Fyrstu keppnisgreinum Íslendinganna á Evrópumeistaramótinu í sundi í 50 metra laug er lokið en mótið hófst í Belgrad í morgun. Snorri Dagur Einarsson var ekki langt frá því að komast í undanúrslit í 100 metra bringusundi.

Snorri Dagur og Einar Margeir Ágústsson kepptu báðir í 100 metra bringusundi og urðu báðir efstir í sínum undanriðlum á nýju persónulegu meti. Einar á 1:02,39 og Snorri á 1:01,66. Snorri endaði í 22. sæti og Einar í 31. sæti en Snorri var aðeins tveimur sætum frá sæti í undanúrslitunum.

Jóhanna Elín Guðmundsdóttir synti á 57,13 sekúndum í undanrásum 100 metra skriðsundsins og varð í 29. sæti og þá endaði Símon Elías Statkevicius í 43. sæti í undanrásum 50 metra flugsundsins á 24,64 sekúndum.

Jóhanna og Símon keppa í 50 metra flugsundi og 100 metra skriðsundi á morgun en þá mun Birgitta Ingólfsdóttir einnig synda í undanrásum 100 metra bringusundsins. RÚV sýnir beint frá mótinu.