Jafnaðarmenn í Þýskalandi samþykktu á fundi sínum að ganga inn í stjórnarsamstarf með Kristilegum demókrötum. Flokkurinn tilkynnti í morgun að 84,5 prósent flokksmanna samþykktu samstarfið. Allt bendir því til þess að Friedrich Merz, leiðtogi Kristilegra demókrata, verði valinn nýr kanslari Þýskalands þegar þing kemur saman í næstu viku.
Friedrich Merz og Lars Klingbeil á blaðamannafundi í mars.EPA-EFE / CLEMENS BILAN
AFP fréttastofan hefur heimildir fyrir því að Lars Klingbeil, annar leiðtoga Jafnaðarmanna, verði fjármálaráðherra og varakanslari.
Lægð suðvestur af Reykjanesi nálgast landið en skil hennar fóru allhratt yfir landið í nótt með tilheyrandi vindi og vætu, segir í pistli veðurfræðings á Veðurstofu Íslands þennan morguninn. Í dag fer lægðin til austurs með suðurströndinni og verður vindur því norðvestlægari, styttir víða upp og kólnar heldur. Spár gera ráð fyrir að það rigni áfram á Suðausturlandi.
Veðrið klukkan 16:00 í dag.Veðurstofa Íslands
Á morgun, fimmtudaginn 1. maí, er síðan komin vestan gola eða kaldi, emð smá skúrum á víð og dreif og fremur svölu veðri, en bjart og hlýtt suðaustantil. Líkur eru á súld um landið vestanvert annað kvöld.
Ioannis Agravanis í liði Tindastóls tekur skot.RÚV / Mummi Lú
Tindastóll leiðir 2-1 gegn Álftanes í undanúrslitum Íslandsmóts karla í körfubolta. Liðið vann 105-104 sigur í kvöld á Sauðárkróki.
Tindastóll leiddi 49-46 í hálfleik. Sauðkrækingar gáfu í og leiddu 71-60 að þriðja leikhluta loknum. Heimamenn voru sterkari lengst af á lokakaflanum en Álftnesingar neituðu að gefast upp. Tindastóll leiddi með sex stigum þegar innan við mínúta var eftir en Justin James skaut gestunum í framlengingu með tveimur þristum.
Álftanes hafði ekki leitt frá því í stöðunni 0-3 í upphafi leiks en komst loks yfir framlengingunni. Tindastóll kom hins vegar til baka og vann að lokum eins stigs sigur.
Nuno Mendes (vinstri) og Ousmane Dembele (hægri) fagna marki þess síðarnefnda í kvöld.EPA-EFE / NEIL HALL
Paris Saint-Germain vann Arsenal 1-0 í fyrri leik liðanna í undanúrslitaeinvígi Meistaradeildar Evrópu í fótbolta karla.
Ousmane Dembele kom PSG yfir á 3. mínútu leiksins með skoti sem fór í stöng og inn. Mark Mikael Merino í upphafi seinni hálfleiks var dæmt af vegna rangstöðu. PSG-liðar fengu tvö upplögð marktækifæri þegar líða tók á seinni hálfleik en varamennirnir Bradley Barcola og Goncalo Romas klúðruðu þeim.
Valur leiðir 2-0 gegn ÍR í undanúrslitaeinvígi liðanna á Íslandsmóti kvenna í handbolta. Hlíðarendakonur unnu öruggan þrettán marka sigur, 19-32. Valur leiddi 9-18 í hálfleik og sigurinn var í raun aldrei í hættu.
Thea Imani Sturludóttir var markahæst með átta skot hjá Val og Katrín Tinna Jensdóttir var markahæst hjá ÍR með sex mörk. Hafdís Renötudóttir varði 12 af 24 skotum og var því með 50% markvörslu. Þar að auki var hún með tvær stoðsendingar.
Valur getur komist í úrslitaeinvígið 2. maí á Hlíðarenda. Haukar leiða einnig 2-0 í einvígi sínu gegn Fram.
Þróttur Reykjavík vann Víking Reykjavík 0-1 í leik liðanna í Bestu deild kvenna í fótbolta rétt í þessu. Kate Cousins skoraði eina mark leiksins á 21. mínútu.
Þróttur er nú jafn Val, FH og Breiðablik að stigum í efstu þremur sætunum. Breiðablik er í efsta sæti, Valur í öðru, FH í þriðja og Þróttur í fjórða sæti. Öll eru þau með sjö stig.
