Bandaríski spretthlauparinn Noah Lyles vann ögn óvæntan sigur í 100 metra hlaupi karla á sunnudag. Lyles er þekktari sem 200 metra hlaupari og hafði fyrir leikana í París gefið út að hann ætlaði sér að slá heimsmet í París.

Ekki tókst ætlunarverkið í 100 metrunum en Lyles átti enn möguleika, hversu raunhæft sem það nú var, á að slá heimsmet í kvöld. Svo fór þó ekki en Lyles endaði þriðji, rétt eins og í Tókýó fyrir þremur árum.

Eftir hlaupið í kvöld sást Lyles sitja á hlaupabrautinni umkringdur heilbrigðisstarfsfólki og leit ekki vel út. Hann hefur nú staðfest að hafa greinst með covid fyrir tveimur dögum en ákveðið að hlaupa engu að síður.