Fyrirliðinn Wendie Renard skoraði síðbúið og mikilvægt sigurmark Frakka gegn Brasilíu í 2-1 sigri í stórleik dagsins á HM kvenna í fótbolta í dag. Frakkar eru nú með 4 stig á toppi F-riðils, stigi ofar en Brasilía en Jamaíka getur náð Frökkum að stigum með sigri á Panama síðar í dag.

Eugénie Le Sommer kom Frökkum yfir í fyrri hálfleik en Debinha jafnaði fyrir Brasilíu á 58. mínútu. Það var svo komið fram á 83. mínútu þegar Renard skoraði sigurmark Frakka. Frakkar eru því enn taplausir í öllum viðureignum sínum gegn Brasilíu, sjö sinnum hafa Frakkar unnið en fimm sinnum hafa þjóðirnar gert jafntefli.

Nú klukkan 12:30 hefst leikur Panama og Jamaíka í beinni útsendingu á RÚV. Panama er án stiga í riðlinum en Jamaíka er með eitt stig eftir markalaust jafntefli við Frakka í fyrstu umferð.