Íslandsmeistarar Breiðabliks unnu öruggan 7-1 sigur gegn nýliðum Fram í Bestu deild kvenna í fótbolta. Breiðablik leiddi 3-0 í hálfleik með en það voru þær Heiðdís Lillýardóttir, Andrea Rut Bjarnadóttir og Birta Georgsdóttir sem gerðu mörkin. Samantha Rose Smith skoraði fjórða markið í upphafi seinni hálfleiks. Katrín Erla Clause minnkaði muninn fyrir Fram um miðjan fyrri hálfleik, en skömmu áður hafði Sylvía Birgisdóttir fengið rautt spjald.
Mark Berglindar Bjargar Þorvaldsdóttur og tvenna Lífar Joostdóttur van Bemmel gerðu svo út um leikinn.
Breiðablik er nú í efsta sæti með sjö stig eftir þrjá leiki. Fram er án stiga í neðsta sæti.
Elín Klara í leik Fram og Hauka í úrslitum bikarkeppni kvenna í ár.RÚV / Mummi Lú
Haukar unnu Fram 25-24 í undanúrslitaeinvígi liðanna um Íslandsmeistaratitil kvenna í handbolta. Þar með leiða Haukar einvígið 2-0 en þrjá leiki þarf til að komast í úrslit.
Leikurinn var afar jafn og leiddu Haukar 10-9 þegar gengið var til búningsklefa í hálfleik. Mestur varð munurinn þrjú mörk er Haukar leiddu 12-9 í upphafi seinni hálfleiks. Að lokum vannst eins marks sigur eftir mikinn spennuleik.
Elín Klara Þorkelsdóttir átti stórleik fyrir Hauka og var hún markahæst allra með 11 mörk auk þess að gefa tvær stoðsendingar. Sonja Lind Sigsteinsdóttir var markahæst í Fram með sex mörk.
Líkur á vaxtalækkun í maí fer þverrandi að mati greiningardeildar Landsbankans. Neysla landsmanna hefur haldið áfram að aukast og húsnæðisverð að hækka, auk þess sem verðbólguvæntingar hafa ekki gefið eftir á síðustu mánuðum.
Verðbólga jókst á milli mánaða og mælist nú 4,2% en var 3,8% í síðasta mánuði.
Hagfræðingur hjá Íslandsbanka gerir hins vegar ráð fyrir að aukning verðbólgunnar hafi ekki mikil áhrif á vaxtalækkunarferli Seðlabankans.
Peningastefnunefnd tilkynnir um vaxtaákvörðun þann 21. maí, en stýrivextir standa nú í 7,75%.
Hin austurríska Claudia Wenger (vinstri) verst gegn hollensku stjörnunni Vivianne Miedema í landsleik.EPA-EFE / BART STOUTJESDIJK
FIFA mun fjármagna rannsókn við Kingston-háskóla á tengslum hormónabreytinga í tíðahring við krossbandaslit hjá knattspyrnukonum.
Tölfræðin sýnir að kvenkyns leikmenn eru á bilinu tvöfalt til sexfalt líklegri til að verða fyrir þessum meiðslum en karlmenn. Stórstjörnur eins og Vivianne Miedema, Beth Mead og Sam Kerr eru dæmi um slík meiðsli hjá stjórstjörnum í kvennafótbolta.
Rannsóknin mun fylgjast með hormónagildum leikmanna frá liðum staðsettum í London. Sérstök áhersla verður lögð á að skoða estrógen og prógesterón sem gætu haft áhrif á linleika liðbana og viðbragðstíma.
Viðgerð er lokið á tveimur ljósleiðarastrengjum sem slitnuðu við tækjahús Mílu á Laugarbakka í dag. Strengslitið hafði áhrif á heimilis- og fyrirtækjaþjónustu á Hvammstanga og Laugarbakka. Þar var meðal annars engin nettenging.
Strengslitið hafði auk þess áhrif á farsímasenda á eftirfarandi stöðum:
Haraldur Þorvarðarson hefur verið ráðinn þjálfari kvennaliðs Fram í handbolta. Haraldur mun þjálfa liðið frá og með komandi tímabili en hann tekur við af Rakel Dögg Bragadóttur. Haraldur sem sjálfur lék við góðan orðstír, meðal annars hjá Fram, hefur verið aðstoðarþjálfari karlaliðs Fram undanfarin fjögur ár.
