Fótboltalið frá Malaví ætlar sér sigur á Rey Cup
Sextán ungir og efnilegir knattspyrnumenn frá Malaví eru staddir hér á landi til að taka þátt í Rey Cup mótinu sem brátt verður sett. Þeir kunna ágætlega við sig á Íslandi þó það sé heldur kalt fyrir þeirra smekk.
Drengirnir sem eru á aldrinum 14 til 16 ára spila með liði knattspyrnuakademíunnar Ascent Soccer í Malaví sem er eina knattspyrnuakademían í landinu. Margir þeirra ólust upp við mikla fátækt, um helmingur þeirra á heimilum án rennandi vatns og rafmagns.
Strákarnir hafa ekki spilað á gervigrasi áður en létu það ekki stoppa sig og unnu 5-0 sigur gegn þriðja flokki Aftureldingar í fyrsta æfingaleiknum og 5-1 sigur gegn þriðja flokki Víkings í dag. Þeir voru mjög einbeittir á æfingu og ákveðnir í að fara með sigur af hólmi á Rey Cup-mótinu.