Fyrir hádegi verður umtalsverður deildarmyrkvi á sólu sjáanlegur á Íslandi öllu ef veður leyfir. Hann sést að öllum líkindum best frá Vesturbyggð á sunnanverðum Vestfjörðum, þaðan sem tunglið hylur rúmlega 75 prósent sólar.

Deildarmyrkvinn hefst skömmu eftir klukkan tíu og nær hámarki rétt eftir klukkan ellefu. Gert er ráð fyrir að tunglið verði farið frá sólu skömmu eftir klukkan tólf á hádegi.

Varað er við að horfa á sólmyrkva með berum augum, það getur valdið sjónskaða. Ef fólk hyggst fylgjast með deildarmyrkvanum er til að mynda mælt með að horfa í gegnum rafsuðugler eða þar til gerð sólmyrkvagleraugu.

Engin slys urðu né tjón þegar sýruhreinsiefni lak við Sundahöfn í Reykjavík fyrir hádegi í dag, að sögn Gunnars Agnars Vilhjálmssonar, aðstoðarvarðstjóra Slökkviliðs höfuðborgarsvæðisins. Hann sagði þúsund lítra hafa lekið úr tveimur ílátum sem voru í gámum við höfnina.

Ekkert lak þó í sjó og hreinsunarstarf gekk vel. Gunnar Agnar sagði að slökkviliðsmenn hefðu sett sand yfir efnið sem fór niður, sem var svo fært í viðeigandi eiturefnaförgun. Aðgerðum hefði lokið um klukkan sjö í kvöld. Heilbrigðiseftirlitið hefði verið upplýst um lekann.

Gunnar Agnar sagði að í svona verkum væri mikilvægt að flýta sér ekki heldur vanda til verka.

Horfur eru á snjókomu í nótt og framan af morgundeginum á Suðausturlandi.

„Talsvert mikið mun snjóa staðbundið á þjóðveginum sunnan Öræfajökuls og austur yfir Breiðamerkursand og í Suðursveit.“ segir í ábendingu frá Einari Sveinbjörnssyni, veðurfræðingi Vegagerðarinnar.

Sums staðar er búist við allt að 50-70 sentímetra snjódýpt. Á köflum verður þetta blautur snjór og hann því þungur og erfiður viðureignar.

Veðurstofan hefur gefið út gula viðvörun vegna austan hríðar í landshlutanum.

Brunavörnum Suðurnesja (BS) barst fyrr í kvöld tilkynning um eld í gömlu sundhöllinni í Keflavík.

Að sögn Gunnars Jóns Ólafssonar, bakvaktarstjórnanda hjá BS, var eldurinn minniháttar. Svo virðist sem kveikt hafi verið í rusli ofan í sundlauginni.

Gunnar segir í samtali við fréttastofu að vinna á vettvangi sé á lokametrunum. Búið sé að slökkva allan eld og slökkviliðsmenn vinni nú við að reykræsta bygginguna.

Lengi hefur staðið til að rífa gömlu sundhöllina en engin starfsemi er þar núna.

Áfrýjunardómstóll á Spáni sýknaði í dag Dani Alves af ákæru um nauðgun. Alves er fyrrverandi brasilískur landsliðsmaður í fótbolta. Hann var sakfelldur og dæmdur í fjögurra og hálfs árs fangelsi í febrúar í fyrra fyrir að nauðga ungri konu á skemmtistað í Barcelona.

Fjórir dómarar við áfrýjunardómstólinn komust einróma að þeirri niðurstöðu að sakfelling Alves hefði ekki byggt á nægum sönnunargögnum. Dómararnir sögðu að eyður væru í málflutningi gegn honum, ósamræmi og ónákvæmni. Dómurinn yfir Alves var því felldur úr gildi.

Eyjólfur Árni Rafnsson lætur af formennsku í Samtökum atvinnulífsins á aðalfundi 15. maí. Hann hefur verið formaður í átta ár.

Þetta kemur fram á vef Samtaka atvinnulífsins. Þar kemur líka fram að Jón Ólafur Halldórsson gefi kost á sér. Hann hefur verið í stjórn samtakanna í áratug. Hann var formaður Samtaka verslunar og þjónustu síðustu sex árin.

