Í dag má búast við hægum vindi í kringum 2 metra á sekúndu. Dálítil væta vestantil á landinu en yfirleitt þurrt austantil.

Á morgun má búast við aðeins meiri vindhraða víðast hvar um landið eða um 2 til 5 metrum á sekúndu. Súld eða lítils háttar rigning sunnan- og vestanlands. Bjartviðri á Norður- og Austurlandi.

Útlit er fyrir að veður verði nokkuð svipað fram á mánudag.

Slökkvilið höfuðborgarsvæðisins var kallað út skömmu eftir klukkan eitt í nótt eftir að eldur kom upp í bíl á bílastæði verslunarinnar Fjarðarkaups í Hafnarfirði. Að sögn varðstjóra slökkviliðsins gekk slökkvistarf fljótt fyrir sig en bíllinn er ónýtur.

Hann sagði eiganda bílsins hafa tilkynnt um eldinn og að slökkvilið hefði komið á staðinn á örskotsstundu, enda er slökkvistöðin í Skútahrauni aðeins steinsnar frá versluninni. Ekki er ljóst hvort eigandinn hafi verið inni í bílnum þegar eldurinn kom upp en engan sakaði að sögn varðstjóra.

Eldsupptök eru ókunn.

Milljónir voru án rafmagns á Kúbu í gærkvöld og nótt þegar raforkudreifikerfi landsins hrundi. Rafmagn lá niðri á stórum svæðum í höfuðborginni Havana og víðar í vesturhluta ríkisins.

Kúbverjar hafa staðið frammi fyrir reglulegu rafmagnsleysi undanfarna mánuði. Rafdreifikerfi landsins er víða úrelt og illa við haldið. Þá hafa eldsneytisskortur, náttúruhamfarir og bágt efnahagsástand síðustu misseri ýtt enn frekar undir vandann.

Starfsmaðurinn, sem slasaðist þegar öryggi sprakk í aðveitustöð í álveri Norðuráls á Grundartanga í dag, virðist ekki vera alvarlega slasaður.

Þetta staðfestir Sólveig Bergmann upplýsingafulltrúi Norðuráls en hún segir starfsmanninn hafa verið fluttan til aðhlynningar á sjúkrahúsi. Mikil mildi sé að ekki fór verr.

Önnur af tveimur kerlínum álversins hefur legið niðri frá því um fjögurleytið í dag en Sólveig segir að verið sé að keyra upp rafmagn á línuna. Það geti tekið nokkra stund en búist sé við að viðgerð ljúki í kvöld.

Matvælaáætlun Sameinuðu þjóðanna (WFP) hefur ekki getað sent neinar matarbirgðir til Gaza síðan 2. mars. Ástæðan er sú að Ísrael hefur síðan þá lokað fyrir allar slíkar flutningaleiðir inn á Gaza.

Matarbirgðir á Gaza duga fyrir eldhús hjálparsamtaka og bakarí í mánuð í viðbót, samkvæmt stofnuninni. Þá eru til máltíðir sem duga 550.000 manns í tvær vikur.

Stofnunin lýsir einnig yfir áhyggjum af matarskorti á Vesturbakkanum þar sem Ísraelar hafa hert árásir síðustu vikur, með þeim afleiðingum að fólk hefur hrakist af heimilum sínum og hefur takmarkaðan aðgang að mat.

Leit hefur verið hætt í Borgarnesi eftir að tilkynnt var um að eitthvað óþekkt hefði sést í sjónum við bæinn í gærkvöldi. Þetta staðfestir Ásmundur K. Ásmundsson yfirlögregluþjónn hjá Lögreglunni á Vesturlandi. Björgunarsveitir á Vesturlandi voru kallaðar út á níunda tímanum í gærkvöldi og leit var frestað á miðnætti.

Jón Þór Víglundsson, upplýsingafulltrúi Landsbjargar, segir að rekald hafi fundist og ekki sé hægt að útiloka að það hafi villt fólki sýn.