„Hann er einn af reynslumestu þjálfurum hjá Fram og hefur áður stýrt fjölmörgum yngri flokkum hjá bæði karla- og kvennaliðum félagsins, verið yfirþjálfari yngri flokka og átt stóran þátt í þeirri öflugu uppbyggingu sem hefur átt sér stað í handknattleiksdeild félagsins,“ segir í tilkynningu frá félaginu.
Það verður skýjað í dag en úrkomulaust að kalla og bjartviðri um landið austanvert. Lægð nálgast landið úr suðvestri. Í nótt koma skilin inn yfir landið og fara allhratt yfir. Frekar hvass vindur og rigning fylgir þessum skilum.
Lægðin fer svo til austurs með suðurströndinni á morgun, þá verður vindur norðvestlægari. Það styttir víða upp um kvöldið og kólnar heldur. Spár gera þó ráð fyrir að einhver væta verði áfram á Norðurlandi, að því er segir í hugleiðingum veðurfræðings.
Rafmagn er komið aftur í lag í meirihluta Spánar og Portúgal eftir víðtækt rafmagnsleysi í gær. Rafmagn er komið á í rúmlega 99 prósentum meginlands Spánar, að því er fréttaveitan NTB greinir frá. Fréttastofa AFP hefur eftir yfirvöldum í Portúgal að rafmagn sé komið á hjá 95 prósentum landsmanna.
Ekki liggur fyrir hvað olli rafmagnsleysinu. Luis Montenegro forsætisráðherra Portúgals sagði í færslu á samfélagsmiðlum í gær að orsökina væri að finna á Spáni en skýrði það ekki nánar. Pedro Sanchez forsætisráðherra Spánar sagði allar mögulegar orsakir vera til rannsóknar.
DeAndre Kane í úrslitaeinvíginu gegn Val í fyrra.Mummi Lú
Grindvíkingar voru komnir með bakið upp við vegg í einvígi sínu við Stjörnuna. Liðin mættust í kvöld í undanúrslitaeinvígi um Íslandsmeistaratitil karla í körfubolta en Grindvíkingar höfðu betur, 91-105.
Þeir gulklæddu leiddu með sex stigum í hálfleik, 51-57. Þriðji leikhluti var svo eign þeirra og voru Grindvíkingar með 17 stiga forskot að honum lokum, 71-88.
Grindvíkingar héldu forskotinu út leikinn og unnu að lokum öruggan sigur. Undir lok leiks brutust út slagsmál meðal áhorfenda.
Afturelding vann Val í undanúrslitum um Íslandsmeistaratitilinn í handbolta karla, 29-26. Valsarar gátu með sigri farið í úrslitaeinvígið gegn Fram en Aftureldingarmenn voru á öðru máli. Staðan er nú 2-2 í einvíginu.
Heimamenn í Mosfellsbæ leiddu 16-13 í hálfleik en Valur var 10-12 yfir eftir 20 mínútna leik. Blær Hinriksson fór fyrir Aftureldingu en hann var markahæstur með níu mörk. Bjarni Selvindi var markahæstur Valsmanna með sjö mörk.
Heimaliðið hefur haft betur í öllum fjórum leikjunum hingað til.
Næsti leikur liðanna er á föstudaginn á Hlíðarenda en það er hreinn úrslitaleikur.
Valsmenn fagna marki í Bestu deildinni í ár.Mummi Lú
Víkingur Reykjavík og Valur gerðu 1-1 jafntefli í leik liðanna í Bestu deild karla í fótbolta sem lauk rétt í þessu. Helgi Guðjónsson kom Víkingum yfir eftir 22 mínútna leik úr vítaspyrnu. Danska markamaskínan Patrick Pedersen jafnaði metin á 64. mínútu en þar við sat. Þetta var fyrsti leikur Gylfa Þórs Sigurðssonar gegn Val eftir að hann yfirgaf félagið.
Víkingur er í 4. sæti með sjö stig og Valur í 5. sæti með sex stig.
Þá vann Fram öruggan 3-0 sigur á Aftureldingu þar sem Kennie Chopart, Kyle McLagan og Vuk Oskar Dimitrijevic skoruðu mörk Fram.