Í dag verður norðaustlæg átt, víða gola eða kaldi, og áfram lítils háttar él fyrir norðan. Spár gera ráð fyrir að smálægð komi inn fyrir Suðurland með snjókomu á þeim slóðum eftir hádegi. Hiti
víða kringum frostmark eins og sjá má á kortinu hér fyrir neðan.

Áfram norðaustlæg átt á morgun og þá bætir heldur í vind suðaustan til og búast má við slyddu eða snjókomu austan til. Yfirleitt þurrt vestanlands og hlýnar heldur í veðri.

Vinsælustu fyrstu eiginnöfn barna á síðasta ári voru Emil og Jökull meðal drengja og Aþena og Embla meðal stúlkna. Þetta kemur fram á vef Þjóðskrár Íslands.

Alls fékk 31 drengur nafnið Emil og jafnmargir Jökull. Óliver kom þar á eftir, en 23 fengu það nafn.

22 stúlkur fengu nöfnin Aþena og Embla, og 20 voru nefndar Emilía, Birta og Sara.

Hástökkvari ársins hjá drengjum var nafnið Matthías, sem fór úr 41. sæti árið 2023 upp í það fjórða í ár.

Athygli vekur að ekki ólíkt nafn – Matthildur – stekkur líka upp í vinsældum í stúlknanöfnum, fer úr sextánda sæti upp í það sjötta.

Leiðtogar næstum þrjátíu ríkja, þar á meðal Kristrún Frostadóttir forsætisráðherra, sitja fund í París í dag, þar sem rætt verður um leiðir til að tryggja öryggi Úkraínu og stöðuna í friðarviðræðunum sem staðið hafa yfir að undanförnu í Sádí-Arabíu. Volodymyr Zelensky, forseti Úkraínu er á fundinum, en meðal annarra leiðtoga eru Keir Starmer, forsætisráðherra Bretlands, og Giorgia Meloni, forsætisráðherra Ítalíu.

Í dag verður norðaustlæg eða austlæg átt, víða kaldi, en allhvasst norðvestantil. Þá er útlit fyrir dálitla snjókomu eða él fyrir norðan og vægt frost, en sunnan heiða verða stöku skúrir eða slydduél og mildara veður.

Heldur hægari norðaustlæg átt á morgun og þá dregur víða úr úrkomu. Spár gera ráð fyrir að lægðardrag myndist við suðurströndina og má búast við snjókomu eða slyddu syðst á landinu annað kvöld. Áfram norðaustlæg átt á laugardag og snjókoma eða él norðan- og austanlands, en þurrt að kalla suðvestan- og vestantil. Hiti breytist lítið.

Rafmagnslaust er á suðurhluta Raufarhafnar og að Ormarslóni. Samkvæmt þjónustuvef Rarik er unnið að því að finna bilunina. Bent er á að hafi einhverjir upplýsingar sem gætu hjálpað við bilanaleit er þeim bent á að hafa samband við stjórnstöð Rarik í síma 528-9000.

Israel Katz, varnarmálaráðherra Ísraels, segir Ísraelsher munu „ráðast af fullum krafti“ á fleiri svæði á Gaza. Biðlaði Katz til íbúa að yfirgefa svæðið hið fyrsta til að leita öryggis.

„Hamas stefnir lífi ykkar í hættu,“ sagði Katz í færslu á miðlinum X og sagði samtökin vera valda þess að Gaza-búar misstu heimili sín og að Ísraelsher legði undir sig fleiri landsvæði.

Sameinuðu þjóðirnar greindu frá því í dag að fleiri en 142 þúsund manns á Gaza væru á vergangi eftir að árásir Ísraelshers hófust á ný fyrir rúmri viku.

Jóhann Páll Jóhannsson umhverfis-, orku- og loftslagsráðherra fundaði með Denisu Saková, efnahagsmálaráðherra og aðstoðarforsætisráðherra Slóvakíu, í gær.

Sagt var frá heimsókninni á vef Stjórnarráðs Íslands.

Saková var í heimsókn á Íslandi til að kynna sér jarðhitanýtingu hérlendis. Hún heimsótti meðal annars Hellisheiðarvirkjun og Grindavík.

Ráðherrarnir ræddu orkumál og nýtingu jarðhita í Slóvakíu. Þeir sammæltust á fundinum um að skoða möguleika á samstarfi þjóðanna á sviði jarðhitanýtingar og skyldra mála.