Fréttin og fyrirsögnin var uppfærð með upplýsingum frá lögreglu um að leit hafi verið hætt.

Í dag er búist við suðvestan átt 5-10 metrum, en 10-15 á norðanverðu landinu. Það verður skýjað að mestu og lítils háttar væta af og til. Yfirleitt bjart veður um landið austanvert, hiti 3-8 stig.

Það dregur aðeins úr vindi á morgun, suðlæg átt 5-10 metrar um hádegi. Lítils háttar rigning eða súld í flestum landshlutum en þurrt að kalla norðaustanlands. Áfram milt í veðri og hiti 5-10 stig.

Á sunnudag og mánudag hvessir, sunnan 10-18 metrar en hægari austantil. Dálítil væta sunnan- og vestantil en léttskýjað á Norðausturlandi. Hiti breytist lítið.

Rúmlega 170 farþegar þurftu að yfirgefa flugvél í Denver í Colorado með hraði skömmu eftir lendingu þegar eldur kom upp í vélinni í gærkvöld. Sex voru fluttir til skoðunar á sjúkrahúsi.

Vélin var á leið frá Colorado Springs til Texas en var lent í Denver vegna titrings í vél hennar. Í myndskeiðum sem birt voru á samfélagsmiðlum sést hvernig farþegar stóðu á væng flugvélarinnar áður en þeim var komið niður.

Flugmálayfirvöld rannsaka tildrög eldsins.

Menntaskólinn við Hamralíð hafði betur gegn Menntaskólanum í Reykjavík í kvöld og er þar með komið í úrslit Gettu betur, 27. mars 2025. Liðið mætir þar Menntaskólanum á Akureyri.

Keppendur í liði Menntaskólans við Hamrahlíð eru Atli Ársælsson, Valgerður Birna Magnúsdóttir og Flóki Dagsson. Keppendur í liði Menntaskólans í Reykjavík eru Björn Diljan Hálfdánarson, Davíð Birgisson og Dóróthea Margrét Jakobsdóttir.

Björgunarsveitir af Vesturlandi voru kallaðar út um klukkan hálf níu í kvöld vegna tilkynningar um að eitthvað óþekkt hefði sést í sjónum við Borgarnes. Jón Þór Víglundarson, upplýsingafulltrúi Slysavarnarfélagsins Landsbjargar, staðfestir að björgunarsveitarmenn séu við störf vestan við Borgarnes.

Það liggur ekki fyrir hvers konar leit stendur yfir eða hvers eðlis viðbúnaður viðbragðsaðila er. Þá var ekki unnt að veita frekari upplýsingar þegar fréttastofa hafði samband við Landsbjörg.

Alríkisdómari í Kaliforníu hefur úrskurðað að sex bandarískar ríkisstofnanir skuli endurráða starfsmenn sína sem var sagt upp í hagræðingarskyni, í samræmi við áherslur Bandaríkjastjórnar Donalds Trumps. Dómarinn, William Alsup, segir uppsagnirnar hafa verið ólögmætar.

Fjölmiðlafulltrúi Hvíta hússins, Karoline Leavitt, segir í yfirlýsingu að Alsup fari fram úr sér. Hann hafi ekki heimild til þess að hafa afskipti af framkvæmdarvaldi forsetans. Hún bætir við að bandarísk stjórnvöld muni tafarlaust „berjast gegn þessari fráleitu ákvörðun“, sem þau telja að brjóti í bága við stjórnarskrána.

Einn var handtekinn í dag vegna rannsóknar lögreglu á manndrápsmáli í Þorlákshöfn í vikunni. Þetta kemur fram í færslu sem lögreglan á Suðurlandi birtir á Facebook. Áður hafði komið fram að lögregla væri að leita að einum manni vegna málsins. Ekki er þó staðfest í færslunni að sá handtekni sé hinn sami.