Með sigrinum fer Fram í sex stig og er nú í 6. sæti. Afturelding er í 8. sæti með fjögur stig.
Alex Freyr Hilmarsson leikmaður ÍBV.RÚV / Mummi Lú
Nýliðar ÍBV unnu 2-3 útisigur gegn Stjörnunni í Bestu deild karla í fótbolta. Eyjamenn komust í 2-0 með mörkum frá Omar Sowe og Bjarka Birni Gunnarssyni. Sindri Þór Ingimarsson minnkaði muninn á 36. mínútu eftir mistök hjá Marcel Zapytowski í marki ÍBV.
Oliver Heiðarsson kom ÍBV svo í 3-1 á 77. mínútu. Sindri Þór skoraði sitt annað mark í uppbótartíma en lengra komust Stjörnumenn ekki.
Stjarnan er með sex stig í 6. sæti en ÍBV komst í sjö stig og Eyjamenn eru nú jafnir Vestra í öðru sæti.
Þremur bandarískum börnum var vísað úr landi til Hondúras ásamt mæðrum sínum. Þetta segir lögfræðingur fjölskyldnanna en börnin eru tveggja, fjögurra og sjö ára gömul. Eitt barnanna er með fjórða stigs krabbamein og var flutt úr landi án samráðs við lækna.
Mæðrum barnanna var vísað úr landi en landamærastjóri Bandaríkjastjórnar, Tom Homan, sagði á blaðamannafundi í dag að mæður barnanna gætu sjálfum sér um kennt.
Börnunum hefði ekki verið brottvísað enda væru þau bandarísk, en yfirvöld hefðu ekki viljað aðskilja börnin frá foreldrum sínum. Börn sem fæðast í Bandaríkjunum fá sjálfkrafa ríkisborgararétt þótt mæður þeirra séu ekki ríkisborgarar.
Tom Homan, landamærastjóri Bandaríkjastjórnar.EPA-EFE / FRANCIS CHUNG / POOL
Tónlistartvíeykið Húbba Búbba mun gefa út lag fyrir Evrópumót kvenna í fótbolta í sumar. Lagið er gert í samstarfi við KSÍ.
„Þetta er okkar staður. Þetta er okkar stund,“ segir í texta KSÍ á samfélagsmiðlum sambandsins.
Fótboltamennirnir Eyþór Aron Wöhler og Kristall Máni Ingason mynda tvíeykið. Kristall Máni Ingason á að baki 6 A-landsleiki og Eyþór á 15 landsleiki fyrir yngri landslið.
EM fer fram dagana 2. til 27. júlí og verður sýnt á RÚV. Ísland er í riðli með Sviss, Noregi og Finnlandi.
Vladimir Pútín Rússlandsforseti hefur boðað einhliða þriggja daga vopnahlé í Úkraínu fyrir þarnæstu helgi, frá 8. til 10. maí, þegar Evrópuþjóðir minnast þess að 80 ár eru liðin frá lokum seinni heimsstyrjaldar.
Í tilkynningu frá stjórnvöldum í Kreml segir að Úkraínumenn ættu að fylgja þessu fordæmi og að Rússar muni svara í sömu mynt, verði það ekki gert.
Rússar segjast nú tilbúnir að ræða beint við stjórnvöld í Úkraínu um vopnahlé, en setja hins vegar þau skilyrði að yfirráð þeirra yfir hernumdum svæðum verði viðurkennd - þar með yfir Krímskaga.
Stjórnskipunar- og eftirlitsnefnd Alþingis heldur opinn fund á miðvikudag til að fjalla um meðferð forsætisráðuneytisins á erindi um mál Ásthildar Lóu Þórsdóttur fyrrverandi mennta- og barnamálaráðherra. Frá þessu er greint í tilkynningu frá Alþingi. Fundurinn verður opinn fjölmiðlum og almenningi.
Kona sem leitaði til forsætisráðuneytisins og greindi frá því að Ásthildur Lóa hefði eignast barn með 16 ára dreng fyrir rúmum þrjátíu árum, hefur sakað forsætisráðuneytið um trúnaðarbrest en forsætisráðherra hafnað því.
Páfakjör hefst miðvikudaginn 7. maí. Reuters greinir frá þessu og hefur eftir heimildum.
