Árásir voru gerðar í nokkrum fangelsum í Frakklandi í nótt og í morgun. Þetta staðfesti Gérald Darmain dómsmálaráðherra Frakklands í færslu á X. Hann sagði að árásirnar hefðu beinst að því að hræða starfsmenn fangelsanna og í þeim hefði bæði verið kveikt í bílum og hleypt af skotvopnum.

Árásir áttu sér stað í fangelsum á minnst fimm stöðum í Frakklandi, auk þess sem kveikt var í bíl sem lagt var við hús dómara í Marseille.

Darmain gaf í skyn í færslunni að árásirnar tengdust baráttu gegn fíkniefnasmygli. Hann ætlar að heimsækja eitt fangelsanna, í Toulon, í dag til að styðja fangelsisyfirvöld þar.

Stór aðgerð tyrknesku lögreglunnar gegn skipulagðri glæpastarfsemi í morgun leiddi til þess að 234 voru handteknir. Níu þeirra voru teknir erlendis.

Þeir handteknu eru grunaðir um fíkniefnasmygl til Evrópu og peningaþvætti. 21 tonn af fíkniefnum var gert upptækt í aðgerðunum. Að sögn Ali Yerlikaya innanríkisráðherra Tyrklands skipulögðu glæpasamtökin smygl á kókaíni frá Suður-Ameríku, heróíni frá Íran og Afganistan og kannabisefnum gegnum Balkanlöndin.

Norðaustlæg átt verður á landinu í dag og víða á bilinu 8 til 15 metrar á sekúndu. Snjókoma eða slydda með köflum á Norður- og Austurlandi. Dregur úr ofankomu norðvestanlands með morgninum. Þó má búast við einhverjum éljum þar í dag.

Þurrt að mestu sunnan heiða.

Hitastig verður frá frostmarki norðaustantil upp í 9 stig við suðurströndina.

Á morgun verður svipað veður og snjókomubakki gengur inn yfir Austurland. Þar má bússt við talsverðri ofankomu fram eftir degi. Norðan kaldi eða strekkingur á fimmtudaginn og él um landið norðanvert. Á föstudag og laugardag er gert ráð fyrir hæglætisveðri um mestallt landið.

Tveir menn voru skotnir til bana í Gautaborg í Svíþjóð í nótt. Frá þessu greinir sænska ríkissjónvarpið, SVT. Á vef þess segir að enginn hafi verið handtekinn og ekkert sé vitað um tilefni árásarinnar.

Lögregla hafi verið kölluð til eftir að tilkynnt var um byssuskot. Mennirnir hafi fundist særðir á vettvangi og fluttir á sjúkrahús, þar sem þeir létust. Annar þeirra var tvítugur og hinn 25 ára.

Lögreglan sagði engan liggja undir grun. Rannsókn héldi áfram í dag og óskað væri eftir því að fólk hefði samband, byggi það yfir upplýsingum sem gætu komið að gagni við rannsóknina.

Nemendur hins gjaldþrota Kvikmyndaskóla Íslands ætla ekki að þiggja boð um að halda námi sínu áfram við Tækniskólann, líkt og menntamálaráðherra hafði boðið þeim að gera. Fulltrúar nemenda sátu fund með stjórnendum Tækniskólans í dag þar sem tillögur um framhald námsins voru kynntar.

Að mati nemenda voru tillögurnar óljósar, illa ígrundaðar og uppfylltu ekki eðlilegar kröfur nemenda. Af þeim sökum hafna nemendur Kvikmyndaskólans tillögunum og fara þeir fram á viðræður við menntamálaráðherra um lausn þeirra mála.

Jarðskjálfti af stærðinni 5,2 reið yfir suðurhluta Kaliforníu klukkan tíu í morgun. Skjálftinn varð norðaustur af San Diego, um fjóra kílómetra suður af bænum Julian, og mældist á tæplega 13 kílómetra dýpi.

Í yfirlýsingu á samfélagsmiðlinum X sagði Gavin Newsom ríkisstjóri Kaliforníu að verið væri að meta skemmdir í kjölfar skjálftans. Fréttir hafa ekki borist af slysum á fólki né miklu tjóni vegna skjálftans. Íbúar í suðurhluta Kaliforníu fengu skilaboð um að leita skjóls í kjölfar skjálftans en Veðurstofa Bandaríkjanna reiknaði ekki með flóðbylgju vegna hans.

