Hnefaleikakonan Cindy Ngamba vann í gærkvöld til bronsverðlauna á Ólympíuleikunum en hún keppir fyrir lið flóttamanna á leikunum. Þetta er í fyrsta sinn sem íþróttamaður úr flóttamannaliði Ólympíuleikanna vinnur til verðlauna. Ngamba komst í undanúrslit en tapaði þar fyrir Atheynu Bylon frá Panama. Ekki er keppt um bronsið og því fá Cindy, og Caitlin Parker frá Ástralíu, báðar brons.

36 íþróttamenn í tólf greinum eru í liði flóttamanna í París. Til þess að komast í liðið þarf að sýna fram á góðan árangur í sinni keppnisgrein og þá þarf Flóttamannahjálp Sameinuðu þjóðanna að viðurkenna flóttamannastöðu íþróttamannanna.

Cindy Ngamba er fædd í Kamerún en hefur verið búsett á Englandi síðustu fimmtán ár. Hún hefur oft sótt um breskt ríkisfang en umsókninni alltaf verið hafnað. Hún er sú fyrsta til að keppa í hnefaleikum fyrir lið flóttamanna á Ólympíuleikum.