Sunna Margrét setur puttann á tunguna

Sunna Margrét Þórisdóttir er tónlistarkona og myndlistarmaður sem hefur skapað sér sérstöðu í tilraunakenndri raftónlist. Sunna býr og starfar í Sviss þar sem hún hefur þróað hljóðheim sem blandar saman tilraunakenndu poppi, raftónlist og kvikmyndatónlist. Helstu áhrifavaldar hennar eru kraut-rokkararnir í Can og Neu! og raftónlistarkonurnar Suzanne Ciani og Eliane Radigue. Sunna var áður í hljómsveitinni Bloodgroup en hefur einbeitt sér að sólóferli.

Hún gaf út þröngskífuna Five Songs For Swimming fyrir tveimur árum og í fyrra kom platan Finger On Tongue. Á henni eru níu lög þar sem Sunna vinnur með hugmyndir um drauma, tilvist og óvissu í gegnum radda- og hljóðvinnslu.

Sunna Margrét kom í hljóðstofu til Atla Más og ræddi ferillinn og nýju plötuna Finger On Tongue.