Dómsmálaráðherra Bandaríkjanna biður ríkissaksóknara um að krefjast dauðarefsingar yfir Luigi Mangione, sem varð Brian Thompson, stjórnanda heilbrigðistryggingafélags, að bana í desember. Mangione er ákærður fyrir morð og í einum ákæruliðnum er morðið fellt undir hryðjuverk.

Mangione myrti Thompson fyrir utan hótel í Manhattan í New York snemma að morgni 4. desember. Hann flúði af vettvangi og eftir umfangsmikla leit fannst Mangione á McDonalds-skyndibitastað í Altoone í Pennsylvaníu tæpri viku síðar.

Einn var fluttur slasaður með sjúkrabíl eftir umferðarslys á Reykjanesbraut um klukkan þrjú. Reykjanesbraut er lokuð til norðurs við brúna undir Breiðholtsbraut vegna slyssins. Búast má við því að vegurinn verði lokaður í talsverðan tíma segir á vef Vegagerðarinnar.

Í tilkynningu frá lögreglunni á höfuðborgarsvæðinu segir að ekið hafi verið á gangandi vegfaranda. Frekari upplýsingar liggja ekki fyrir.

Fleiri en 2.700 hafa fundist látin í Mjanmar eftir jarðskjálftana á föstudag. Neyðin á hamfarasvæðunum er mikil og herstjórnin í Mjanmar er sökuð um að hindra að hjálpargögn og björgunarfólk komist inn á svæði sem andspyrnuhreyfingar stjórna.

Þá hefur herstjórnin haldið áfram árásum þrátt fyrir hamfarirnar. Að minnsta kosti 4.500 eru slösuð eftir skjálftana og enn er hundruða saknað.

Evrópusambandið er tilbúið með mótaðgerðir, fari svo að Bandaríkjastjórn geri alvöru úr áformum sínum um tollahækkanir á morgun. Þetta kom fram í ávarpi Ursulu von der Leyen, forseta framkvæmdastjórnar ESB, á Evrópuþinginu í morgun.

Von der Leyen ítrekaði að Evrópusambandið hefði ekki átt upptökin að þessari deilu og væri ekki áfjáð í að svara fyrir sig - en myndi gera það ef þörf krefði.

Suðvestan kaldi eða stinningskaldi og dálitlar skúrir eða él í dag, en þurrt og bjart á Norðaustur- og Austurlandi. Hægari vindur síðdegis og rigning eða slydda suðaustan- og austanlands, annars að mestu þurrt. Hiti eitt til sjö stig.

Smálægð fer væntanlega norður yfir austanvert landið í nótt, með snjókomu, slyddu eða rigningu víða. Í kjölfar hennar er spáð stífri vestanátt á morgun og lítils háttar éljum seinnipartinn. Annað kvöld fer að lægja og á fimmtudag er útlit fyrir hægan vind og bjart veður, en skýjað vestanlands.

Stjórnarskrárdómstóll Suður-Kóreu sagðist í dag ætla að úrskurða í máli Yoon Suk Yeol, afsetts forseta landsins, á föstudag. Hann var kærður til embættismissis eftir að hafa reynt að lýsa yfir herlögum í landinu.

Málið hefur vakið hörð viðbrögð innan samfélagsins og fólk skiptist í fylkingar. Fjölmenn mótmæli hafa verið haldin þar sem ýmist er kallað eftir því að Yoon verði sviptur embætti eða að kæran verði felld niður.

Þörf er á samþykki að minnsta kosti sex af átta dómurum til að Yoon verði sviptur embætti. Leiðtogi stjórnarflokksins sagðist eiga von á sterkum viðbrögðum innan samfélagsins sama hver niðurstaðan verði.

Alvarlegt umferðarslys varð á Suðurlandsvegi við Holtsós nú fyrir skömmu. Þetta kemur fram í tilkynningu frá Lögreglunni á Suðurlandi. Viðbragðsaðilar eru sagðir á vettvangi og er Suðurlandsvegur lokaður á meðan vettvangsvinna stendur yfir.

Vöruviðskiptin í febrúar voru óhagstæð um 57,3 milljarða króna að því er fram kemur á vef Hagstofu Íslands.

Fluttar voru út vörur fyrir 78,5 milljarða króna í febrúar 2025 og innflutningur nam 135,7 milljörðum króna.

Þetta er mun óhagstæðara en í janúarmánuði þegar vöruskiptajöfnuðurinn var neikvæður um 5,6 milljarða. Í febrúar í fyrra var vöruskiptajöfnuður óhagstæður um 20,6 milljarða.

Sjónvarps- og útvarpsútsendingar Ríkisútvarpsins frá Langholtsfjalli við Flúðir liggja niðri vegna rafmagnsleysis og hafa legið niðri síðan í gær.

Þessi bilun hefur áhrif á útsendingar í uppsveitum Árnessýslu.

Unnið er að er að viðgerð en ekki er vitað hvenær útsending kemst aftur í gang.

Gistinætur á hótelum í febrúar voru rúmlega 4,5 prósentum færri en á sama tíma á síðasta ári, samkvæmt gögnum Hagstofu Íslands. Þeim fækkaði í öllum landshlutum nema á Suðurnesjum þar sem þeim fjölgaði um 16,6 prósent.

Fækkun gistinótta á höfuðborgarsvæðinu var 6,7 prósent en mesta fækkunin var 23,2 prósent á Austurlandi. Framboð hótelherbergja jókst þó lítillega á nær öllu landinu nema á höfuðborgarsvæðinu. Framboð á Austurlandi dróst hins vegar saman um rúmlega 24 prósent.

