Willum Þór segir reynsluna úr stjórnmálum geta nýst í starfi forseta ÍSÍ

Willum Þór Þórsson, fyrrum heilbrigðisráðherra, hefur tilkynnt framboð sitt til forseta ÍSÍ.

„Ég er alinn upp við íþróttir og nýt þess að vera hluti af því. Ég hef auðvitað núna, umfram fyrri tíð, verið á vettvangi stjórnvalda, undanfarinn áratug og kem með það að borðinu.“

Hann segir reynsluna úr stjórnmálum geta nýst vel í starfinu. „Ég held að ég geti komið með það að borðinu eftir að hafa verið heilbrigðisráðherra og unnið með lýðheilsuna og forvarnir.“

Willum hefur sinnt fjölbreyttum hlutverkum í íþróttahreyfingunni, verið iðkandi, foreldri og þjálfari og nú segir hann sinn tíma kominn til skila til baka verki fyrir hreyfinguna.

„Nú eru tveir mánuðir fram að íþróttaþingi. Það er mikilvægt að nýta þann tíma í að hlusta, hlera og klukka fólk í hreyfingunni um allt land.“