Nayib Bukele, forseti El Salvador, sagðist ekki ætla að senda mann aftur til Bandaríkjanna, sem var vísað þaðan fyrir mistök. Þetta sagði hann á fundi með Donald Trump Bandaríkjaforseta í Hvíta húsinu í dag. Maðurinn, sem heitir Kilmar Abrego Garcia, var sendur úr landi í ofurfangelsi í El Salvador fyrr í þessum mánuði, þrátt fyrir að hafa hlotið vernd gegn brottvísun frá Bandaríkjunum 2019. Bukele sagðist ekki hafa heimild til að senda García aftur til Bandaríkjanna. Hæstiréttur Bandaríkjanna hefur skipað Bandaríkjastjórn að liðka fyrir komu García aftur til landsins þar sem honum var vísað úr landi án tilhlýðilegrar málsmeðferðar.

Framkvæmdir við nýjan leikskóla við Skólatröð í Kópavogi eru að hefjast. Áætlað er að leikskólinn verði tekinn í notkun haustið 2027.

Í leikskólanum verða þrjár deildir fyrir nemendur á aldrinum 2-6 ára og miðað er við að fjöldi barna verði um 60 mestan hluta dagsins, að því er segir í tilkynningu frá Kópavogsbæ. Gert er ráð fyrir 15-20 stöðugildum í leikskólanum.

Í deiliskipulaginu er gert ráð fyrir að á lóðinni verði byggður þriggja deilda leikskóli á einni hæð. Áður stóð til að byggja leikskóla á tveimur hæðum með fjórum deildum en nágrannar lýstu þungum áhyggjum í umsögn um leikskólann, en þeir óttuðust að byggingin yrði yfirþyrmandi.

Skráðum í þjóðkirkjuna hefur fækkað um um 286 síðan 1. desember. Þjóðkirkjan er þó enn langfjölmennasta trú- og lífsskoðunarfélag landsins samkvæmt nýjum tölum Þjóðskrár Íslands með 224.677 skráða meðlimi.

Næst fjölmennast er Kaþólska kirkjan með 15.621 skráða meðlimi og í þriðja sæti er Fríkirkjan í Reykjavík með 9.945 skráða meðlimi.

Frá 1. desember til 1. apríl fjölgaði mest í Siðmennt, um 100 meðlimi.

30.854 voru skráðir utan trú- og lífsskoðunarfélaga og 90.655 einstaklingar voru með ótilgreinda skráningu. Fólkið í síðargreinda hópnum hefur ekki tekið afstöðu til skráningar í trú- eða lífsskoðunarfélag.

Gul viðvörun er í gildi á norðanverðu landinu og Vestfjörðum vegna hríðarveðurs. Búast má við lélegu skyggni og slæmum akstursskilyrðum þar í dag.

Viðvaranir verða í gildi fram á kvöld og falla úr gildi klukkan 21:00.

Búast má við norðanátt, þrettán til tuttugu metrum á sekúndu, en dregur smám saman úr vindi eftir hádegi, fyrst austantil á landinu. Snjókoma eða slydda, en úrkomulítið á sunnanverðu landinu og einnig austanlands síðdegis. Hiti núll til sex stig í dag, hlýjast sunnanlands. Á morgun má gera ráð fyrir norðaustanátt, 8 til 15 metrum á sekúndu. Él norðan og austanlands en bjartviðri sunnan heiða. Hlýnar lítillega.

Ófært er um Steingrímsfjarðarheiði, Klettsháls og Dynjandisheiði á Vestfjörðum. Þar eru bílar fastir og nær ekkert skyggni, að því er fram kemur á vef Vegagerðarinnar.

Þar segir einnig að þæfingur sé á Þröskuldum, Gemlufallsheiði og í Súgandafirði og skafrenningur. Þá séu hálkublettir á nokkrum vegum.

Vert er að kanna vel færð og veður áður en lagt er af stað. Upplýsingar um færð á vegum má finna á vef Vegagerðarinnar, umferðin.is.

Stefnt er á að hefja undirbúningsframkvæmdir við Kvíslatunguvirkjun í sumar. Stjórn Orkubús Vestfjarða ákvað formlega að sækja um virkjunarleyfi á síðasta fundi.

Virkjunin verður 9,5 MW og hefur farið í umhverfismat. Beðið er endanlegrar staðfestingar aðalskipulags Strandabyggðar. Skipulagið tekur til 1450 hektara og nær yfir stöðvarhús, efnistökusvæði í Selárdal og lóna og veitusvæða á hálendinu vestan Selárdals. Kvíslatunguvirkjun verður dýrasta verkefni Orkubúsins og kostar sjö milljarða króna. Áætlað er að hún byrji að framleiða raforku í lok árs 2027.