Kardinálar hafa síðustu daga safnast saman í Páfagarði. Þegar kjör hefst verða þeir læstir inn í Sixtínsku kapellunni og mega engin samskipti hafa við umheiminn. Þar verða þeir þar til nýr páfi hefur verið kjörinn, sá 267. í röðinni.
Kardinálarnir greiða atkvæði fjórum sinnum á dag þar til niðurstaða fæst. Atkvæðaseðlarnir eru brenndir og blautu heyi blandað við þá ef enginn fær tvo þriðju atkvæða, svo svartur reykur stígur upp frá skorsteini kapellunnar. Loks þegar niðurstaða verður ljós eru kjörseðlarnir einir brenndir og hvítur reykur stígur til himins.
FILE - Visitors admire the Sistine Chapel inside the Vatican Museums on the occasion of the museum's reopening, in Rome, May 3, 2021. (AP Photo/Alessandra Tarantino, file)AP / Alessandra Tarantino
Tigst Assefa frá Eþíópíu bætti heimsmet kvenna í maraþonhlaupi í Lundúnamaraþoninu í gær. Assefa kom fyrst í mark á 2 klukkustundum, 15 mínútum og 50 sekúndum og bætti með Peres Jepchirchir frá Kenía um 26 sekúndur. Fyrra metið var sett í sama hlaupi í fyrra.
Heimsmet kvenna í maraþonhlaupi eru tvískipt; annars vegar í blönduðu hlaupi karla og kvenna og hins vegar í kvennahlaupi eingöngu. Met Assefa frá í gær er met í kvennahlaupi eingöngu. Metið í blönduðu hlaupi á Ruth Chepng'etich frá Kenía. Hún hljóp Chicago-maraþonið á 2:09,56 í október síðastliðnum.
Tigst Assefa of Ethiopia celebrates after winning the women's race at the London Marathon, Sunday, April 27, 2025. (AP Photo/Alberto Pezzali)AP / Alberto Pezzali
Í dag verður frekar hæg suðlæg eða breytileg átt og gengur á með skúrum sunnan- og vestanlands. Á norðaustanverðu landinu ætti að sjást vel til sólar en þar gætu orðið síðdegisskúrir, að því er segir í hugleiðingum veðurfræðings. Hiti á bilinu 5 til 10 stig.
Heldur mildara veður á morgun, þurrt að mestu og bjart austan til. Um kvöldið og aðfaranótt miðvikudags fer síðan að rigna með stífri suðaustanátt, fyrst á Suðvesturlandi.
Það verða víða skúrir á landinu í dag.RÚV / Ragnar Visage
Selfoss tryggði sér í kvöld sæti í úrvalsdeild karla í handbolta á næsta timabili. Selfoss vann Gróttu 27-26 í fjórða leik umspilseinvígis liðanna og vann einvígið því 3-1. Grótta leikur því í 1. deild næsta vetur.
Fram leikur til úrslita um Íslandsmeistaratitil karla í handbolta. Fram hafði betur i tvíframlengdum leik gegn FH í undanúrslitunum í kvöld, 34-33, og vann einvígi liðanna því 3-1. Fram missti niður fimm marka forystu, 21-16, í seinni hálfleik og staðan var jöfn 24-24 að loknum venjulegum leiktíma. Aftur var jafnt eftir fyrri framlengingu, 28-28.
FH fékk vítakast þegar leiktíminn rann út í annarri framlengingu og hefði Símon Michael geta knúið fram vítakastkeppni með því að skora úr vítinu og jafna metin en Arnór Máni Daðason markmaður Fram varði.
Arnór Máni Daðason markvörður Fram varði vítaskot þegar leiktíminn var liðinn í seinni framlengingunni.RÚV / Mummi Lú
Fram leikur til úrslita um Íslandsmeistaratitilinn gegn annað hvort Val eða Aftureldingu.
KR fór á kostum og vann 5-0 sigur á ÍA í lokaleik dagsins í Bestu deild karla í fótbolta í kvöld. KR var 2-0 yfir í hálfleik eftir mörk frá Aroni Sigurðarsyni og Luke Rae. Matthias Præst skoraði þriðja markið um miðjan seinni hálfleik áður en Aron og Eiður Gauti Sæbjörnsson bættu tveimur mörkum við undir lokin.
