Víðáttumikil hæð milli Íslands og Færeyja og lægðardrag vestur við Grænland valda suðaustankalda eða strekkingi og smávætu suðvestanlands fram eftir degi. Annars staðar á landinu verða mun hægari vindar og víða léttskýjað.

Mjög hvössum vindstrengjum er spáð á norðanverðu Snæfellsnesi fram eftir degi og eru ökumenn hvattir til að fara gætilega þar.

Milt loft er yfir landinu og hitastig gæti náð allt að 13 gráðum þegar best lætur.

Um helgina er spáð sunnan- og suðaustanáttum með skýjuðu veðri og lítils háttar vætu sunnan- og suðvestantil. Annars staðar verður víða léttskýjað og hlýnar heldur í veðri.

Jarðskjálftavirkni á Reykjanesskaga hélt áfram í nótt þótt dregið hafi úr henni. Þetta kom fram í tilkynningu frá Veðurstofu.

Virknin dreifist nokkuð jafnt um kvikuganginn, frá Stóra Skógfelli í suðri og norður fyrir Keili. Skjálftarnir eru á nokkuð stöðugu fjögurra til sex kílóetra dýpi.

Hrina gikkskjálfta hófst um hálfsex í gær. Stærsti skjálftinn var 3,9 að stærð, rétt fyrir klukkan ellefu. Fimm skjálftar hafa mælst yfir þremur að stærð síðan hrinan hófst.

Kosningum til stúdentaráðs meðal nemenda Háskóla Íslands lauk í dag. Vaka, félag lýðræðissinnaðra stúdenta, jók við meirihluta sinn og vann tíu fulltrúa í stúdentaráði. Röskva, samtök félagshyggjufólks við Háskóla Íslands, missti einn fulltrúa og hlaut sjö.

„Við erum afar þakklát að hafa fengið áframhaldandi umboð til að leiða Stúdentaráð Háskóla Íslands.“ skrifaði Sæþór Már Hinriksson, formaður Vöku í tilkynningu til fjölmiðla. „Þessi sigur staðfestir það góða starf sem við höfum unnið síðastliðið ár. Það er augljóst að stúdentar treysti Vöku, við sjáum það í þeirri fylgisaukningu sem birtist nú.“

Heildarkjörsókn var 40,25%.

Öflugur skjálfti fannst vel á höfuðborgarsvæðinu rétt í þessu. Steinunn Helgadóttir náttúruvársérfræðingur segir stærð skjálftans ekki liggja fyrir að svo stöddu en að fyrstu tölur gefi til kynna að hann hafi verið um 4 á stærð.

Hún gerir ráð fyrir að skjálftinn sé af svipuðum slóðum og skjálftahrina sem reið yfir austur af Trölladyngju fyrr í dag. Líklegast sé um gikkskjálfta að ræða enda sé mikil spennulosun eftir gosið á þriðjudaginn.

Fréttastofu hafa borist ábendingar um að skjálftann hafi mátt greina í Vesturbæ, Hafnarfirði og Mosfellsbæ þar sem miklar drunur hafi einnig heyrst.

Mikill viðbúnaður var við Ægisíðu í kvöld vegna leitaraðgerða lögreglu. Ásgeir Erlendsson upplýsingafulltrúi Landhelgisgæslunnar staðfesti við fréttastofu að lögregla hefði óskað eftir aðstoð við leitarstörf og að þyrlusveit hefði verið kölluð út laust eftir klukkan 20 í kvöld. Hún hafi þó verið kölluð til baka núna fyrir skemmstu.

Björgunarsveitaraðilar tóku einnig þátt í aðgerðunum að sögn Jóns Þórs Víglundssonar, upplýsingafulltrúa Landsbjargar. Hann staðfestir að leitinni hafi lokið á tíunda tímanum.

Öflugir skjálftar fundust vel á höfuðborgarsvæðinu um sexleytið. Stærsti skjálftinn í hrinunni var 3,6 að stærð samkvæmt fyrsta mati. Þetta kemur fram í tilkynningu frá náttúruvárvakt Veðurstofunnar. Nokkrir skjálftar yfir þremur að stærð hafa mælst í hrinunni.

Upptökin voru austur af Trölladyngju, á milli Kleifarvatns og Trölladyngju. Skjálftarnir urðu ekki á kvikuganginum en eru líklega gikkskjálftar af völdum kvikugangsins. Mikið álag er á mælakerfi Veðurstofunnar.

Fréttin var uppfærð eftir að tilkynning barst frá Veðurstofunni.

