Bandaríkin urðu í dag Ólympíumeistarar í körfubolta kvenna á áttundu leikunum í röð. Bandaríkjakonur unnu hádramatískan sigur á Frakklandi eftir jafnan og spennandi leik. Gabby Williams minnkaði muninn fyrir Frakka í eitt stig þegar fjórar sekúndur voru eftir, 65-64. Frakkar brutu strax á Kehleah Cooper þegar þær bandarísku lögðu af stað í sókn og Cooper kom þeim aftur þremur stigum yfir af vítalínunni.
Frakkar höfðu þrjár sekúndur til að jafna með þriggja stiga körfu og Williams tókst að skora þegar leiktíminn rann út en hún steig á þriggja stiga línuna í skotinu og fékk aðeins tvö stig fyrir. Bandaríkjakonur fögnuðu því naumum eins stigs sigri, 67-66 og eru Ólympíumeistarar á áttundu leikunum í röð.
