Úkraínumenn ekki mótfallnir afnámi refsiaðgerða gegn Rússum

Bandaríski fjölmiðillinn Politico hafði í morgun eftir embættismanni, sem fer fyrir refsiaðgerðum fyrir hönd ríkisstjórnar Úkraínu, að Úkraínumenn væru því ekki mótfallnir að Vesturveldin myndu fella niður refsiaðgerðir á hendur Rússum í skiptum fyrir öryggistryggingar Úkraínu og réttlæti til framtíðar. Réttu skilyrðin þyrftu þó að vera fyrir hendi.

Þá sagði embættismaðurinn, Vladyslav Vlasiuk, að Úkraínumenn rýndu í orðræðu rússneskra embættismanna til að komast að því hvaða refsiaðgerðir hefðu verið sársaukafyllstar. Sú þekking væri síðan nýtt í samningaviðræðum.

Yfirvöld í Washington og Moskvu hafa staðfest að Pútín og Trump ræði saman í síma á morgun um mögulegt vopnahlé í Úkraínu.