Yfir þrjú þúsund hafa fundist látin í Mjanmar eftir jarðskjálftana á föstudag og hátt í fimm þúsund eru slösuð. Hundraða er enn saknað og gert er ráð fyrir að tala látinna muni hækka.

Hjálp hefur ekki enn borist til fjölda svæða sem vitað er að urðu illa úti í jarðskjálftunum. Fjöldi ríkja hefur sent hjálpar- og björgunarsveitir til Mjanmar en bágbornir innviðir og yfirstandandi borgarastyrjöld í landinu gera hjálparstarfi erfitt fyrir.

Tímabundið vopnahlé milli stríðandi fylkinga hófst á miðvikudag. Á þriðjudagskvöld skutu hermenn á bílalest kínverska Rauða krossins sem flutti hjálpargögn.

Marco Rubio, utanríkisráðherra Bandaríkjanna vill að öll aðildarríki NATO stefni að því að verja minnst 5 prósentum af þjóðarframleiðslu til varnarmála.

Rubio lét þessi orð falla í aðdraganda fundar utanríkisráðherra NATO-ríkjanna sem er að hefjast í höfuðstöðvum bandalagsins í Brussel.

„Við viljum ljúka þessum fundi með þann skilning að við séum á raunsærri leið til þess að hvert og eitt aðildarríki verji fimm prósentum [af þjóðarframleiðslu], einnig Bandaríkin, því ef ógnirnar eru eins raunverulegar og við teljum að þær séu, þá verðum við að hafa raunverulegra getu til að mæta þeim.“

Frá miðnætti hafa mælst um sex hundruð skjálftar í kvikuganginum á Reykjanesskaga. Skjálftarnir dreifast nokkuð jafnt frá Stóra Skógfelli og norður fyrir Keili.

Engin virkni hefur sést síðan gossprungan opnaðist norðan Grindavíkur 1. apríl en enn má greina glóð í nýja hrauninu og rýkur upp úr því á mörgum stöðum.

Í dag er spáð suðaustankalda og smá vætu vestantil á landinu en annars hægum vindi og bjartviðri. Það hlýnar í veðri og hiti verður fjögur til níu stig yfir daginn en víða næturfrost í nótt.

Um helgina mun hæð beina til okkar sunnan- og suðaustanátt með léttskýjuðu veðri á Norður- og Austurlandi. Sunnan- og vestantil verður skýjað og lítils háttar væta öðru hvoru.

Þrír karlmenn sitja enn í gæsluvarðhaldi grunaðir um aðild að meintri frelsissviptingu, fjárkúgun og manndrápi 10. mars. Lögreglan á Suðurlandi rannsakar málið og segir rannsókn miða vel. Karl og kona sem einnig höfðu setið í gæsluvarðhaldi vegna málsins voru látin laus í gær og í dag. Þau hafa áfram réttarstöðu sakbornings í málinu, að sögn lögreglu.

Alls sátu sjö í gæsluvarðhaldi eftir að maður, sem saknað var í Þorlákshöfn í byrjun mars, fannst þungt haldinn í Gufunesi í Reykjavík morguninn eftir og lést skömmu eftir komu á sjúkrahús.

Stjórnskipunar- og eftirlitsnefnd Alþingis óskaði eftir á mánudaginn að forsætisráðuneytið léti nefndinni í té öll gögn er varða mál fyrrum mennta- og barnamálaráðherra, Ásthildar Lóu Þórsdóttur. Fyrir nefndinni liggur beiðni um að nefndin skoði sérstaklega meint trúnaðarbrot ráðuneytisins í málinu.

Ólöf Bjarnadóttir, sem sendi forsætisráðuneytinu erindi um mál Ásthildar Lóu lítur svo á að ráðuneytið hafi rofið trúnað þegar Ásthildur Lóa var upplýst um erindið. Ráðuneytið hefur viku til að verða við beiðninni og síðan metur nefndin hvort tilefni sé til að kalla gesti fyrir nefndina.

Karlmaður lést eftir umferðarslys sem varð á Reykjanesbraut í Reykjavík í gær. Þetta kemur fram í tilkynningu frá lögreglunni á höfuðborgarsvæðinu. Slysið varð norðan við brúna yfir Reykjanesbraut sem tengir Breiðholtsbraut við Nýbýlaveg.

Þar segir að bifreið sem var á norðurleið hafi ekið á manninn, sem var fótgangandi. Hann var fluttur á slysadeild og úrskurðaður látinn eftir komuna þangað.

Í dag er spáð hvassri vestanátt á Norður- og Austurlandi, með stöku éljum seinnipartinn. Það lægir í kvöld og á morgun teygir hæðarsvæði sig yfir landið með björtu veðri í flestum landshlutum. Vestantil verður þó skýjað og sums staðar smá væta framan af degi.

