Svo kann að fara að Julian Assange, stofnandi Wikileaks, geti komist hjá því að verða framseldur til Bandaríkjanna.

Þar gæti beðið hans þungur dómur fyrir njósnir en heimildarmenn The Wall Street Journal innan bandaríska dómsmálaráðuneytisins segja til athugunar að fá Assange til að játa á sig síður alvarlega glæpi. Þannig yrði hann látinn laus úr bresku fangelsi og ekki framseldur til Bandaríkjanna.

Wikileaks birti trúnaðargögn frá Bandaríkjaher um stríðsrekstur hans í Írak og Afganistan. Meðal þeirra var myndband sem sýndi hermenn drepa almenna borgara í Bagdad. Assange hefur setið bak við lás og slá í Belmarsh-fangelsinu í Lundúnum frá því hann var handtekinn í sendiráði Ekvador í borginni fyrir tæpum fimm árum.