Karlalandslið Íslands í fótbolta fellur um fjögur sæti á nýjum FIFA-lista. Ísland tapaði tvívegis gegn Kósóvó í umspili Þjóðadeildarinnar í marslok og orsakar það fall Íslands.

Ísland telst nú vera 74. öflugasta þjóðin á listanum og hefur ekki verið neðar síðan í mars 2013. Þá var Ísland númer 92 og skaust svo í 73. sæti í apríl sama ár. Þá hafði liðið farið upp um 58 sæti á einu ári frá sinni neðstu stöðu í sögunni í apríl 2012. Hæst fór Ísland í 18. sæti listans í febrúar og mars 2018.

Argentína er sem fyrr í efsta sæti listans en Spánverjar hafa sætaskipti við Frakka í öðru sæti og senda Frakka í það þriðja.