Á þriðja hundrað manns dvelja ólöglega á Íslandi. Nokkuð algengt er að lögreglan á höfuðborgarsvæðinu hafi afskipti af fólki sem tilheyrir þessum hópi við hefðbundið eftirlit. Greint er frá þeim tilvikum í dagbókaryfirliti lögreglunnar. Síðast gerðist það aðfaranótt föstudags. Ef ekki er grunur um annað brot er viðkomandi gert skylt að tilkynna sig á lögreglustöð annan eða þriðja hvern dag.

Samkvæmt upplýsingum frá heimferðar- og fylgdardeild ríkislögreglustjóra voru 222 þann 1. apríl á lista yfir þá sem dvelja hér ólöglega. Nokkur árangur hefur náðst að undanförnu við að finna fólk og koma úr landi samkvæmt lögum.

Slökkvilið landsins hafa sinnt rúmlega tvöfalt fleiri útköllum vegna óveðurs það sem af er ári en allt síðasta ár. Þetta kemur fram í samantekt á vef Húsnæðis- og mannvirkjastofnunar. Alls voru 37 útköll vegna óveðurs á fyrsta ársfjórðungi 2025 en þau voru alls 16 árið 2024.

Útköllum vegna vatnstjóns fjölgaði einnig töluvert. Þau voru 158 á fyrsta ársfjórðungi þessa árs en 94 á sama tímabili í fyrra.

Í samantektinni segir einnig að árið 2025 stefni í að verða metár í útköllum tengdum flugeldum. Það sem af er ári hafa slökkvilið landsins sinnt 13 útköllum vegna flugelda og hafa þau ekki verið fleiri síðan 2019 þegar þau voru 15 yfir árið.

Slökkviliðsaðgerðum er lokið við Bólstaðarhlíð í Reykjavík þar sem eldur kviknaði í bílskúr nú undir kvöld. Talsvert viðbragð var á staðnum en vel gekk að slökkva eldinn.

Sigurjón Ólafsson hjá Slökkviliði höfuðborgarsvæðisins segir að eldur hafi komist í þak bílskúrsins og því hafi þurft að rífa hluta þaksins til að slökkva hann.

Lögreglu hefur verið afhendur vettvangur til rannsóknar.

Veðurstofa Íslands hefur gefið út gula viðvörun vegna norðanhríðar í þremur landshlutum á morgun. Fyrsta viðvörunin tekur gildi á Austfjörðum klukkan sex í fyrramálið. Sú næsta tekur gildi á Austurlandi að Glettingi klukkan 11 og loks á Norðurlandi eystra klukkan 14. Viðvaranirnar gilda til miðnættis annað kvöld.

Búast má við lélegu skyggni og versnandi akstursskilyrðum. Fólki er bent á að sýna varkárni og fylgjast með veðurspám.

Slökkvilið höfuðborgarsvæðisins er að stöfum í Bólstaðarhlíð vegna elds sem kom upp í bílskúr. Samkvæmt upplýsingum frá slökkviliðinu er að mestu búið að ná tökum á eldinum.

Enginn var inni í bílskúrnum þegar slökkvilið bar að garði.

Eins og sjá má á þessari mynd voru minnst þrír slökkvibílar kallaðir út og þrír sjúkrabílar.

Ökumaður var handtekinn á sjöunda tímanum í morgun eftir að hann missti stjórn á bifreið sinni í Skarphéðinsgötu í Reykjavík með þeim afleiðingum að hún endaði á hliðinni. Tjón varð á tveimur öðrum bifreiðum.

Ásmundur Rúnar Gylfason, aðstoðaryfirlögregluþjónn hjá lögreglunni á höfuðborgarsvæðinu, segir engin slys hafa orðið á fólki. Hann segir að ökumaðurinn sé grunaður um að hafa ekið undir áhrifum en að málið sé í rannsókn.

Deild innan ísraelska hersins, sem er alræmd fyrir grimmd og pyntingar, er sögð hafa verið viðstödd þegar ísraelskir hermenn drápu 15 bráðaliða nærri Rafah á Gaza í síðasta mánuði.

Mennirnir voru um borð í sjúkrabíl, slökkviliðsbíl og bíl frá Sameinuðu þjóðunum þegar hermenn skutu á bílalestina og grófu hina látnu í grunnri fjöldagröf.

Breska blaðið Guardian segir að deild 504 innan ísraelska hersins, sem herforinginn Yehuda Vach, leiðir, hafi verið viðstödd.

