Heathrow-flugvöllur í Lundúnum á Englandi er enn lokaður eftir að eldur kom upp í spennistöð í bænum Hayes skammt frá flugvellinum í gærkvöldi. Enn logar eldur í spennistöðinni en tekist hefur að koma rafmagni á hluta flugvallarins. Útilokað er þó að flugumferð komist aftur af stað á þessum fjölfarnasta flugvelli Evrópu í dag.

Þúsundir eru strandaglópar vegna málsins og flugvallaryfirvöld vara við því að truflanir verði á flugi til og frá vellinum næstu daga.

Icelandair og British Airways voru með tvær flugferðir hvort á áætlun milli Keflavíkur og Heathrow í dag en þeim hefur öllum verið aflýst.