim með Dragon-farinu í vikunni, ásamt tveimur öðrum geimförum.

Williams og Wilmore lögðu af stað til geimstöðvarinnar með Boeing Starliner síðasta sumar og áttu að snúa til baka átta dögum síðar. Vegna bilunar í þrýstibúnaði Starliner var það þó ekki talið öruggt.

Í dag má búast við hægum vindi í kringum 2 metra á sekúndu. Dálítil væta vestantil á landinu en yfirleitt þurrt austantil.

Á morgun má búast við aðeins meiri vindhraða víðast hvar um landið eða um 2 til 5 metrum á sekúndu. Súld eða lítils háttar rigning sunnan- og vestanlands. Bjartviðri á Norður- og Austurlandi.

Útlit er fyrir að veður verði nokkuð svipað fram á mánudag.

Slökkvilið höfuðborgarsvæðisins var kallað út skömmu eftir klukkan eitt í nótt eftir að eldur kom upp í bíl á bílastæði verslunarinnar Fjarðarkaups í Hafnarfirði. Að sögn varðstjóra slökkviliðsins gekk slökkvistarf fljótt fyrir sig en bíllinn er ónýtur.

Hann sagði eiganda bílsins hafa tilkynnt um eldinn og að slökkvilið hefði komið á staðinn á örskotsstundu, enda er slökkvistöðin í Skútahrauni aðeins steinsnar frá versluninni. Ekki er ljóst hvort eigandinn hafi verið inni í bílnum þegar eldurinn kom upp en engan sakaði að sögn varðstjóra.

Eldsupptök eru ókunn.

Milljónir voru án rafmagns á Kúbu í gærkvöld og nótt þegar raforkudreifikerfi landsins hrundi. Rafmagn lá niðri á stórum svæðum í höfuðborginni Havana og víðar í vesturhluta ríkisins.

Kúbverjar hafa staðið frammi fyrir reglulegu rafmagnsleysi undanfarna mánuði. Rafdreifikerfi landsins er víða úrelt og illa við haldið. Þá hafa eldsneytisskortur, náttúruhamfarir og bágt efnahagsástand síðustu misseri ýtt enn frekar undir vandann.

Starfsmaðurinn, sem slasaðist þegar öryggi sprakk í aðveitustöð í álveri Norðuráls á Grundartanga í dag, virðist ekki vera alvarlega slasaður.

Þetta staðfestir Sólveig Bergmann upplýsingafulltrúi Norðuráls en hún segir starfsmanninn hafa verið fluttan til aðhlynningar á sjúkrahúsi. Mikil mildi sé að ekki fór verr.

Önnur af tveimur kerlínum álversins hefur legið niðri frá því um fjögurleytið í dag en Sólveig segir að verið sé að keyra upp rafmagn á línuna. Það geti tekið nokkra stund en búist sé við að viðgerð ljúki í kvöld.

Matvælaáætlun Sameinuðu þjóðanna (WFP) hefur ekki getað sent neinar matarbirgðir til Gaza síðan 2. mars. Ástæðan er sú að Ísrael hefur síðan þá lokað fyrir allar slíkar flutningaleiðir inn á Gaza.

Matarbirgðir á Gaza duga fyrir eldhús hjálparsamtaka og bakarí í mánuð í viðbót, samkvæmt stofnuninni. Þá eru til máltíðir sem duga 550.000 manns í tvær vikur.

Stofnunin lýsir einnig yfir áhyggjum af matarskorti á Vesturbakkanum þar sem Ísraelar hafa hert árásir síðustu vikur, með þeim afleiðingum að fólk hefur hrakist af heimilum sínum og hefur takmarkaðan aðgang að mat.