Verðbólga verði að hjaðna áður en vextir lækka

Ásgeir Jónsson seðlabankastjóri segir helstu ástæðu óbreyttra stýrivaxta vera þá að verðbólga hefur ekki gengið niður í sumar.

„Það er allavega þannig að verðbólga hefur ekki gengið niður í sumar og þessi kólnun sem við vonuðumst eftir hefur látið standa á sér,“ segir Ásgeir.

Spurður að því hvers vegna hærri vextir hafi ekki haft tilætluð áhrif segir Ásgeir: „Við erum að sjá töluverð áhrif af þessum háu stýrivöxtum. Það er bara svo mikið sem er að gerast í efnahagslífinu. Það hefur verið mjög hraður hagvöxtur í efnahagslífinu á síðustu árum,“ segir Ásgeir og bendir á að hagkerfið hafi vaxið um í kringum 20 prósent á árunum 2021 til 2023.