Heilbrigðisráðuneytið óskaði eftir fresti til að skila skýringum til umboðsmanns Alþingis á margföldum mun á greiðslum fyrir brjóstaskimun. Umboðsmaður óskaði þess að svörin bærust ekki síðar en 31. janúar en ráðuneytið óskaði eftir fresti út þessa viku.

Þetta staðfestir Kristín Benediktsdóttir, umboðsmaður Alþingis, í samtali við fréttastofu.

Umboðsmaður óskaði skýringanna vegna frétta RÚV af því að konur í áhættuhópi fyrir brjóstakrabbameini og konur sem hefðu áður fengið brjóstakrabbamein fengju ekki sömu niðurgreiðslu og aðrar konur.

Umboðsmaður óskaði gagna frá ráðuneytinu til að meta hvort tilefni væri til frumkvæðisathugunar.