Hiti verður á bilinu 5 til 10 stig yfir daginn en allvíða næturfrost.

Um helgina mun hæðarsvæðið beina til okkar mildri sunnan- og suðaustanátt. Spáð er léttskýjuðu á Norður- og Austurlandi en skýjuðu og lítilsháttar úrkomu suðvestan- og vestanlands.

Fjórði bandaríski hermaðurinn sem saknað var í Litáen fannst í dag. Fjórir bandarískir hermenn á æfingu með fleiri hersveitum hurfu sporlaust í síðustu viku, um tíu kílómetrum frá landamærunum að Belarús. Herjeppinn sem mennirnir voru í fannst á kafi í mýri. Björgunarstörf hófust um leið og var hafist handa við að tæma mýrina í fyrradag. Lík þriggja hermanna fundust í gær og það síðasta í dag.

Dómsmálaráðherra Bandaríkjanna biður ríkissaksóknara um að krefjast dauðarefsingar yfir Luigi Mangione, sem varð Brian Thompson, stjórnanda heilbrigðistryggingafélags, að bana í desember. Mangione er ákærður fyrir morð og í einum ákæruliðnum er morðið fellt undir hryðjuverk.

Mangione myrti Thompson fyrir utan hótel í Manhattan í New York snemma að morgni 4. desember. Hann flúði af vettvangi og eftir umfangsmikla leit fannst Mangione á McDonalds-skyndibitastað í Altoone í Pennsylvaníu tæpri viku síðar.

Einn var fluttur með sjúkrabíl eftir umferðarslys á Reykjanesbraut um klukkan þrjú. Reykjanesbraut er lokuð til norðurs við brúna undir Breiðholtsbraut vegna slyssins. Búast má við því að vegurinn verði lokaður í talsverðan tíma, segir á vef Vegagerðarinnar.

Í tilkynningu frá lögreglunni á höfuðborgarsvæðinu segir að ekið hafi verið á gangandi vegfaranda. Frekari upplýsingar liggja ekki fyrir.

Fleiri en 2.700 hafa fundist látin í Mjanmar eftir jarðskjálftana á föstudag. Neyðin á hamfarasvæðunum er mikil og herstjórnin í Mjanmar er sökuð um að hindra að hjálpargögn og björgunarfólk komist inn á svæði sem andspyrnuhreyfingar stjórna.

Þá hefur herstjórnin haldið áfram árásum þrátt fyrir hamfarirnar. Að minnsta kosti 4.500 eru slösuð eftir skjálftana og enn er hundruða saknað.

Evrópusambandið er tilbúið með mótaðgerðir, fari svo að Bandaríkjastjórn geri alvöru úr áformum sínum um tollahækkanir á morgun. Þetta kom fram í ávarpi Ursulu von der Leyen, forseta framkvæmdastjórnar ESB, á Evrópuþinginu í morgun.

Von der Leyen ítrekaði að Evrópusambandið hefði ekki átt upptökin að þessari deilu og væri ekki áfjáð í að svara fyrir sig - en myndi gera það ef þörf krefði.

Suðvestan kaldi eða stinningskaldi og dálitlar skúrir eða él í dag, en þurrt og bjart á Norðaustur- og Austurlandi. Hægari vindur síðdegis og rigning eða slydda suðaustan- og austanlands, annars að mestu þurrt. Hiti eitt til sjö stig.

Smálægð fer væntanlega norður yfir austanvert landið í nótt, með snjókomu, slyddu eða rigningu víða. Í kjölfar hennar er spáð stífri vestanátt á morgun og lítils háttar éljum seinnipartinn. Annað kvöld fer að lægja og á fimmtudag er útlit fyrir hægan vind og bjart veður, en skýjað vestanlands.

Stjórnarskrárdómstóll Suður-Kóreu sagðist í dag ætla að úrskurða í máli Yoon Suk Yeol, afsetts forseta landsins, á föstudag. Hann var kærður til embættismissis eftir að hafa reynt að lýsa yfir herlögum í landinu.

Málið hefur vakið hörð viðbrögð innan samfélagsins og fólk skiptist í fylkingar. Fjölmenn mótmæli hafa verið haldin þar sem ýmist er kallað eftir því að Yoon verði sviptur embætti eða að kæran verði felld niður.

Þörf er á samþykki að minnsta kosti sex af átta dómurum til að Yoon verði sviptur embætti. Leiðtogi stjórnarflokksins sagðist eiga von á sterkum viðbrögðum innan samfélagsins sama hver niðurstaðan verði.