KR-ingar hafa skoraði 12 mörk í fyrstu fjórum umferðunum.Mummi Lú
Þetta er fyrsti sigur KR eftir jafntefli í fyrstu þremur leikjunum en ÍA hefur nú tapað þremur leikjum í röð eftir sigur í fyrstu umferð. KR er með 6 stig, þremur stigum á eftir toppliðinu Breiðabliki.
Það verða Njarðvík og Haukar sem leika til úrslita um Íslandsmeistaratitil kvenna í körfubolta. Þetta varð ljóst í kvöld eftir að Njarðvík sópaði Keflavík úr leik í undanúrslitaeinvígi liðanna. Njarðvík hafði betur 101-89 og vann einvígið 3-0. Áður höfðu Haukar unnið undanúrslitaeinvígið gegn Val 3-0.
Brittany Dinkins fór á kostum fyrir Njarðvík í kvöld. Hún skoraði 36 stig, gaf 12 stoðsendingar og hirti 7 fráköst.Mummi Lú
Það verða því tvö efstu liðin úr deildarkeppninni sem kljást um titilinn. Haukar urðu deildarmeistarar og hafa því heimavallarréttinn en Njarðvík varð í 2. sæti í deildinni.
KA vann 3-2 sigur á FH í Bestu deild karla í fótbolta á Akureyri í kvöld. Bjarni Aðalsteinsson skoraði sigurmark KA á 84. mínútu, nokkrum sekúndum eftir að FH hafði jafnað með sjálfsmarki KA-manna. Þetta er fyrsti sigur KA sem er nú með fjögur stig í áttunda sæti en FH vermir botnsætið með aðeins eitt stig eftir fjóra leiki.
Rodri, leikmaður KA, varð fyrir því óláni að skora sjálfsmark sem jafnaði leikinn fyrir FH í 2-2.RÚV / Mummi Lú
Þriðja umferð Bestu deildar kvenna í fótbolta hófst í dag með þremur leikjum. FH komst á toppinn með 3-1 sigri á nýliðunum í FHL. Arna Eiríksdóttir skoraði tvö af mörkum FH sem er með 7 stig eins og Valskonur.
Úr leik FH og FHL í Kaplarika í dag.RÚV / Mummi Lú
Valur vann 3-0 sigur á Þór/KA og komst þannig upp fyrir FH á markatölu í toppsætið. Þór/KA er með 6 stig í þriðja sæti.
Stjarnan vann svo hádramatískan sigur á Tindastóli þar sem Jana Sól Valdimarsdóttir jafnaði fyrir Stjörnuna á 88. mínútu í 1-1. Jessica Ayers skoraði svo sigurmark Stjörnunnar á fjórðu mínútu uppbótartíma í 2-1 sigri Stjörnunnar sem er þar með komin á blað í deildinni með sín fyrstu þrjú stig.
Manchester City vann 2-0 sigur á Nottingham Forest í seinni undanúrslitaleik ensku bikarkeppninnar í fótbolta í dag. Rico Lewis skoraði fyrra markið á annarri mínútu og Josko Gvardiol bætti því seinna við í upphafi seinni hálfleiks. Leikið var á Wembley-leikvanginum í Lundúnum.
Josko Gvardiol fagnar markinu sínu í dag.EPA-EFE / VINCE MIGNOTT
Manchester City leikur til úrslita um bikarinn við Crystal Palace 17. maí. Palace vann 3-0 sigur á Aston Villa í fyrri undanúrslitaleiknum í gær.
Breiðablik vann 1-0 útisigur á Vestra í fyrsta leik fjórðu umferðar Bestu deildar karla í fótbolta sem fram fór á Ísafirði í dag. Höskuldur Gunnlaugsson skoraði sigurmarkið á 71. mínútu. Guy Smit markmaður Vestra varði vítaspyrnu frá Tobias Thomsem í uppbótartíma.
Breiðablik er komið á toppinn.RÚV / Mummi Lú
Þetta er fyrsta tap Vestra í deildinni í sumar og með sigrinum komst Breiðablik upp fyrir Vestra í toppsæti deildarinnar. Blikar eru með 9 stig en Vestri 7 stig.
Þrír leikir fara fram í deildinni í dag og í kvöld. KA og FH mætast kl. 16:15 og KR og ÍA klukkan 19:15.
Karla- og kvennalið ÍBV í handbolta fá bæði mikinn liðsstyrk fyrir næsta tímabil því handboltaparið Sandra Erlingsdóttir og Daníel Þór Ingason er á leið heim frá Þýskalandi til ÍBV.
