Um helmingur Dana sniðgengur bandarískar vörur vegna Trump
Allt að helmingur Dana kaupir ekki bandarískt vegna stefnu forsetans þar í landi. Utanríkisstefna hans hefur bæði komið niður á Dönum vegna veru þeirra í Evrópusambandinu en einnig vegna áhuga hans á innlimun Grænlands.
Allt að helmingur Dana sniðgengur bandarískar vörur vegna tollastríðs Donalds Trump Bandaríkjaforseta og ásækni hans í Grænland. Þetta sýnir könnun sem sjónvarpsstöðin TV2 lét gera.
Bæði kaupir fólk síður bandarískar vörur í hefðbundnum matarinnkaupum og það velur danskan skyndibita framyfir þann ameríska.
Samtök lítilla og meðalstórra fyrirtækja óttast að þessi mótmæli hvetji Trump til frekari aðgerða gegn Danmörku, sem hefðu þá mun meiri slagkraft en breytt hegðunarmynstur danskra neytenda.