Alls hafa níu manns verið handteknir vegna rannsóknarinnar; fimm verið sleppt en þrír úrskurðaðir í gæsluvarðhald, tveir karlar og ein kona. Ekki hefur verið tekin ákvörðun um hvort farið verði fram á gæsluvarðhald yfir þeim sem var handtekinn í dag.

Reykjavíkurborg ætlar að auglýsa eftir varanlegum rekstraraðila fyrir almenningsmarkað í Kolaportinu, að því gefnu að samningar náist við ríkið um áframhaldandi húsaleigusamning. Þetta var samþykkt í borgarráði í dag.

Óvissa hefur verið um framtíð Kolaportsins eftir að félagið sem sá um reksturinn fór í þrot. Borgin leigir rýmið, sem er í Tollhúsinu við Tryggvagötu, af íslenska ríkinu.

Halla Gunnarsdóttir var kjörinn formaður VR með 48% atkvæða.

Atkvæðagreiðslu vegna kjörs formanns og stjórnar VR lauk í hádeginu. Atkvæðagreiðslan var rafræn og hófst fyrir réttri viku.

Þorsteinn Skúli Sveinsson var annar með 21% atkvæða, Flosi Eiríksson fékk tæp 17% atkvæða og Bjarni Þór Sigurðsson 13%.

Alls greiddi 9.581 atkvæði, en ríflega 40 þúsund manns eru í VR. Kjörsókn var því innan við 25%.

Sjö voru kosin í stjórn VR: Svanhildur Ólöf Þorsteinsdóttir, Ólafur Reimar Gunnarsson, Andrea Rut Pálsdóttir, Karl F. Thorarensen, Jennifer Schröder, Styrmir Jökull Einarsson og Selma Björk Grétarsdóttir.

Donald Trump Bandaríkjaforseti hótar að leggja 200% toll á evrópskt vín og aðra áfenga drykki. Þetta skrifar hann á samfélagsmiðil sinn Truth Social.

Evrópusambandið tilkynnti í gær um toll á bandarískt viskí upp á 50% en tollaáform Evrópusambandsins eru svar við tollum Bandaríkjanna á stál og ál sem tóku gildi í gær.

Í yfirlýsingu á Truth Social ítrekar Trump þá skoðun sína að Evrópusambandið sé fjandsamlegt í garð Bandaríkjanna og segir bandalagið hafa verið myndað til þess að klekkja á Bandaríkjunum.

Volodymyr Zelensky Úkraínuforseti vonar að Bandaríkjamönnum takist að sannfæra Rússa um að fallast á vopnahlé í Úkraínu. Úkraínumenn hafa þegar samþykkt 30 daga vopnahlé en ráðgjafi Rússlandsforseta lýsti því yfir í morgun að vopnahlé myndi ekki gera annað en veita Úkraínuher andrými. Rússar vildu að hagsmunir þeirra væru tryggðir.

Zelensky skrifaði í færslu á samfélagsmiðlum í morgun að úr því að ekki hefði komið neitt afgerandi svar frá Rússum þýddi það að þeir vildu berjast áfram. Heimurinn hefði beðið í meira en sólarhring eftir svari.

Sendinefnd á vegum Bandaríkjastjórnar er komin til Moskvu og fundar með rússneskum embættismönnum í dag.

Margir vörðu nóttinni úti við í borginni Napólí og nágrenni eftir að jarðskjálfti 4,4 að stærð reið yfir klukkan 01:25 að staðartíma. Fólk dvaldi ekki í húsum sínum af ótta við frekari skjálfta og var því í bílum sínum eða á götum úti.

Skjálftinn varð á um þriggja kílómetra dýpi. Einn slasaðist bænum Pozzuoli þegar hús hrundi að hluta. Bærinn er nálægt upptökum skjálftans. Rafmagnslaust varð í sumum hlutum Napólí eftir skjálftann sem fannst víða í Campania-héraði. Tveir minni eftirskálftar fundust.

Verið er að meta skemmdir. Skólastarf verður fellt niður á nokkrum stöðum í dag á meðan verið er að meta ástand bygginga.

