Hákon Arnar Haraldsson, landsliðsmaður í fótbolta, hefur orðið að draga sig út úr íslenska hópnum fyrir leikinn gegn Portúgal í undankeppni EM á sunnudag. Hákon Arnar er meiddur og lék ekki gegn Slóvakíu í gærkvöldi heldur. Hákon Arnar hefur verið öflugur í undankeppninni þrátt fyrir að vera aðeins tvítugur að aldri. Hann hefur skorað þrjú mörk í undankeppninni og er markahæstur íslensku leikmannanna ásamt Aroni Einari Gunnarssyni og Alfreð Finnbogasyni.

Andri Fannar Baldursson og Daníel Leó Grétarsson hafa verið kallaðir inn í íslenska hópinn í staðinn. Andri Fannar er fyrirliði U21 liðs Íslands og lék með þeim gegn Wales í gær. Hann á að baki 9 A-landsleiki. Daníel Leó á 13 A-landsleiki að baki.

Ísland mætir Portúgal ytra á sunnudag klukkan 19:45 og er það lokaleikur undankeppninnar hjá íslenska liðinu að þessu sinni.