Þessi frétt er unnin af meistaranema við Háskóla Íslands í starfsnámi á fréttastofu RÚV.

Þýska fyrirtækið Isar Aerospace stefnir á að skjóta upp Spectrum-geimferjunni á morgun en tilraunaflugi geimfarsins var frestað fyrr í vikunni.

Til stóð að geimskotið yrði á mánudag en veðurskilyrði voru óhagstæð.

Þetta verður fyrsta tilraunaflug geimferjunnar og jafnframt fyrsta geimskot af þessu tagi frá Evrópu utan Rússlands. Skotpallurinn er á eynni Andøya í norður-Noregi.

Áætlað er að tilraunaflugið verði á bilinu hálf tólf til hálf þrjú á morgun á íslenskum tíma, líkt og upphaflega stóð til á mánudag.

Þessi frétt er unnin af meistaranema við Háskóla Íslands í starfsnámi á fréttastofu RÚV.

Lars Løkke Rasmussen, utanríkisráðherra Danmerkur, fagnar ákvörðun Bandaríkjastjórnar um að takmarka heimsókn bandarískrar sendinefndar á Grænlandi við bandarísku herstöðina í Pituffik.

Upphaflega stóð til að sendinefndin myndi ferðast um Grænland, þar á meðal vera viðstödd hundasleðakeppni, án þess þó að funda með grænlenskum ráðamönnum. Bandaríkjamenn tilkynntu um breytta áætlun í gær.

Mette Frederiksen, forsætisráðherra Danmerkur, hafði sagt að ekki væri hægt að horfa fram hjá ásælni Bandaríkjaforseta í Grænland í samhengi við heimsóknina.

Paetongtarn Shinawatra forsætisráðherra Taílands var varin vantrausti á taílenska þinginu í dag. Um tveir þriðju þingmanna hafnaði vantrauststillögu stjórnarandstöðunnar. Stjórnarandstæðingar saka hana um vanhæfi og segja hana vera undir áhrifum föður síns, fyrrverandi forsætisráðherra Taílands.

Shinawatra er yngsti forsætisráðherra landsins til þessa og þriðji forsætisráðherrann sem kemur úr Shinawatra-fjölskyldunni. Hún var skipuð í embættið í ágúst í fyrra eftir að forvera hennar var gert að víkja samkvæmt úrskurði stjórnarskrárdómstóls um brot gegn siðareglum. Shinawatra segir fjölskyldu hennar ekki hafa áhrif á embættisstörf hennar.

Viðkomu bandarískrar sendinefndar til grænlensku höfuðborgarinnar Nuuk, og borgarinnar Sisimiut, hefur verið aflýst. Um þetta er tilkynnt á vef landstjórnar Grænlands. Þar segir að bandarísk stjórnvöld hafi aflýst þeim hluta óopinberrar heimsóknar sem tilkynnt var um á dögunum.

J.D. Vance varaforseti Bandaríkjanna ætli, ásamt eiginkonu sinni, að heimsækja bandaríska herstöð á Grænlandi á föstudag. Vance sagði í færslu á samfélagsmiðlum í gær að hann vildi kanna öryggisaðstæður á Grænlandi.

Donald Trump Bandaríkjaforseti hefur síðustu vikur ítrekað hótað því að taka yfir Grænland, jafnvel með hervaldi.

Rétt eftir klukkan 14 í dag hófst jarðskjálftahrina um 40 kílómetra norður af Húsavík. Um 45 skjálftar hafa mælst síðan þá að sögn Ingibjargar Andreu Bergþórsdóttur, náttúruvársérfræðings á Veðurstofunni.

Um helgina hófst hrina rétt vestan við Kópasker. Ingibjörg segir hrinur sem þessar alvanalegar á þessum slóðum. Þarna sé sniðgengi, jarðskorpuflekarnir rekist því hvor á annan í stað þess að gliðna í sundur líkt og víðast hvar annars staðar á flekamótunum undir Íslandi.

Flestir skjálftarnir hafa verið á bilinu 1 til 2 að stærð, þeir stærstu 2,4. Ekki hafa borist neinar tilkynningar um að þeir hafi fundist í byggð.