Það verður norðlæg átt á landinu í dag, 5-10 metrar á sekúndu, él á norðaustanverðu landinu en bjart að mestu sunnanlands. Hægari síðdegis og léttir til norðaustanlands. Hiti að átta stigum, hlýjast syðst. Smám saman snýst í suðlægða átt og kólnar í kvöld.

Á morgun verður suðvestanátt, yfirleitt 8-15 metrar en hægari sunnan til. Dálítil súld og rigning á vestanverðu landinu en bjart að mestu austanlands, hiti 4-9 stig.

Á laugardag dregur úr sunnanáttinni og verða 5-10 metrar síðdegis. Áfram er væta með köflum á vestanverðu landinu en léttskýjað austan til og hlýtt í veðri. Á sunnudag má gera ráð fyrir suðlægri átt, 10-18 metrum, hiti 5-10 stig.

Skjálfti af stærðinni 3,5 reið yfir sunnan við Reykjanestá klukkan 23:25 í kvöld. Að sögn Veðurstofu Íslands tilheyrir hann hrinunni sem hófst á svæðinu fyrr í dag. Dregið hafi úr hrinunni fyrr í kvöld en virkni aukist aftur fyrir miðnætti. Um 300 skjálftar hafa mælst á svæðinu í dag, þar af um fjórir yfir 3 að stærð.

Jarðskjálftarnir eru mögulega gikkskjálftar vegna breytinga á spennusviði á Reykjanesskaga samhliða jarðhræringum þar síðustu ár. Þrýstingur af völdum kviku er orðinn mikill undir Svartsengi og samkvæmt útreikningum sérfræðinga Veðurstofunnar hefur rúmmál hennar aldrei verið meira síðan goshrinan hófst í desember 2023.

Berklasmit hefur greinst á Fáskrúðsfirði. Í tilkynningu frá Heilbrigðisstofnun Austurlands segir að smitrakning standi yfir en sá smitaði fær meðhöndlun á Heilsugæslunni í Fjarðabyggð.

Berklar eru smitsjúkdómur af völdum sýkils sem hefur áhrif á öndunarfæri. Á vef Heilsuveru segir að nokkur berklasmit greinist árlega á Íslandi.

Fjárfestingafélagið Skel hefur eignast tíu prósenta hlut í fjarskipta- og fjölmiðlafyrirtækinu Sýn. Lífeyrissjóður verslunarmanna seldi í gær rúmlega fimm prósenta hlut í fyrirtækinu og viðskipti með hlutabréf hafa haldið áfram í dag. Hlutabréfaverð hefur hækkað um 20 prósent það sem af er degi.

Skel er því meðal stærstu eigenda Sýnar eftir síðustu viðskipti.

Jón Ásgeir Jóhannesson er stjórnarformaður Skeljar. Ingibjörg Pálmadóttir er meðal stærstu hluthafa í félaginu. Þau áttu áður fjölmiðlafyrirtækið 365 sem seldi Sýn Stöð 2, Bylgjuna, Vísi og fleiri fjölmiðla árið 2017.

Öflug skjálftahrina hófst við Reykjanestá um klukkan hálf þrjú í dag. Hátt í sextíu skjálftar hafa mælst og virkni heldur áfram, segir í tilkynningu frá náttúruvárvakt Veðurstofunnar.

Líklega eru fjórir skjálftar um og yfir 3 að stærð, sá stærsti um 3,5.

Jóhanna Malen Skúladóttir, náttúruvársérfræðingur á Veðurstofunni, segir í samtali við fréttastofu ákafar skjálftahrinur líkt og þessa vera algengar á þessum stað.

„Jarðskjálftarnir eru mögulega gikkskjálftar vegna breytinga á spennusviði á Reykjanesskaganum samhliða jarðhræringum þar síðustu ár. Sólarhringsvakt VÍ heldur áfram að vakta svæðið vel,“ segir í tilkynningu Veðurstofu.