Svandís: „Ekki ákvörðunartökupunktur“ um flugvöll í Hvassahrauni

Við segjum þessari fréttavakt lokið. Nánar verður fjallað um skýrslurnar á miðlum RÚV næstu daga.

„Þetta eru ánægjuleg tíðindi, jákvætt fyrir okkur,“ segir Guðlaugur Jónasson stjórnarformaður Sauðafells, landeiganda Hvassahrauns.

Jörðin var sett í formlegt söluferli í sumar og segir Guðlaugur að það ferli verði ekki stöðvað. Hann segir mikinn áhuga hafa verið á jörðinni en það væri ánægjulegt að heyra frá stjórnvöldum séu þau áhugasöm um kaup á jörðinni.

Um 120 skráðir eigendur eru að félaginu og er jörðin í Hvassahrauni eina eign félagsins. Stærsti hlutinn, um 45%, er í eigu félagsins Fjáreigendafélag Reykjavíkur. Hin 60% skiptast á milli annarra eigenda.

Hvassahraun er 2.200 hektara jörð á norðanverðum Reykjanesskaga.

Bændur í Reykjavík vantaði beitiland og keyptu jörðina á sjötta áratug síðustu aldar. Þeir stofnuðu félagið Sauðafell.

Fundinum er nú lokið.

Við munum frá viðbrögð og viðtöl frá helstu hagsmunaaðilum og birta hér innan skamms.

Að mati Einars eru almenningssamgöngur til og frá Keflavíkurflugvelli afar mikilvægt hagsmunamál. Hann segir að með árangri í þeim samgöngum verði á sama tíma góður árangur í að draga úr umferð einkabíla á höfuðborgarsvæðinu.

Einar Þorsteinsson, borgarstjóri, segir innanlandsflug vera hluta af samgöngum á höfuðborgarsvæðinu og mikilvægt að tryggja óraskað sjúkraflug.

Hann segir að á aðalskipulagi Reykjavíkurborgar, til 2040, sé að innlandsflugvöllur fari úr Vatnsmýri sé komin önnur staðsetning. Hann segir að skýrslan um flugvöll í Hvassahrauni sé mikilvægt plagg í þá vinnu.

Svandís segir að stjórnvöld hefji nú vinnu við að rýna í niðurstöðurnar og móta tillögur um hvernig verkefnin eru tekin áfram. Ítarlegt samráð er nauðsynlegt um hvernig eigi að varða leiðina fram á við.

Hún segir að nú sé framtíðarsýnin skýrari en áður um hvert er best að halda varðandi uppbyggingu almenningssamgangna.

Svandís segir að skýrslur starfshópanna verði notaðar til að móta framtíð almenningssamgangna.

Hún segir lykilatriði að Hvassahraun geti verið ágætt flugvallarstæði.

Vinna starfshópsins var að miklu leyti tæknileg vinna en ekki ákvarðanatökupunktur um hvort hafist verði handa við að stefna að uppbyggingu flugvallar í Hvassahrauni.

Hún segir brýnt að tryggja flugöryggi á öllum tímum. Samgöngur með flugi innanlands þurfa að vera öruggar og áreiðanlegar. Innviðir þurfa að þróast í takt við kröfur og tækni til framtíðar.

Hún segir að skýrsla starfshópsins um almenningssamgöngur til Keflavíkurflugvallar muni nýtast vel. Það verði að efla almenningssamgöngur um allt land. Samgöngur eiga að vera öruggar og umhverfisvænn kostur. Tryggja þarf að almenningssamgöngur til Keflavíkur hafi góðar tengingar við aðrar almenningssamgöngur um allt land.

Samstarf hagsmunaaðila um áframhaldandi uppbyggingu og þróun almenningssamganga. Að stuðla að reglulegu samráði hagsmunaaðila um samgöngur til og frá Keflavíkurflugvelli.

Grænar og umhverfisvænar almenningssamgöngur. Skýr markmið hjá stjórnvöldum og sveitarfélögum að almenningssamgöngur gangi fyrir grænum orkugjöfum.

