Þýskaland og Kólumbía mættust í H-riðlinum á heimsmeistaramóti kvenna í knattspyrnu í lokaleik dagsins. Fyrir leikinn höfðu bæði lið unnið sína fyrstu leiki, Þýskaland vann stórsigur á Marokkó og Kólumbía vann S-Kóreu.

Leikurinn fór rólega af stað og var jafnt í hálfleik. Það var svo ungstirnið Linda Caicedo sem skoraði stórglæsilegt mark á 52. mínútu leiksins þegar hún smurði boltann yfir Merle Frohms í markinu.

Allt stefndi í kólumbískan sigur en á 89. mínútu fær Þýskaland vítaspyrnu og úr henni skorar Alexandra Popp. á 97. mínútu leiksins fékk Kólumbía svo hornspyrnu og úr henni skoraði Manuela Vanegas með frábærum skalla og þar við sat, lokatölur 2-1.