Eldingaveður er á höfuðborgarsvæðinu. Þorsteinn V. Jónsson, veðurfræðingur á Veðurstofu Íslands, segir óstöðugt loft hafa fylgt í kjölfar skila sem fóru yfir landið í dag. Mikið eldingaveður hafi verið aðallega suður- og suðvestur af Reykjanesskaga.

„Síðan var eldingaþyrping yfir Kleifarvatni á Reykjanesskaga og Vatnsleysu, nokkrar eldingar mældust skammt suður af Hafnarfirði.“

Það heyrðust nokkrar þrumur í Reykjavík og eldingar sáust. Einnig barst tilkynning um eldingar í Keflavík. Flestar hafi þær þó verið úti á hafi suður og vestur af Reykjanesskaga.

„Upp úr klukkan sex fer að draga verulega úr þessu.“

Fréttin hefur verið uppfærð.

Íbúar Bucha komu saman við kirkju bæjarins í morgun og minntust þess að þrjú ár eru liðin síðan Rússlandsher hörfaði frá bænum. Fólk lagði blóm og kerti við minnisvarða um íbúa sem Rússlandsher drap, þá 33 daga sem hann hafði bæinn á valdi sínu.

Ódæðisverk hersins í Bucha eru talin með þeim verstu síðan Rússland hóf allsherjarinnrás í Úkraínu.

Bucha var rólegt 55.000 íbúa úthverfi höfuðborgarinnar Kyiv þar til Rússar náðu völdum 27. febrúar 2022.

31. mars komst Úkraínuher þangað og hryllingurinn varð ljós. Lík hundruða almennra borgara fundust á götum úti, í fjöldagröfum og í pyntingarklefum. 9.000 tilvik um stríðsglæpi voru skráð.

Fyrir hádegi verður umtalsverður deildarmyrkvi á sólu sjáanlegur á Íslandi öllu ef veður leyfir. Hann sést að öllum líkindum best frá Vesturbyggð á sunnanverðum Vestfjörðum, þaðan sem tunglið hylur rúmlega 75 prósent sólar.

Deildarmyrkvinn hefst skömmu eftir klukkan tíu og nær hámarki rétt eftir klukkan ellefu. Gert er ráð fyrir að tunglið verði farið frá sólu skömmu eftir klukkan tólf á hádegi.

Varað er við að horfa á sólmyrkva með berum augum, það getur valdið sjónskaða. Ef fólk hyggst fylgjast með deildarmyrkvanum er til að mynda mælt með að horfa í gegnum rafsuðugler eða þar til gerð sólmyrkvagleraugu.

Engin slys urðu né tjón þegar sýruhreinsiefni lak við Sundahöfn í Reykjavík fyrir hádegi í dag, að sögn Gunnars Agnars Vilhjálmssonar, aðstoðarvarðstjóra Slökkviliðs höfuðborgarsvæðisins. Hann sagði þúsund lítra hafa lekið úr tveimur ílátum sem voru í gámum við höfnina.

Ekkert lak þó í sjó og hreinsunarstarf gekk vel. Gunnar Agnar sagði að slökkviliðsmenn hefðu sett sand yfir efnið sem fór niður, sem var svo fært í viðeigandi eiturefnaförgun. Aðgerðum hefði lokið um klukkan sjö í kvöld. Heilbrigðiseftirlitið hefði verið upplýst um lekann.

Gunnar Agnar sagði að í svona verkum væri mikilvægt að flýta sér ekki heldur vanda til verka.

Horfur eru á snjókomu í nótt og framan af morgundeginum á Suðausturlandi.

„Talsvert mikið mun snjóa staðbundið á þjóðveginum sunnan Öræfajökuls og austur yfir Breiðamerkursand og í Suðursveit.“ segir í ábendingu frá Einari Sveinbjörnssyni, veðurfræðingi Vegagerðarinnar.

Sums staðar er búist við allt að 50-70 sentímetra snjódýpt. Á köflum verður þetta blautur snjór og hann því þungur og erfiður viðureignar.

Veðurstofan hefur gefið út gula viðvörun vegna austan hríðar í landshlutanum.

Brunavörnum Suðurnesja (BS) barst fyrr í kvöld tilkynning um eld í gömlu sundhöllinni í Keflavík.

Að sögn Gunnars Jóns Ólafssonar, bakvaktarstjórnanda hjá BS, var eldurinn minniháttar. Svo virðist sem kveikt hafi verið í rusli ofan í sundlauginni.

Gunnar segir í samtali við fréttastofu að vinna á vettvangi sé á lokametrunum. Búið sé að slökkva allan eld og slökkviliðsmenn vinni nú við að reykræsta bygginguna.

Lengi hefur staðið til að rífa gömlu sundhöllina en engin starfsemi er þar núna.

Áfrýjunardómstóll á Spáni sýknaði í dag Dani Alves af ákæru um nauðgun. Alves er fyrrverandi brasilískur landsliðsmaður í fótbolta. Hann var sakfelldur og dæmdur í fjögurra og hálfs árs fangelsi í febrúar í fyrra fyrir að nauðga ungri konu á skemmtistað í Barcelona.

Fjórir dómarar við áfrýjunardómstólinn komust einróma að þeirri niðurstöðu að sakfelling Alves hefði ekki byggt á nægum sönnunargögnum. Dómararnir sögðu að eyður væru í málflutningi gegn honum, ósamræmi og ónákvæmni. Dómurinn yfir Alves var því felldur úr gildi.

Eyjólfur Árni Rafnsson lætur af formennsku í Samtökum atvinnulífsins á aðalfundi 15. maí. Hann hefur verið formaður í átta ár.

Þetta kemur fram á vef Samtaka atvinnulífsins. Þar kemur líka fram að Jón Ólafur Halldórsson gefi kost á sér. Hann hefur verið í stjórn samtakanna í áratug. Hann var formaður Samtaka verslunar og þjónustu síðustu sex árin.