Að gera almenningssamgöngur samkeppnishæfar við aðra ferðamáta. Ferðatími og fargjöld skipta þar miklu máli.

Að byggja upp fyrirmyndaraðstöðu fyrir farþega.

Að afla betri ferðagagna um ferðavenjur starfsfólks og farþega. Þannig er betur hægt að mæla árangur aðgerða.

Að efla almenningssamgöngur svo þær þjóni betur íbúum, starfsfólki og ferðamönnum.

Leggja fram framtíðarsýn sem tekur tillit til þeirra fjölda markmiða og stefna sem stjórnvöld hafa sett fram um samgöngur til Keflavíkurflugvallar.

Horft er á að starfræktar verði umhverfisvænar og reglulegar almenningssamgöngur.

Til að ná fram framtíðarsýninni leggur starfshópurinn fram sex markmið til ársins 2030.

Hópurinn fór í vettvangsferð á Keflavíkurflugvöll og kallaði til sín ýmsa aðila í ferðaþjónustu og innan almenningssamgangna til ráðgjafar.

Daði fer yfir þær almenningssamgöngur sem nú eru í boði til flugvallarins.

Daði Baldur Ottósson verkefnisstjóri starfshóps um almenningssamgöngur milli höfuðborgarsvæðisins og Keflavíkurflugvallar kynnir niðurstöður hópsins.

Þau setja fram sex leiðir að framtíðarsýn almenningssamgangna á svæðinu.

Eyjólfur Árni Rafnsson kynnir niðurstöður starfshóps um rannsóknir á uppbyggingu flugvallar í Hvassahrauni.

Hann segir vinnu starfshópsins hafa hafist árið 2020. Þungamiðjan hafi falist í veðurfarsmælingum, náttúruvá og hugsanlegum áhrifum á þjónustustig innanlandsflugs með flutningi úr Vatnsmýrinni.

Í seinni áfanga verður farið í mat á umhverfisáhrifum og mögulegt skipulag, kostnaðarmat og forhönnun flugvallarins. Eyjólfur segir seinni hluta vinnunnar umfangsmeiri en þann fyrri, sem er verið að kynna núna.

Eyjólfur segir ekkert varðandi veðurskilyrði mæla gegn byggingu flugvallar í Hvassahrauni.

Ekki er talið að langtímaáhrif á eftirspurn eftir innanlandsflugi verði mikil með flutningu flugvallarins í Hvassahraun. Áhrifin yrðu meiri ef innlandsflugið yrði flutt til Keflavíkur, líkur eru á að eftirspurn myndi dragast saman um allt að þriðjung.

Flugvallarstæðið yrði að mestu utan skilgreindra eldstöðvarkerfa á Reykjanesskaganum. Svæðið er ekki útsett fyrir hraunflæði lítilla eldgosa. Ólíklegt er talið að hraun myndi flæða yfir Reykjanesbraut á þessu svæði.

Starfshópurinn leggur til að það verði tekið frá svæði í Hvassahrauni fyrir uppbyggingu flugbrauta og flugstöðvarbyggingar.

Áhættumat vegna fjárfestinga fyrir svæðið á að vera klárt árið 2026.

Góðan daginn og velkomin á þessa fréttavakt. Blaðamannafundur er að hefjast á vegum innanríkisráðuneytisins í Hafnarborg í Hafnarfirði um niðurstöður tveggja starfshópa.

Annars vegar verður fjallað um rannsóknir á byggingu flugvallar í Hvassahrauni og hins vegar um almenningssamgöngur milli höfuðborgarsvæðisins og Keflavíkurflugvallar.

Fundurinn hefst núna klukkan 11.

Svandís Svavarsdóttir innviðaráðherra opnar fundinn. Næst mun Eyjólfur Árni Rafnsson formaður starfshóps um rannsóknir á byggingu flugvallar í Hvassahrauni kynna sínar niðurstöður. Þá kemur Daði Baldur Ottósson verkefnisstjóri starfshóps um almenningssamgöngur milli höfuðborgarsvæðisins og Keflavíkurflugvallar.

Loks munu Svandís og Einar Þorsteinsson borgarstjóri taka til máls.