Hermenn úr deild Vachs hafa áður verið sakaðir um stríðsglæpi á Gaza, meðal annars dráp á almennum borgurum, ósæmilega meðferð á líkum og hvatningu til þjóðarmorðs.

Í dag gengur í austan kalda eða strekking á sunnanverðu landinu með úrkomu, sem verður yfirleitt rigning nærri sjávarmáli, en slydda eða snjókoma í uppsveitum og á heiðum. Á norðurhelmingi landsins verður hægari vindur í dag og bjart veður.

Á morgun, sunnudag, gengur í allhvassa eða hvassa norðanátt. Með henni fylgir snjókoma, fyrst á austanverðu landinu, en einnig norðanlands síðar um daginn. Yfirleitt þurrt suðvestantil. Spár gera síðan ráð fyrir að við verðum í kaldri norðanátt áfram fram eftir næstu viku. Ofankoma af og til á norðurhelmingi landsins, en yfirleitt þurrt sunnanlands.

Engar hvalveiðar verða á vegum Hvals hf. í sumar, eins og greint var frá í fréttum í gær. Í viðtali við Morgunblaðið í dag segir Kristján Loftsson, framkvæmdastjóri Hvals, ástæðu þess vera aðstæður í heimsmálum. Afurðaverðsþróun í Japan hafi verið óhagstæð að undanförnu og fari versnandi. Verð afurða félagsins verði það lágt að ekki sé forsvaranlegt að stunda veiðar í sumar.

Lágt gengi krónunnar gagnvart japanska jeninu hjálpi heldur ekki til, né umrót á heimsmörkuðum. Hvalur hf. sjái ekkert annað í stöðunni en að bíða betri tíma og endurmeta stöðuna á nýju ári.

Alþjóðagjaldeyrissjóðurinn samþykkti í gær tuttugu milljarða dala neyðarlánveitingu til Argentínu, sem hefur um árabil glímt við mikla verðbólgu. Hún hefur þó lækkað umtalsvert síðustu misseri í kjölfar hagræðingaraðgerða forsetans Javier Milei, sem hafa vakið hörð viðbrögð heima fyrir.

Lán Argentínu hjá sjóðnum nema þegar yfir 40 milljörðum dala.

Alþjóðabankinn tilkynnti einnig um tólf milljarða dala stuðning til Argentínu og Þróunarbanki Ameríkuríkja um allt að tíu milljarða dala stuðning.

Milei fagnaði þessu í sjónvarpsávarpi í gærkvöld. Hann sagði að efnahagur Argentínu yrði einn sá sterkasti næstu þrjá áratugi.

Lögreglunni á Norðurlandi vestra barst tilkynning um alvarlegt umferðarslys á Siglufjarðarvegi sunnan við Hofsós við Grafará í kvöld.

Samkvæmt Vegagerðinni er vegurinn lokaður vegna slyssins.

Lögreglan segir viðbragðsaðila vinna á vettvangi og að fréttatilkynningar megi vænta síðar. Frekari upplýsingar verði ekki veittar að svo stöddu.

Árekstur varð á milli tveggja bifreiða á gatnamótum Hlíðarfótar og Hringbrautar í kvöld.

Annar bíllinn valt en Sigurjón Ólafsson, aðstoðarvarðstjóri hjá slökkviliðinu á höfuðborgarsvæðinu, segir það hafa farið mun betur en á horfðist.

Tveir voru fluttir á slysadeild en Sigurjón segir að báðir séu með tiltölulega smávægilega áverka miðað við alvarleika árekstursins.

Aðspurður kveðst hann ekki vita um tildrög slyssins en segir vettvang lokaðan eins og er á meðan lögreglan rannsaki málið.

Guðmundur Árni Stefánsson, oddviti Samfylkingarinnar í Hafnarfirði, fyrrverandi þingmaður og ráðherra, hefur verið endurkjörinn varaformaður Samfylkingarinnar.

Þá var Jón Grétar Þórsson, sem hefur verið gjaldkeri Samfylkingarinnar frá 2022, einnig endurkjörinn. Hvorugur fékk mótframboð og voru báðir því sjálfkjörnir.

Guðný Birna Guðmundsdóttir oddviti Samfylkingarinnar í Reykjanesbæ var kjörin ritari flokksins á landsfundi hans rétt í þessu og hlaut þrjá fjórðu atkvæða. Gylfi Þór Gíslason formaður verkalýðsráðs Samfylkingarinnar sóttist einnig eftir embættinu.

Landsfundur Samfylkingarinnar fer fram í dag og á morgun í Grafarvogi.