Facebook / Handknattleiksdeild ÍBV
Sandra hefur undanfarin ár leikið með Tus Metzingen og Daníel með HBW Balingen-Weilstetten. Þau hafa bæði skrifað undir tveggja ára samning við ÍBV eins og greint er frá á Facebook síðu handknattleiksdeildar ÍBV. Daníel á að baki 39 A-landsleiki og Sandra 35 A-landsleiki.
Rasmus Højlund skoraði á sjöttu mínútu í uppbótartíma og tryggði Manchester United 1-1 jafntefli gegn Bournemouth í ensku úrvalsdeildinni í fótbolta í dag. Daninn hafði ekki skorað mark í deildinni síðan 16. mars. Bournemouth komst yfir á 23. mínútu með marki Antoine Semenyo en lék manni færri frá 68. mínútu þegar Evanilson fékk rautt spjald.
Evanilson fékk rautt spjald í seinni hálfleik.AP/PA / Adam Davy
Man Utd hefur nú leikið fimm deildarleiki í röð án sigurs og er í 14. sæti með 39 stig. Bournemouth er með 50 stig í tíunda sæti.
Liverpool getur orðið Englandsmeistari í dag með jafntefli eða sigri gegn Tottenham.
Jarðskjálfti 3,5 að stærð varð í Bárðarbungu laust eftir hádegi í dag. Minney Sigurðardóttir, náttúruvársérfræðingur á Veðurstofunni, segir að skjálftar sem þessir séu algengir í Bárðarbungu og ekki fyrirboði neins. Í gær mældist skjálfti af stærðinni 3,2 í Bárðarbungu.
Útlit er fyrir fremur hægan vind og mögulega einhverjar skúrir á Suður- og Vesturlandi í dag. Það verður þurrt að mestu og víða bjartviðri norðan- og austanlands. Einhver þokuslæðingur úti við sjóinn.
Á morgun má gera ráð fyrir að einhverjar rigningarskúrir nái norður yfir heiðar. Annars svipað veður og í dag. Hiti á bilinu 6 til 12 stig yfir daginn. Á þriðjudag verður lítil úrkoma og víða bjart eystra. Um kvöldið má búast við vaxandi suðaustanátt með rigningu sunnan- og vestanlands.
Búast má við ágætis veðri á mest öllu landinu í dag og á morgun.RÚV / Bjarni Rúnarsson
Donald Trump Bandaríkjaforseti vill að bandarísk skip fái að sigla um Panamaskurðinn og Súesskurðinn að kostnaðarlausu og ætlar að fela utanríkisráðherra að koma því í kring sem allra fyrst. Þetta sagði hann í færslu á samfélagsmiðli sínum Truth Social í gærkvöld.
Trump hefur mánuðum saman sagt nauðsynlegt að Bandaríkin fái yfirráð yfir Panamaskurðinum að nýju en hefur ekki rætt sérstaklega um Súesskurðinn í Egyptalandi til þessa.
Í færslu sinni í gær sagði hann að hvorugur skurður hefði orðið að veruleika án aðkomu Bandaríkjanna. Því ættu bandarísk flutninga- og herskip að fá að sigla frjálst og að kostnaðarlausu um báða skipaskurðina.
Donald Trump á Newark-flugvelli í gær.AP / Evan Vucci
Haukar tryggðu sæti sitt í úrslitaeinvíginu með 79-64 sigri gegn Val. Þar með unnu Haukar undanúrslitaeinvígið 3-0.
Leikurinn var nokkuð jafn lengst af en Valur náði þó ellefu stiga forskoti í öðrum leikhluta, 29-40. Haukar minnkuðu muninn í 37-40 og tóku svo frumkvæðið í seinni hálfleik. Að lokum vannst fimmtán stiga sigur.
Lið Hauka leiðir í undanúrslitaeinvíginu gegn Fram í Íslandsmóti kvenna í handbolta. Haukar unnu sannfærandi sigur á útivelli í kvöld, 30-18.
Haukar voru sjö mörkum yfir í hálfleik, 17-10. Munurinn var orðinn tíu mörk um miðjan seinni hálfleik, 23-13. Að lokum vannst tólf marka sigur.
Það lið sem fyrr vinnur þrjá leiki fer í úrslitaeinvígið.
Þá jafnaði Afturelding metin gegn Stjörnunni í umspili um sæti í efstu deild á næsta tímabili. Lið Aftureldingar er úr næstefstu deild og vann 28-22 sigur gegn efstu deildar liði Stjörnunnar.
Palace menn fagna fyrsta markinu.EPA-EFE / Tolga Akmen
Crystal Palace vann öruggan 3-0 sigur gegn Aston Villa í undanúrslitum ensku bikarkeppni karla í fótbolta. Eberechi Eze kom Palace yfir á 31. mínútu. Mateta klúðraði víti á 53. mínútú en Ismaila Sarr skoraði tvö mörk á 58. mínútu og í uppbótartíma leiksins.
Manchester City mætir Nottingham Forest í hinum undanúrslitaleiknum á morgun.
Valur vann stórsigur gegn ÍR í leik liðanna í undanúrslitum Íslandsmóts kvenna í handbolta í dag. Leiknum lauk með 21 marks mun, þar sem Valur vann 33-12 sigur.
Valur byrjaði leikinn af miklum krafti og komst 13-1 yfir. Heimakonur leiddu 19-3 í hálfleik.
Þetta var fyrsti leikur liðanna í undanúrslitaeinvíginu. Næsti leikur fer fram á heimavelli ÍR á þriðjudaginn. Vinna þarf þrjá leiki til að komast í úrslit.
Sinueldur kviknaði við Húsafell um hádegi í dag og virtist ætla að dreifa úr sér. Bjarni Þorsteinsson, varaslökkviliðsstjóri Slökkviliðs Borgarbyggðar, segir slökkvilið hafa verið ljónheppið með að það byrjaði að rigna fyrir skemmstu, sem auðveldar slökkvistörf heilmikið. Fram að því gekk slökkviliðinu vel segir hann, en eldurinn var að verða töluverður áður en byrjaði að rigna.
Chelsea menn fagna marki Jackson.EPA-EFE / ISABEL INFANTES
Chelsea vann Everton 1-0 í leik liðanna í ensku úrvalsdeild karla í fótbolta. Nicholas Jackson skoraði eina mark leiksins á 27. mínútu eftir stoðsendingu Enzo Fernandez.
Chelsea fer því upp í 4. sæti með 60 stig en Everton er í 13. sæti með 38 stig. Nottingham og Newcastle eiga tækifæri á að komast upp fyrir Chelsea en liðin eiga leik til góða. Forest er með 60 stig í 5. sæti og Newcastle með 59 stig í 6. sæti. Önnur úrslit:
Brighton 3 - 2 West Ham Newcastle 3 - 0 Ipswich (Fall Ipswich er nú endanlega staðfest) Southampton 1 - 2 Fulham Wolves 3 - 0 Leicester
Í dag verður sunnan- og suðaustanátt á bilinu 5 til 10 metrar á sekúndu. Einnig verður skýjað og væta öðru hverju sunnan- og vestanlands en bjart á norðvestanverðu landinu. Hiti á bilinu 7 til 15 stig og má gera ráð fyrir að hlýjast verði norðaustantil.
Ekki verða miklar breytingar á veðrinu á morgun en vindur verður örlítið hægari. Rigningarskúrir verða á víð og dreif en síst á Norður- og Austurlandi. Hiti verður þá á bilinu 6 til 12 stig yfir daginn.
Byggakur á Þorvaldseyri að vori til. Mynd úr safni.RÚV / Kveikur
Rússneskur hershöfðingi, Yaroslav Moskalik, féll í sprengingu í bíl nærri Moskvu, höfuðborg Rússlands, í gær. Að sögn rússneskra yfirvalda hafði heimatilbúinni sprengju verið komið fyrir í bílnum, sem lagt hafði verið nærri heimili hans. Bíllinn hafi sprungið þegar Moskalik gekk fram hjá honum.
Yfirvöld hafa sprenginguna til rannsóknar. Enginn hefur lýst ábyrgð á henni en Dmitry Peskov, talsmaður stjórnvalda í Kreml, kenndi Úkraínumönnum um að hafa staðið að henni.
Árásin líkist fyrri árásum á rússneska embættismenn, til að mynda hershöfðingjann Igor Kirilov sem var drepinn í sprengingu í desember í fyrra.
